Tena Tea Azo ty Jehovah

1. Ino ty raha avy an-tsai’o ao naho fa misaintsaigne miomba i Jehovah?

FA NISY fotoagne vao rehe nieretseretse tie manao akore ze o Jehovah zao? Naho fa nirehake tama’e tamy ty alala ty vavake rehe, ino ty raha niavy tan-tsai’o ao? Ndra tie tsy trea maso aza ty Jehovah, le mirehake raha isan-karaza’e miomba aze o Baibolio. Atao tihoe “masoandro naho fikalagnam-bala” vaho “afo mandevogne” ty Jehovah. (Sal. 84:11, Heb. 12:29) Naho fa nahatrea fahitagne miomba i Jehovah ty Ezekiela, le vato safira naho raha mamilempiletse vaho hazavà o havagneo ty nitrea’e. (Ezek. 1:26-28) Va’e hahagaga antika sady va’e hampatahotse antika reke naho fa mandineke o raha irehafagne Aze reo tika.

2. Nagnino ro va’e ho sarotse amantika ty hifandrambe maifitse amy i Jehovah?

² Va’e sarotse amantika ty hino tie tea antika ty Jehovah satria reke tsy treantika maso. Misy ty mieretseretse tie tsy ho afake ty hotea iareo ty Jehovah noho ty raha niaigna iareo taloha tagne. Va’e tsy nanagne rae bey hatea ohatse iareo. Ony i Jehovah soa ze anto’e rezay naho ty voka ze raha rezay amantika. Mba hagnampeagne antika, le nampanorate’e agnate ty Saontsi’e ao ty toetse maha ie aze.

3. Nagnino tika ro toko’e handineke ty hatea i Jehovah?

³ Hatea ty rehake fara izay ty soa irehafagne i Jehovah. Mirehake ty Baiboly tie “Andrianagnahare hatea.”(1 Jaona 4:8) Noho ty hatea ty anto’e mahavy aze manao raha. Noho ze hatea’e zay ty mahavy aze matarike sady tsy ty mpanompo’e avao ty anehoa’e hatea fa ze kila ndaty. (Mat. 5:44, 45) Amy ty lahatsoratse toy, le handineke soa ty miomba i Jehovah naho ty hatea’e tika. Arakarake ty hahafantarantika i Jehovah ty vao mainke hiteàvantikagne aze.

TENA TEA ANTIKA TY JEHOVAH

4. Ino ty tsapa’o noho ty hatea i Jehovah? (Henteo i sarey.)

⁴ “Bey hatea vata’e ty Jehovah.” (Jak. 5:11) Amy Baiboly ao, le ampitovie i Jehovah amy ty rene raike bey hatea ty vata’e. (Isaia 66:12, 13) Mba alao sare an-tsaigne moa ty rene raike mikarakara aman-katea ty ana’e kedekede. Mitrotro aze reke, le magnatsike aze moramora. Naho fa mitagny i ajajay ndra marare, le fantare’e ze raha paliave’e. Naho fa mivali-doha ka tika, le afake matoky ty hatea i Jehovah antika. Hoe ty mpanao salamo raike: “Naho fa nimaro ty raha nampinekoneko ahy, le nampionogne naho nampitony ahy Rehe.”​—Sal. 94:19.

5. Midika ino ho azo ty hatea i Jehovah tsy miovaova?

⁵ Tsy miovaova ty hatea i Jehovah. (Sal. 103:8) Tsy mitorifike amantika reke ndra tie manao hadisoagne tika. Mateteke nandiso tamà i Jehovah ty firene o Israelio, faie le mbe naneho hatea tamy ze nibebake tamy iareo reke tie: “Sarobily agnatrehako eo rehe le magneva ty ho hajaegne sady tea azo Raho.” (Isaia 43:4, 5) Tsy miova ty hatea i Jehovah. Afake matoky izay tika. Ndra tie manao fahotagne lahibey aza tika, le tsy mienga antika reke. Naho mibebake tika sady miheregne amy i Jehovah, le mbe hahatsapa ty hatea’e indraike. Nampitamà reke tie ‘hamela heloke vata’e.’ (Isaia 55:7) Ampitovie ty Baiboly amy ty “fotoagne mamelombelogne boake amy i Jehovah” ze famelà’e zay.​—Asa. 3:19.

