Mahasoa Antikagne ty Mifandrambe Marine!

1-2. Ino ty raha tena lahibey amy i Jehovah, le ino ty raha tea’e hataontikagne?

TENA sarobily amy i Jehovah ty fomba indesantika ty hafa. Nampianare i Jesosy tie, tsy maintsy teantika manahake ty tegnantika ty namantika. (Mat. 22:37-39) Tafilitse amy izay tihoe, soa fagnahy amy ty ndaty tsy mitovy raha inoagne amantikagne. Naho maneho hasoa fagnahy hoe izay tika, le manahake i Jehovah Andrianagnahare. “Ireke zao magnomey i masoandro’ey o ndaty raty fagnahio naho o ndaty soa fagnahio sady mampiavy o oragneo amy ty ndaty maregne naho amy ty ndaty tsy maregne.”​—Mat. 5:45.

² Ndra tie tea ze kila ndaty aza ty Jehovah, le o ndaty manao ty maregneo ty tena ikokoa’e. (Jaona 14:21) Tea’e hanahake aze tika. Risihe’e tika mba ho “tena tea” o rahalahy naho o rahavaveo sady “hikoko” iareo. (1 Pet. 4:8; Rom. 12:10) Tihoe tea sady mikoko ndaty raike, le manahake ty hatea tsapantika amy ty longo teantika ndra amy ty namagne maifitse antika.

3. Ino ty raha tsy maintsy tadidientikagne miomba ty hatea?

³ Manahake ty folera o hateao. Mila karakaraegne reke mba hahavy aze hitombo. Nanoro hevetse o Kristianao ty apostoly Paoly tie: “Mifankateava lognandro manahake o mpirahalahio.” (Heb. 13:1) Tea i Jehovah hampitombo ty hateantika ty hafa lognandro tika. Hodinehentika amy ty lahatsoratse toy tie, nagnino tika ro toko’e hifandrambe marine amo o mpiara-manompo amantikagneo sady akore ty hanoantika izay lognandro.

NAGNINO TIKA RO TOKO’E HIFANDRAMBE MARINE?

4. Arake ty Salamo 133:1, akore ty hahavy antika hankasitrake avao ty fiharoan-tsaigne misy amo o rahalahintikagneo eo? (Henteo ka i sare rey.)

⁴ Vakio ty Salamo 133:1. Mitovy hevetse amy i mpanao salamo nanoratse tihoe “soa” naho “fanjaka” ty minamagne amy ty ndaty tea i Jehovah-y tikagne. Va’e tsy ho voamarentika ty hasoa ty hatae bey raike naho fa treantikagne avao reke isan’andro. Va’e tsy hahavoamareke ty hasoa ty firaisan-kina amo o rahalahy naho o rahavaveo eo ka tika satria va’e tsy indroe tsy indraike ty ifankatreavantikagne amy iareo. Mihaogne amy iareo mateteke agnate ty heregnandro raike tika. Akore ty hahavy antika hankasitrake iareo avao? Hitombo ty hateantika o rahalahy naho o rahavaveo, naho manokagne fotoagne mba hisaintsaignagne ty hasarobily iareo tsikiraidraike amo o fiangonagneo eo naho amantikagne tika.

5. Ino ty voka’e amy ty hafa naho mifankatea tikagne?

⁵ Tena latsa ze ndaty vaho samba’e mivory naho fa mahatrea antika mifankatea. Izay avao le va’e hahavy iareo hagnatsoake hevetse tie nahatrea ty hamaregnagne iareo. Hoe ty Jesosy: “Naho mifankatea nareo, le izay ro hahafantara ty ndaty iaby tie mpianako nareo.” (Jaona 13:35) Mareho ty raha niaigna i Chaithra, mpianatse tamy oniverisite ey. Nianatse Baiboly tamy ty Vavolombelo i Jehovah reke. Nagneke hagnatreke havoriambey vondrom-paritse reke. Naho fa boake nagnatreke ty andro voaloha’e reke, le nirehake tamy i mpampianatse Baiboly azey tie: “Mbe lia ty rae aman-dreneko naho namihigne ahy. Faie andro raike avao tamy ty havoriambey toy le fa ndaty 52 ty namihigne ahy! Tamo o keleiagne ara-pagnahy iohoeke ty nahatsapako ty hatea i Jehovah. Te ho agnisa o keleiagne iohoe raho.” Nandroso avao ty Chaithra, le natao badisa tamy 2024. Ie, naho fa mahatrea ty asa soa ataontika o ndaty vaovaò, agnisa izay ty fifankateavantika, le izay mateteke ty mandrisike iareo hanompo i Jehovah.​—Mat. 5:16.

