5 Mirehafa amy ty Ana’o

INO TY DIKA IZAY?

Mirehake soa amy ty ana’o rehe naho rehafe’o ama’e ze raha an-tsai’o ao naho am-po’o ao, le engao hanao hoe izay ka reke.

NAGNINO ZAY RO TENA ILAEGNE?

Tsy le mirehake o ajajao naho fa mihabey, le va’e ho sarotse ama’o ty mirehake ama’e. Tsy fanta’o ze tena an-tsai’e ao naho am-po’e ao. Hafara’e rehe tsisy azo’o atao fa le fa magnente aze avao. Faie amy igne nareo ro tena mila mifampirehake.

INO TY AZO’O ATAO?

Tsanogno reke naho fa te hirehake. Toko’e ho vognogne hitsanogne aze avao rehe ndra tie halem-bey reke ro te hirehake.

“Misy fotoagne rehe te hirehake ama’e tie: ‘Ty haela izay rehe tsy nirehake amako fa ie rehe hinane zao vaho izay hirehake amako?’ Zara’e aza reke mba mirehake. Tsy izay vao ro tena paliaventikagne rae aman-drene?”​—Lisa.

“Nainako hiroro avao naho fa hariva i androy. Faie misy fotoagne fa halem-bey vaho izay te hirehake amako i anakoy. Tena nisoa aloha ty nireha’ay tamy izay!”​—Vonjy.

TORO LALA TY BAIBOLY: “Lonike ty tsikiraidraike hipay lognandro ze hahasoa ty hafa.”​—1 Korintianina 10:24.

Mikezaha hifantoke. Izao ty nirehafe ty lahilahy raike toy: “Misy fotoagne raha hafa ty omba ty saiko naho fa mirehake amako i anakoy. Le avy le trea iareo tie tsy mitsanogne iareo raho!”

Vonò o teléo ndra o fitaovagne elektronike hafao naho ohatse ireo ty mahatondregne azo. Tsanogno soa ty ana’o naho fa mirehake ndra tie raha tsisy dika’e aza ty raha rehafe’e.

“Ko atao ty hahavy ty ana’o hieretseretse tie, tsy midare ty fihetseham-po’e rehe. Manjare tsy hamorake ze am-po’e ao sasa reke ndra hipay ndaty hafa hirehafa’e.”​—Miranda.

“Ko le avy le boseke naho tsy le maregne ty raha rehafe’e.”​—Anthony.

TORO LALA TY BAIBOLY: “Ambeno ty fomba fitsanogna’areo.”​—Lioka 8:18.

Hararaoto ze fotoagne azo irehafagne. Mora amo o ajajao ty mirehake naho fa tsy mifagnatreke ama’e ty rae aman-drene’e.

“Afake mirehake soa zahay naho fa miarake mitsangatsangagne. Amy igne zahay tsy mifagnatreke.”​—Nicole.

Afake mifampirehake soa ka o keleiagneo naho fa miarake mihinagne.

“Naho fa miarake mihinagne zahay naho fa hariva, le sambe mitantara ze raha niseho tamy i androy. Rehafe’ay ndra ty raha soa ndra ty raha raty. Manjare miharo saigne zahay sady tsapa’ay fa mora ama’ay ty miatreke olagne.​—Bilo.

TORO LALA TY BAIBOLY: “Lonike ze kila ndaty hitsanogne soa, tsy ho meke hirehake.”​—Jakoba 1:19.