Fa “Nianatse ty ho Afa-po” vao Rehe?

1. Ndaty manao akore ty atao tihoe mahay mionogne faie tsy midika ho inogne zay?

NDATY mahay mionogne vao rehe? Ty ndaty mahay mionogne, le hahatrea hafaleagne sady hilamin-tsaigne satria mifantoke amy ty fitahiagne anagna’e amy izao. Ndra tie misy raha tsy anagna’e aza, le tsy soregne ndra boseke reke. Tihoe mahay mionogne, le tsy midika tie tsy mivaky loha amy ty fiaignagne rehe. Va’e hipay fomba hampitomboa’e ty fanompoa’e ohatse ty Kristiana raike. (Rom. 12:1; 1 Tim. 3:1) Faie tsy tihoe tsy hofale reke naho tsy azo’e amy ty fotoagne ieretsereta’e aze ty tombotsoam-panompoagne irie’e.

2. Nagnino ro magnoho-doza ty tsy fahaiagne mionogne?

² Misy voka’e raty ty tsy fahaiagne mionogne. Va’e hiasa mafe agnate ty lera maro mba hahazoa’e ty raha tsy tena ilae’e ty ndaty hoe izay. Mampalahelo fa nangalatse vola naho ze raha hafa nirie iareo ty Kristiana ila’e. Va’e hieretseretse hoe izao iareo: ‘Magneva ahike toy,’ ‘Fa ela ze nandignisako zay,’ ndra ‘Mbe haloako avao ty vola’e amy ty afara.’ Faie naho fa halatse, le tsy mampifale i Jehovah sady magnafa-baraka aze. (Ohab. 30:9) Ty ila’e ka va’e nidiso tamà satria tsy nahazo ty tombotsoam-panompoagne nirie’e, le nijanogne tsy nanompo i Jehovah. (Gal. 6:9) Fa nagnino ty mpanompo i Jehovah fa nanokan-tegna ho aze ro mbe manao hoe izay? Va’e tsy nikezake nionogne amy ze raha anagna’e varagne reke.

3. Ino ty toky treantikagne amy Filipianina 4:11, 12 ao?

³ Afake mikezake ty hahay hionogne iaby tika. Nanoratse ty apostoly Paoly tie “fa nianatse ty hionogne amy ze raha misy eo raho.” (Vakio ty Filipianina 4:11, 12.) Tamy tie ireke nigadra ty nanoratse ireo. Faie ndra tie teo zay, le tsy tihoe tsy nifale reke. “Nianatse” ty ho afa-po reke. Ty raha nirehafe i Paoly naho ty raha niaigna’e, le magnomey toky antika tie afake ty hahay hionogne tika ndra tie tsy mora amantika aza zay. Tsy toko’e hitamà tikagne tie, le avy le hahay hionogne mifagnarake amy ze raha iaignantika eo. Tsy maintsy mianatse ty hahay izay tika. Amy ty fomba akore? Andao tika handineke toetse hagnampe antika hahay hionogne.

MIKEZAHA HAHAY HANKASITRAKE

4. Nagnino ty fahaiagne mankasitrake ro magnampe antikagne hahay hionogne? (1 Tesalonianina 5:18)

⁴ Mahay mionogne ty ndaty mahay mankasitrake. (Vakio ty 1 Tesalonianina 5:18.) Tsy hinekoneko loatse amy ty raha teantika faie tsy anagnantikagne ohatse tika, naho fale amy ze raha tena ilaegne amy ty fiaignagne. Naho itika mifantoke amy ty tombotsoam-panompoagne anagnantika amy izao, le hanao ze fara’e soa fa tsy hifantoke amy ty fomba hahazoagne fanendreagne vaovao. Tsy mahalatsa areke naho mandrisike antika mba hankasitrake i Jehovah ty Soratse Masigne naho fa mivavake tika. Ty fahaiagne mankasitrake, le magnampe antika hahatsapa i “fiadanan’Agnahare ambone ze kila eretseretsey.”​—Fil. 4:6, 7.