6. Ino ty ampianare ty Zakaria 2:8 antika miomba i Jehovah?

⁶ Vakio ty Zakaria 2:8. Satria tea antika ty Jehovah, le taka’e soa ty raha tsapantika sady vognogne hiaro antika reke. Malahelo reke naho fa malahelo tika. Afake matoky areke tika fa hamale antika reke naho fa mivavake tika tie: “Ambeno manahake ty saintem-pihaino’o raho.” (Sal. 17:8) Raha tena sarobily naho saro-paly amy ty vatantika o masò. Naho fa ampitovie i Jehovah amy ty saintem-pihaino’e areke tika, le hoe misaontsy reke tie: ‘Ze ndaty mikasike azo, le mikasike ty raha tena sarobily amako.’

7. Nagnino tika ro mila magnatanjake ty fatokisantika ty hatea i Jehovah?

⁷ Tea i Jehovah ho rese lahatse tika tie tena tea antika tsikiraidraike reke. Faie oni’e fa noho ty raha niaignantika, le va’e ho sarotse amantika ty hino ty hatea’e antika. Ndra ka va’e miatreke raha hitsapa ty hateantika aze tikagne amy izao. Ino ty hagnampe antika hatoky ty hatea’e antika? Dineho ty fomba nisaontsia’e ty hatea’e i Jesosy naho o voahosotseo vaho ze kila ndaty.

TY FOMBA NANEHOA I JEHOVAH TY HATEA’E

8. Nagnino ty Jesosy ro nirese lahatse tamy ty hatean-dRae’e?

⁸ Fa niarake tagnate ty fotoagne lava bey ty Jehovah naho i Ana-dahi’ey. Tagnate ze fotoagne lava bey niaraha iareo tan-dagnitse agne zay, le nanjare nihamafe sady nitombo ty fifankateava iareo roe. Nisaontsy ze hatea’e zay ty Jehovah amy Matio 17:5 ao. Afake nisaontsy hoe izao avao Reke tie: ‘Io ty ndaty ankasitrahako.’ Faie tea i Jehovah ho fantantika tie tena tea’e ty Jesosy, le natao tihoe “Anakisoko teako.” Nirehareha noho ty amy i Jesosy naho ty raha hatao’e ty Jehovah. (Efes. 1:7) Azo antoke fa hay Jesosy soa ze hatea i Baba’e aze zay sady nitsapa’e. Mateteke ty Jesosy ro nirehake ty fatokisa’e ty hatea i Raey aze.​—Jaona 3:35; 10:17; 17:24.

9. Ino ty rehake mampiseho ty hatea i Jehovah o voahosotseo? (Romanina 5:5)

⁹ Nisaontsy ty hatea’e o voahosotseo ka ty Jehovah. (Vakio ty Romanina 5:5.) Mareho ty rehake tihoe “fa natao.” Misy diksionera Ara-baiboly raike mandika aze tihoe “hoe rano nailigne amantika.” Trea amo o rehake rehoe ty habey ty hatea i Jehovah iareo! Fanta o voahosotseo fa “tean’Andrianagnahare” iareo. (Joda 1) Nirehake ty raha tsapa’e hoe izao ty apostoly Jaona tie: “Mba eretsereto moa ty hatea naseho i Raey antika! Tinoka’e tihoe ana’e tikagne.” (1 Jaona 3:1) O voahosotseo avao vao ro tea i Jehovah? Oho’o. Tea i Jehovah tikagne iaby.

10. Ino ty fomba fara izay ty lahibey nampisehoa i Jehovah ty hatea’e azo?

¹⁰ Ino ty fomba fara izay ty lahibey nampisehoa i Jehovah ty hatea’e? Tsy misy fanehoagne hatea tena lahibey mandikoatse i solovoigney! (Jaona 3:16; Rom. 5:8) Nimea i Jehovah antika i Ana’e tea’ey sady nenga’e mba ho mate hoahy o ndatio iaby, amy izay ho voavela ty fahotantikagne sady afake ty hinamagne Ama’e indraike tikagne. (1 Jaona 4:10) Arakarake ty isaintsaignantika ty raha natao i Jehovah naho i Jesosy, le vao mainke ho tsapantikagne soa ty hatea iareo ty ndaty tsikiraidraike. (Gal. 2:20) Tsy tihoe noho i Jehovah te hanao ty rare’e avao ty anto’e nahavy aze nagnomey i solovoigney fa noho ty hatea’e ka. Nagnaporofo ty hatea’e antika Reke, le nimea’e antika ty raha tena sarobily ama’e, le i Jesosy. Nengà i Jehovah hijale naho ho mate ho antika i Ana’ey.