6. Nagnino ro miaro antikagne ty fifandrambesagne maifitse amo o rahalahy naho o rahavaveo?

⁶ Miaro antika ty fifandrambesagne maifitse amo o rahalahy naho o rahavaveo. Nanoro hevetse o Kristiana nama’eo hoe izao ty Paoly: “Mikezaha avao hifampahery lognandro ... amy izay tsy hisy ama’areo ty hovoafita ty ota le hanjare ho mafe fo.” (Heb. 3:13) Misy fotoagne tika kivy loatse, le manomboke miala amy ty lala i hamaregnagney ty tombontika. Va’e handrisike ze mpiara-manompo mahamareke izay areke ty Jehovah, mba hagnomey ze fagnampeagne ilaentikagne. (Sal. 73:2, 17, 23) Mahasoa antika ze fampaherezagne zay.

7. Ino ty ifandrambesa ty hatea naho ty fiharoan-tsaigne? (Kolosianina 3:13, 14)

⁷ Maro ty fitahiagne azontikagne, noho itika agnisa ty ndaty mikezake mafe mba hifaneho hatea. (1 Jaona 4:11) Ty hatea ohatse ty handrisike antika “hifandefetse avao” le izay ty mahavy antika hiray hina. (Vakio ty Kolosianina 3:13, 14; Efes. 4:2-6) Voka’e, manjare tena fanjaka ty fiharoantika am-pivoriagne agne sady tsy hotreantika an-toeran-kafa agne ze raha zay.

MIFAGNOMEZA VONINAHITSE

8. Ino ty atao i Jehovah mba hagnampeagne antika hiharo saigne?

⁸ Tena fahagagagne tihoe, miharo saigne tika magneran-tane. I Jehovah ty mahavy izay ndra tie tsy voririke aza tika. (1 Kor. 12:25) Rehafe ty Baiboly tie “ampianaren’Andrianagnahare hifankatea” tika. (1 Tes. 4:9) Naho atao amy ty rehake hafa le izao, amy ty Soratse Masigne ao ty Jehovah ty misaontsy amantika tie ino ty toko’e hataontika mba hahavy antika hifandrambe maifitse. “Ampianaren’Andrianagnahare” tika naho fa mandineke soa ty fampianara’e sady mampihatse irey. (Heb. 4:12; Jak. 1:25) Le izay vata’e ty raha kezahe o Vavolombelo i Jehovah-o atao.

9. Ino ty ianarantikagne boake amy ty Romanina 12:9-13 miomba ty fifagnomeagne voninahitse?

⁹ Mampianatse antika mba hifandrambe maifitse ty Saontsin’Agnahare. Amy ty fomba akore? Dineho ty raha nirehafe i Paoly miomba izay amy Romanina 12:9-13 ao. (Vakio.) Mareho fa nirehake reke tie toko’e “inareo ty voaloha’e amy ty fagnomeagne voninahitse ty hafa.” Ino ty tea izay horehafegne? Toko’e itika ty voaloha’e ‘hikoko’ ty hafa, le hotea mamela heloke, handrambe ambahiny, hatarike naho ty maro hafa. (Efes. 4:32) Tsy toko’e o rahalahy naho o rahavaveo areke ty holignase’o hifandrambe maifitse ama’o. Irehe ty toko’e “ho voaloha’e” hanao izay. Amy izay hotsapa’o ty raha nirehafe i Jesosy toy: “Ty magnomey ro tena mahasambatse ambone ty mandrambe.”​—Asa. 20:35.