5. Inogne iaby ty anto’e toko’e hahavy o Israelitao hahay hankasitrake? (Henteo ka i sarey.)

⁵ Dineho ty raha niseho tamo o Israelitao. Mateteke iareo ro nitaraigne amy i Jehovah satria te hihinagne i hanegne fihina iareo ta Ejipta agney. (Nom. 11:4-6) Ie aloha tsy nimora ty fiaignagne tam-patrambey agne. Faie inogne ty nagnampe iareo hahay hionogne? Toko’e hisaintsaigne ty raha fa natao i Jehovah hoahy iareo o Israelitao le hankasitrake aze. Naho fa nandevozegne mafe zao iareo ta Ejipta agne, le nandefa loza folo ty Jehovah hagnavotagne iareo. Naho fa nivotsotse o Israelitao, le “nalae iareo iaby ty fanagna o Ejipsianao.” Agnisa izay ty volamena, volafotsy vaho akanjo. (Eks. 12:35, 36) Naho fa ho nitratse tamy i riake menay teo iareo, le nanao fahagagagne mba hampisarahagne i ranoy ty Jehovah. Naho fa nanegnantegna i fatrambeỳ iareo, le nimea’e mana isan’andro. Faie ino ty mbe nahavy iareo nitaraigne? Tsy nahay nionogne o Israelitao satria nanagne ze hanegne nilae iareo faie tsy nahay nankasitrake.

6. Inogne ty raha ila’e hagnampe antikagne hahay hankasitrake?

⁶ Inogne ka ty hagnampe azo hahay hankasitrake? Voaloha’e, isan’andro le manokàgna fotoagne mba hisaintsaigna’o ze raha mahafale azo. Va’e ho azo’o atao ty manoratse raha roe ndra telo nahafale azo. (Fitom. 3:22, 23) Faharoe, manehoa fankasitrahagne. Manoa raha voaloha’e mba hisaoragne ty hafa noho ty raha natao’e ho azo. Ambone izay, le misaora i Jehovah mateteke. (Sal. 75:1) Fahatelo, ze ndaty mahay mankasitrake ro anò ragnetse. Mifindra o fahaiagne mankasitrakeo, le hoe izay ka ty tsy fahaiagne mionogne. (Deot. 1:26-28; 2 Tim. 3:1, 2, 5) Tsy hifantoke amy ty raha tsy anagnantikagne tika naho mipay fomba hanehoagne fankasitrahagne avao.

7. Ino ty natao i Aci mba hahavy aze hahay hankasitrake, le ino ty voka’e?

⁷ Dineho ty raha niseho tamy i Aci, mitoboke a Indonezia agne. Nieke hoe izao reke: “Tagnate i arete-manjamagne COVID-19-y, le nanomboke nampitaha ty raha niaignako amy ty ahy o mpiharo finoagne amakò raho. Voka’e, nanomboke tsy niafa-po raho.” (Gal. 6:4) Faie inogne ty nagnampe aze hagnova ty fomba fisaigna’e? Hoe reke: “Nanomboke nisaintsaigne ty fitahiagne niazoko isan’andro naho ty raha soa maro niazoko noho iraho agnisa ty fandaminan’Agnahare raho. Nisaotse i Jehovah raho tafara izay. Voka’e, nanomboke nahatsiaro ho afa-po raho.” Tsy mahafa-po azo ka vao ty raha iaigna’o? Magnino naho manao raha manahake ty natao i Aci mba hahavy azo hahay hankasitrake?

MIFANTOHA AMY TY ZOTON’AROFO I JEHOVAH AVAO SADY MIAMBANEA

8. Ino ty fandrike nahazo i Baroka?

⁸ Nivoafandrike ty Baroka, i mpitan-tsora i Jeremia mpaminanỳ. Nahazo fanendreagne tena sarotse ty Baroka. Nagnampe i Jeremia hagnambara hafatse mavesatse amy i firenena tsy mahay mankasitrakey reke. Faie nisy fotoagne ty Baroka nitondregne. Nanomboke nifantoke bey loatse amy ty tegna’e naho ze raha tea’e hatao reke fa tsy tamy ty raha tea i Jehovah hatao’e. Izao ty nisaontsie i Jehovah tamy i Baroka tamy ty alala i Jeremia: “Irehe mbe mipay raha lahibey ho azo avao. Ko mipay izay sasa.” (Jer. 45:3-5) Azo adika hoe izao ka o rehake iohoe: “Mikezaha hionogne amy ze raha fa anagna’o amy izao.” Nagneke hahitsy ty Baroka, le nahazo ty fankasitraha i Jehovah.

