Taratasy Voaloha’e Hoahy o Korintianao
12 Teako hofanta’areo ry rahalahy ty miomba i fagnomezagne ara-pagnahỳ. 2 Hai’areo, tamy inareo mbe tsy nimpinoy,* le nivoatao naho nivoafita o sampy tsy mirehakeo mba hagnorike ze raha tea iareo hatao. 3 Teako hofanta’areo fa tsy misy ndaty tarihe i fagnahin’Andrianagnaharey, le hirehake tie: “Voaozogne ty Jesosy!” Sady tsy hisy ndaty hirehake tie: “I Jesosy ro Tompo!” naho tsy amy ty alala i fagnahy masigney.
4 Misy fagnomezagne maro karazagne, faie raike avao i fagnahỳ. 5 Misy fanompoagne maro karazagne, faie raike avao ty Tompo. 6 Misy asa maro sambe karaza’e, faie raike avao ty Andrianagnahare, i magnatanterake o raha rehoe amy ty alala o ndatioy. 7 Faie mibaribary amy ty tsikiraidraike ty fomba fiasa i fagnahỳ mba hahasoa ze kila ndaty iaby. 8 Ty ila’e nampea i fagnahy masigney mba hirehake aman-kilala,* ty ila’e nampea i fagnahy masigney mba hirehake ty raha tsy taka ty hafa.* 9 O fagnahy io avao ka ty magnomey ty ila’e finoagne, faie magnomey fahaiagne magnasitragne hoahy ty ila’e. 10 Io avao ka ro mahavy ty ila’e hanao fahagagagne, le ty ila’e haminany, le ty ila’e hahay hagnambake ty fagnambaragne boake amy i fagnahỳ, ty ila’e hirehake amy ty firehake sambe hafa, le ty ila’e handika rehake. 11 Faie i fagnahỳ raike avao ty magnatanterake o asa rehoe. Sambe nimea i fagnahỳ fahaiagne ty ndaty tsikiraidraike, arakarake ze tea’e.
12 Raike avao o vatagneo faie misy ratsambatagne maro. Faie ndra tie maro aza i ratsambatagne rey, le raike avao i vatagney, le hoe izay ka ty Kristy. 13 Ty anto’e, fagnahy raike avao ty nanoagne badisa antikagne iaby mba ho vatagne raike avao, ndra Jiosy zay ndra Grike ndra ndevo ndra ndaty afake, sady raike avao ty fagnahy masigne niazontikagne* iaby.
14 Maregne fa tsy ratsambatagne raike avao ty amo o vatagneo ey fa maro. 15 Naho mirehake zao o tombokeo tie: “Tsy agnisa i vatagney raho satria tsy tagnagne”, le tsy izay ro tsy maha agnisa o vatagneo aze. 16 Naho mirehake o sofigneo tie: “Tsy agnisa i vatagney raho satria tsy maso”, le tsy izay ro tsy maha agnisa o vatagneo aze. 17 Naho ni-maso iaby i vatagney, aia ty ho nitsanognagne? Naho ni-sofigne iaby i vatagney, aia ty ho nagnantsognagne? 18 Faie napetran’Andrianagnahare tamy ty pilasi’e ty ratsambatagne tsikiraidraike, arake ze iteava’e aze.
19 Naho niraike avao o ratsambatagneo iaby, aia i vatagney? 20 Faie ndra tie ratsambatagne maro iareo, le vatagne raike avao. 21 I maso tsy afake hirehake amy i tagnagne tie: “Tsy mipay azo raho”, le i loha tsy afake hirehake amy i tomboke tie: “Tsy mipay azo raho.” 22 Ndra o ratsambatagne hoe malemeo aza, le misy ipaliagne aze. 23 Misy faritse amy ty vatantika zao eretseretentika tie tsy le misy hasi’e, faie irey ro tena meantikagne voninahitse. Izay ty mahavy antikagne vao mainke magnisy hasi’e o faritse mahamegnatse amy ty vatantikagneo. 24 Fa i faritse heverentika ho soa rey tsy mipay ndra inogn’ino. Faie ndra tie eo zay, le natamban’Andrianagnahare amy i vatagney iareo iaby, le vao mainke nimea’e voninahitse ty faritse tsy managne voninahitse, 25 amy izay tsy hizarazara i vatagney fa hifagnampe i ratsambatagne rey. 26 Naho mijale ty ratsambatagne raike, le miarake mijale ama’e iareo iaby. Ndra naho omeagne voninahitse ty ratsambatagne raike, le miarake mifale ama’e i ratsambatagne ila’e rey iaby.
27 Vata i Kristy nareo iaby, le inareo tsikiraidraike ty ratsambata’e. 28 Izao ty nanendrean’Andrianagnahare ty tsikiraidraike amo o fiangonagneo eo: Voaloha’e apostoly, faharoe mpaminany, fahatelo mpampianatse, ty ila’e hanao asa mahagaga, ty ila’e hahay hagnasitragne, ty ila’e hagnampe ty hafa, ty ila’e hahay hitarike naho hahay hirehake amy ty firehake sambe hafa. 29 Iareo iaby vao ro apostoly? Iareo iaby vao ro mpaminany? Iareo iaby vao ro mpampianatse? Iareo iaby vao ro mahavita manao asa mahagaga? 30 Iareo iaby vao le managne fahaiagne magnasitragne? Iareo iaby vao le mahavita mirehake amy ty firehake sambe hafa? Iareo iaby vao le mpandika rehake? 31 Mikezaha mafe areke hahazo i fagnomezagne lahibey rey. Faie mbe misy lalagne soa mandikoatse ireo zay hatoroko anareo.