10. Akore ty ampisehoantika tie mazoto ‘magnomey voninahitse’ ty hafa tika? (Henteo ka i sarey.)

¹⁰ Mahaliagne fa tafara ty nirehafa i Paoly tihoe toko’e ho voaloha’e tika amy ty fagnomeagne voninahitse ty hafa, le nandrisike antika reke mba “hazoto hiasa, fa tsy ho kamo.” Ty ndaty raike mazoto miasa, le marisike sady miasa mafe. Naho fa misy raha ampanoegne aze, le mazoto reke ty manao aze. Mandrisike antika hoe izao ty Ohabolana 3:27, 28: “Ko misalasala manao ty soa amy ze toko’e hanoagne izay naho mbe azo’o atao avao ty magnampe.” Naho mahatrea ndaty mila fagnampeagne areke tika, le manao ze azontika atao mba hagnampeagne aze. Tsy mangatake andro tika ndra mieretseretse tie mbe hisy ndaty hafa hagnampe aze.​—1 Jaona 3:17, 18.

11. Ino ty hagnampe antika vao mainke hifandrambe maifitse?

¹¹ Ty fomba raike anoroantika tie magnomey voninahitse ty hafa tika, le ty fahavognonagne hamela ty helo iareo naho nanao raha nahaboseke antika iareo. Hoe ty Efesianina 4:26: “Ko engagne ho tra i androy ho montake ty haboseha’areo.” Ino ty anto’e? Satria mirehake ty andine’e 27 tie ‘magnenga i Devoly hahazo bahagne’ tika naho manao izay. Tsy indroe tsy indraike ty Jehovah ty misaontsy amantika, amy ty Saontsi’e ao mba hamela heloke. Mandrisike antika mba “hifamela heloke tanterake lognandro” ty Kolosianina 3:13. Fomba tena soa hahavy antika hifandrambe maifitse amy ty hafa, ty tsy fidareantika i hadisoa iareoy ndra i raha nahaboseke antika natao iareoy. Naho manao izay tika, le hikezake mafe “hotafaharo lognandro sady hilongo soa satria fa nampiharoe i fagnahy masigney.” (Efes. 4:3) Hiharo saigne sady hilongo soa areke tika naho mikezake mamela heloke.

12. Akore ty agnampea i Jehovah antika mba hamela heloke?

¹² Va’e ho sarotse amantika ty hamela ty ndaty nandratse ty fontika. Faie naho ampea i fagnahin’Agnaharey tika, le hahavita izay. Naho fa boake nandrisike antika mba ‘hifampikoko’ naho ‘hazoto hiasa’ ty Soratse Masigne, le nanoro hevetse ka tie: “Toko’e harehe i fagnahỳ nareo.” “Tena mazoto sady mafana fo,” noho ty fiasa i fagnahy masigney ty ndaty raike ‘arehe ty fagnahy.’ (Rom. 12:11) Afake magnampe antika hifampikoko naho hifamela heloke tanterake areke i fagnahin’Agnaharey. Izay ty anto’e mahavy antika mihalale amy i Jehovah mba hagnampe antika.​—Lioka 11:13.

“TSY TOKO’E HISY FISARATSARAHAGNE TY AMA’AREO EO”

13. Ino ty raha va’e hampisy fisaratsarahagne amantikagne eo?

¹³ “Ndaty sambe karaza’e” boake amy ty foko sambe hafa, ty mahaforogne o fiangonagneo. (1 Tim. 2:3, 4) Faie naho tsy mitao tika, le va’e hampisy fisaratsarahagne ty tsy fitovia ty safidintika tsikiraidraike. Agnisa izay ohatse ty miomba ty fisikinagne naho ty pozy, ty fikarakaragne fahasalamagne ndra fihisagne. (Rom. 14:4; 1 Kor. 1:10) Noho itika ampianaren’Andrianagnahare hifankatea, le toko’e hitao tika mba tsy hieretseretse tie soa noho ty ahy ty hafa ty safidintikagne le tsy maintsy orihegne.​—Fil. 2:3.