9. Inogne ty ianarantika boake amy ty 1 Korintianina 4:6, 7? (Henteo ka i sare rey.)

⁹ Misy fotoagne ty Kristiana raike va’e hieretseretse tie, misy tombotsoam-panompoagne toko’e ho azo’e. Va’e manan-talenta, miasa mafe naho ampe traikefa reke ndra sambe anagna’e iaby o raha rehoe. Faie va’e ndaty hafa ty mahazo i tombotsoam-panompoagne irie’ey. Ino ty hagnampe aze tsy ho boseke? Toko’e hisaintsaigne i raha nisorate i Paoly amy 1 Korintianina 4:6, 7 aoy reke. (Vakio.) Boake amy i Jehovah iaby ze tombotsoa naho talenta anagnantikagne. Tsy fagneva o fagnomezagne reo tika, fa porofo ty hasoa fagnahy miambake anagna i Jehovah reo.​—Rom. 12:3, 6; Efes. 2:8, 9.

10. Ino ty hagnampe antikagne hiambane?

¹⁰ Hahavita hiambane tika naho misaintsaigne laleke ty ohatse nenga i Jesosy. Dineho ty raha niseho tamy i halegne nanasà i Jesosy ty tombo i apostoli’e reỳ. Izao ty nisorate i apostoly Jaona: “Nihay i Jesosy tie [1] fa nimea i Rae aze iaby ze kila raha [2] sady boake aman’Agnahare reke, [3] le ho mbaman’Agnahare mbeo ka, ... le nisasà’e ty tombo i mpiana’e rey.” (Jaona 13:3-5) Afake nieretseretse ty Jesosy tie, ty tombo’e ro toko’e ho sasà iareo. Faie tamy tie ireke tambone tane etoy, le tsy mba nieretseretse reke tie fagneva ty ho mpanan-karena naho hanagne fiaignagne milamigne. (Lioka 9:58) Niambane ty Jesosy sady nahay nionogne amy ze nanagna’e. Modely voririke ho antikagne reke.​—Jaona 13:15.

11. Nagnino ty fiambaneagne ro nagnampe i Dennis hahay hionogne?

¹¹ Nikezake niambane manahake i Jesosy ty Dennis, mitoboke an’Alemaigne agne ndra tie tsy nimora tama’e aza zay. Hoe reke: “Naho fa misy ndaty ila’e mahazo tombotsoam-panompoagne, le mateteke raho ro lagìgne satria mieretseretse tie iraho ty toko’e ho fagneva igne. Naho fa miseho zay, le mianatse miomba ty fiambaneagne raho. Sorateko amy ty fandrambesagne note amy JW Library^® ao ze andinin-teny miomba izay. Mora treako reke tie amy izay, le iheregnako vakiegne indraike. Manintogne lahajaka miomba ty fiambaneagne amy telefonikoy ka raho, le tsanogneko mateteke rey.a Nianarako fa ze kila raha ataontika, le hagnomezagne voninahitse i Jehovah fa tsy ty vatantikagne. Kede avao ty anjara asantika tsikiraidraike, fa i Jehovah ty tena magnatanterake aze.” Naho manomboke tsy afa-po amy ty raha iaigna’o rehe, le manoa raha mba hahavy azo hiambane. Hagnamafe ty firagneta’o amy i Jehovah zay sady hagnampe azo ho afa-po.​—Jak. 4:6, 8.