11. Ino ty azontikagne ianaragne amy ty Jeremia 31:3?

¹¹ Arake ty nitreantika, le tsy tihoe nisaontsy avao ty Jehovah tie tea’e tika fa nanao raha hampisehoagne izay ka reke. (Vakio ty Jeremia 31:3.) Nitaone i Jehovah hagnatogne aze tika satria tea’e. (Ampitahao amy ty Deoteronomia 7:7, 8.) Tsy misy raha ndra ndaty afake mampisarake antika amy ze hatea’e zay. (Rom. 8:38, 39) Ino ty tsapa’o noho ze hatea’e zay? Vakio ty Salamo 23, le henteo ty voka ty hatea i Jehovah tamy i Davida naho ty voka izay amantika.

INO TY TSAPA’O NOHO TY HATEA I JEHOVAH?

12. Inogne ty rehafegne amy Salamo 23 ao?

¹² Vakio ty Salamo 23:1-6. Mirehake ty fatokisagne ty hatea i Jehovah ty Salamo 23. Nirehake ty fifandrambesagne mafe nisy tama’e naho tamy i Jehovah, i Mpiarakey ty Davida, tamy tie ireke nanoratse io. Nahatsapa ho voaro ty Davida naho fa nengà’e hitari-dalagne aze ty Jehovah sady niantehetse tama’e reke. Nifanta i Davida fa haneho hatea aze avao ty Jehovah amparake ty iaigna’e. Nagnino reke ro natoky izay?

13. Nagnino ty Davida ro natoky tie hikarakara aze ty Jehovah?

¹³ “Tsy ho ore ndra inogn’ino raho.” Nahatsapa ho voakarakara ty Davida satria nagnomey ze raha nipaliae’e avao ty Jehovah. Nifandrambe soa tamy i Jehovah ka reke sady nahazo ty fankasitraha’e. Izay ty nahavy aze natoky tie ndra inogn’ino raha hiseho amy ty hoavy, le hagnomey ty raha ilae’e ty Jehovah. Ty fatokisa i Davida ty hatea i Jehovah aze ty tena nibey naho ampitahaegne amy ty raha nampivali-doha aze. Nahavy aze ho falefale naho niafa-po areke ze raha zay.​—Sal. 16:11.

14. Akore ty va’e ikarakara i Jehovah aman-katea antika?

¹⁴ Mikarakara aman-katea antika ty Jehovah, lohotsie naho fa nisy loza niseho tamy ty fiaignantika. Fa nanompo tamy i Betela ao tagnate ty 20 taogne ty Claire.a Tsy nifanta’e ty raha ho natao’e naho fa nisy olagne lahibey niseho tamy ty keleia’e teo. Nisy lio nivongagne ty tagnate ty lohan-drae’e tao, nivoaroake ka ty rahavave’e raike, nimontso asa i keleia’e rey sady nirava ka ty tragno iareo. Akore ty nampisehoa i Jehovah ty hatea’e iareo? Hoe ty Claire: “Natao i Jehovah azo antoke avao tie nanagne ze raha nipaliave’e o keleiako reo. Mateteke ty Jehovah ro nagnomey mihoatse ze raha nieretsereteko! Lava mahatsiaro i fotoagne nahatsapako ty hatea i Jehovah rey raho sady tena sarobily amako rey. Magnampe ahy hiatreke raha sarotse avao ty fitadidiagne ireo.”

15. Nagnino ty Davida ro nahatsapa ho velombelogne? (Henteo i sarey.)

¹⁵ “Mamelombelogne ahy reke.” Nisy fotoagne ty Davida nikivy satria nimaro ty olagne natrehe’e. (Sal. 18:4-6) Faie mbe namelombelogne aze ty hatea i Jehovah naho ty fikarakara’e. Nente i Jehovah tamy ty toeragne feno “akata maintso” naho “toeragne azo itofàgne sady misy rano” i nama’e rerakey. Voka’e, nanjare nahazo hery indraike ty Davida sady nanohy ty fanompoa’e aze.​—Sal. 18:28-32.

16. Akore ty ahafaha ty hatea i Jehovah hamelombelogne azo?

¹⁶ Hoe izay ka ty amy izao satria “noho i Jehovah tea antika naho tsy mivalike amantikagne ro tsy mahazamagne antika” naho fa misy raha sarotse manjò antika. (Fitom. 3:22; Kol. 1:11) Dineho ty ohatse miomba Rachel. Nikivy reke naho fa niala tamy i Jehovah ty ana’e tamy COVID-19-oy. Ino ty natao i Jehovah? Hoe reke: “Natao i Jehovah ty hahatsapako tie tena tea ahike reke. Nandany fotoagne hiarahagne tamako ty namako, ninday hanegne ho ahy, nandefa sms mampahery naho andinin-teny, nisomilake tamako, sady naniahy ahy tie mikarakara ahike ty Jehovah. Misaotse Jehovah lognandro raho noho ty nagnomea ahike keleiagne bey hatea.”