14. Ino ty toko’e hikezahantika lognandro, le ino ty anto’e?

¹⁴ Tsy hampisy fisaratsarahagne tika naho fa mikezake mamelombelogne sady mampahery ty hafa lognandro. (1 Tes. 5:11) Vaho tsiela zay, le ndaty maro fa tsy nivory sasa ndra nasintake o fiangonagneo ro niheregne. Tena fale tika manalama iareo tolisoa! (2 Kor. 2:8) Mareho moa ty raha niseho tamy ty rahavave raike fa tsy nivory tagnate ty folo taogne toy naho fa ireke niheregne amy i Anjomba i Fanjakagney agne indraike. Hoe reke: “Nisomilake iareo naho fa nanalama ahike sady nitana iareo mafe ty tagnako.” (Asa. 3:19) Ino ty nivoka ze hasoa fagnahy kede zay tama’e? Hoe reke: “Nahavy ahike hahatsapa zay tie nahere i Jehovah amako indraike ty hafaleako.” Naho mikezake mba hampahery ty hafa tika, le hampiasae i Kristy mba hamelombelogne ‘ze rokake ty asa mafe naho ze minday entagne mavesatse.’​—Mat. 11:28, 29.

15. Ino ka ty hagnampe antika hiharo saigne? (Henteo ka i sarey.)

¹⁵ Mampisy fiharoan-tsaigne ka ty raha rehafentika. Hoe ty Joba 12:11: “Tsy ty sofigne vao ty mamantatse rehake, manahake ty lela mamantatse tsiron-kanegne?” Lava magnandragne avao ty ahandro’e ty mpahandro mahay mba hahazoa’e antoke tie mafiry vao i hanegney aloha ty hanjotsoa’e aze. (Sal. 141:3) Hoe izay avao ka fa toko’e hieretseretse soa ty raha horehafentika hey tika aloha ty hirehafagne aze. Toko’e hataontika azo antoke tie mampahery, mamelombelogne vaho “mahasoa ze mitsanogne” ty raha rehafentikagne. Izay ty tanjontika.​—Efes. 4:29.

16. Ia iaby ty tena toko’e hanao rehake mampahery?

¹⁶ Ty lahilahy manambaly naho ty rae aman-drene ro tena toko’e hitao soa, amy izay mampahery avao ty raha rehafe iareo. (Kol. 3:19, 21; Tit. 2:4) Toko’e ho foto ty famelombelomagne naho ty fampionognagne ka o androanavio satria mpiarak’agnondry i Jehovah iareo. (Isaia 32:1, 2; Gal. 6:1) Maniahy antika hoe izao ty ohabolagne raike amy Baiboly ao toy: “Ty hasoa ty rehake rehafegne amy ty fotoagne mete!”​—Ohab. 15:23.

TEA “AMY TY ATAO NAHO AMY TY HAMAREGNAGNE”

17. Ino ty toko’e hataontika amy izay boake amy ty fo ty hateantika o rahalahy naho o rahavaveo?

¹⁷ Mandrisike antika ty apostoly Jaona mba “tsy ho tea an-drehake ndra an-dela avao tika fa amy ty atao naho amy ty hamaregnagne ka.” (1 Jaona 3:18) Teantika naho boake amy ty fo ty hateantika o rahalahy naho o rahavaveo. Ino ty hagnampe antikagne amy izay? Arakarake ty ifagnosehoseantika amy iareo, ty vao mainke hahavy antika hifandrambe maifitse amy iareo naho hampitombo ty fifankateavantikagne. Mipaliava hirike hifandrambesagne amy ty hafa areke naho fa am-pivoriagne agne naho amy i fanompoagney ey. Manokàna fotoagne mba hitilihagne iareo. Izay ty anoroantika fa “ampianaren’Andrianagnahare mba hifankatea tika.” (1 Tes. 4:9) Ho tsapantika tie amy izay tie, “fanjaka sady mahafinaritse naho fa ty mpirahalahy ro miara-mitoboke am-piraisan-kina!”​—Sal. 133:1.