17. Nagnino ro tsy nisy loza natahora i Davida?

¹⁷ “Tsy misy loza atahorako satria miarake amako rehe.” Nagnoho-doza ty fiaigna i Davida kindraike sady nanagne fahavalo maro matanjake reke. Faie noho ty hatea i Jehovah, le nahatsapa ho voaro reke. Nahatsapa reke tie niarake tama’e avao tamy ze raha niseho iaby ty Jehovah sady tena natokisa’e zay. Noho izay le nihira hoe izao reke: “Nagnafake ahike tamy ty tahoko iaby reke [Jehovah].” (Sal. 34:4) Natahotse ty Davida faie mbe ambone ze taho’e zay ty hatea i Jehovah aze.

18. Nagnino ty fatokisa’o ty hatea i Jehovah ro magnatanjake azo naho fa irehe matahotse?

¹⁸ Akore ty ahafahantika matoky fa tena hagnatanjake antika ty hatea i Jehovah naho fa misy raha mampatahotse antika? Nirehake ty raha tsapa iareo mirovaly ty mpisava lalagne raike atao tihoe Susi naho fa namono tegna i ana-dahy iareoy. Hoe reke: “Tena raty i raha nisehoy, le tena nisy voka’e raty tama’ay zay sady tsy misy raha niazo’ay natao. Faie noho ty hatea i Jehovah le nahatsapa ho voaro zahay.” Hoe ty Rachel i nirehafegne taloha teoy: “Naho fa nalahelo naho ninekoneko sady natahotse raho tamy ze halegne raike zay, le nivavake mafe tamy i Jehovah. Tsy ela tafara izay le nitsapako fa nampitony ty foko reke, manahake ty atao ty rene amy ty ana’e, le niazon-droro raho. Tena tsy ho halignoko ze fotoagne zay.” Nigadra tagnate ty efatse taogne ty androanavi-pagnahy raike atao tihoe Tasos noho ireke tsy nimete hanao maramila. Akore ty nikarakarà i Jehovah aze? Hoe reke: “Nagnomey ahy mihoatse ze nilaeko ty Jehovah. Vao mainke nahavy ahike hatoky aze tanterake zay. Ty fagnahy masy i Jehovah ka le nagnampe ahy ho fale avao tagnate i toeragne mahakivỳ ao. Nagnampe ahike hahatrea zay tie arakarake ty atokisako i Jehovah ro hahatsapako ty hatea’e ahike. Ndra tie mbe nigadra aza raho, le nanomboke nanao mpisava lalagne maharetse.”

MAGNATÒGNA I ANDRIANAGNAHARE BEY HATEAY

19. a) Nagnino ty fahafantara’o ty hatea i Jehovah ro misy voka’e amy ty raha rehafe’o naho fa mivavake? b) Inogne amy i raha irehafagne ty hatea i Jehovah rey ro tena manohigne ty fo’o? (Henteo ty efajoro tihoe “Rehake Magnampe Antika Hahatsapa ty Hatea i Jehovah.”)

¹⁹ I raha niseho nirehafentikagne tato rey le magnaporofo fa “i Andrianagnahare hateay” le manohagne antika! (2 Kor. 13:11) Tea antika tsikiraidraike reke. Tena rese lahatse tika fa “magnodidigne antika ty hatea’e naho ty tsy fivaliha’e.” (Sal. 32:10) Arakarake ty isaintsaignantika ty fomba nanoroa’e hatea ro vao mainke hahatreavantika tie mikarakara antika reke sady marine antika. Managne fahafahagne hivavake ama’e tikagne sady hirehake ama’e tie tena mipay ty hatea’e. Afake aborantika ama’e ka ze raha iaby mampinekoneko antika satria matoky tika tie mahaonigne izay reke sady te hagnampe antika.​—Sal. 145:18, 19.

20. Nagnino ty hatea i Jehovah ro mahavy antika hifandrambe marine ama’e?

²⁰ Miharine o afò zao tika naho fa manintsigne i androy. Hoe izay ka fa mahavy antika hifandrambe maifitse amy i Jehovah ty hatea’e. Tena mahery ty hatea i Jehovah faie mamelombelogne. Mahafale tihoe tea azo ty Jehovah. Lonike areke tika hirehake ama’e hoe izao ka naho fa mandineke ty hatea’e antika tie: “Teako ty Jehovah!”​—Sal. 116:1.