SAINTSAIGNO TY RAHA TAMAE’O

12. Inogne amy ty raha tamaentika amy ty hoavy ty afake magnampe antika hahay hionogne? (Isaia 65:21-25)

¹² Hahatsiaro ho afa-po tikagne naho misaintsaigne ty raha fanjaka tamaentika amy ty hoavy. Trea tamy ty raha nampanorate i Jehovah i Isaia mpaminany fa tena ho sarotse ty fiaignantika tie amy izao. Faie nampitamà reke tie hafaha’e o raha sarotse rehoe. (Vakio ty Isaia 65:21-25.) Hanagne fiaignagne soa, tragno fanjaka, asa mahafa-po vaho hihinagne hanegne mahasalama naho mafiry tikagne. Tsy hinekoneko sasa miomba ty raha hagnoho-doza antika ndra ty anantika tikagne. (Isaia 32:17, 18; Ezek. 34:25) Tena ho soa ty hoavintikagne sady azo antoke.

13. Naho fa amy ty raha manao akore tika ro mila mifantoke amy ty raha tamaentikagne amy ty hoavy?

¹³ Amy hinane zao tika ty tena vao mainke mila mifantoke amy i raha tamaentikagney. Ino ty anto’e? Satria miaigne amy ty “andro fara’e” tikagne sady “sarotse atrehegne” ty olagne mahazo antikagne. (2 Tim. 3:1) Magnomey tari-dalagne, hery vaho ze fagnampeagne ilaentika ty Jehovah mba hagnampeagne antika hiaretse isan’andro. (Sal. 145:14) Magnampe antika ka ty raha tamaentika naho fa misy raha sarotse mahazo antikagne. Va’e sarotse ama’o ty magnomey ze raha ilae ty keleia’o. Midika vao zay tie lava ho sahiragne avao rehe? Tsy izay! Fa nampitamà ty Jehovah tie, hagnomey raha mihoatse ze ilae’o amy i Paradisay ao. (Sal. 9:18; 72:12-14) Va’e tararegne, kivy ndra miatreke aretem-bey hafa rehe. Midika ka vao zay tie hanahake izay avao ty fiaigna’o? Tsy izay. Tsy hisy sasa ty aretegne naho ty fate amy i tontolo vaovaon’Agnaharey ao. (Apok. 21:3, 4) Hagnampe antika ho afa-po fa tsy ho boseke ndra ho soregne amy ty raha iaignantika amy izao ze fampitamagne zay. Afake ty ho tony avao tika ndra tie miatreke tsy rare’e, mate longo, marare ndra miatreke olagne hafa aza. Ino ty anto’e? Satria ndra tie sarotse manao akore ty raha iaignantika amy izao, le fantantika fa “mandriogne avao i haoreagne” rey. Fa marine i tontolo vaovaoy, le tsy hijale sasa tikagne.​—2 Kor. 4:17, 18.

14. Akore ty azontika agnamafesagne ty raha tamaentika?

¹⁴ Magnampe antika hahay hionogne ty fanantenagne. Akore areke ty hagnamafesantika aze? Va’e mila magnisy solomaso ohatse ty ndaty raike mba hahavy aze hahatrea raha lavitse. Mila manao raha ka tikagne mba hagnamafesagne ty raha tamaentika, amy izay treantika mazava soa i Paradisa amy ty hoavỳ. Naho fa itika ohatse minekoneko miomba ty vola, le azontika atao ty misaintsaigne ty ho fiaignantika naho fa tsy hisy sasa o volao, o trosao naho ty olagne ara-toe-karena. Akore ka naho minekoneko miomba ty tombotsoam-panompoagne mbe tsy azontikagne tika? Azo atao ty misaintsaigne tie tsy hisy dika’e zay naho fa voririke tikagne sady naho fa manompo i Jehovah agnate ty agn’arivo taogne. (1 Tim. 6:19) Va’e ho mora ty minekoneko miomba ty raha miseho amy izao, ta tie misaintsaigne ty raha hiseho amy ty hoavy. Faie tsy ho sarotse amantika ty hisaintsaigne izay naho fa manao izay mateteke tika.

15. Inogne ty azo’o ianaragne boake amy ty raha nirehafe i Christa?

¹⁵ Nagnampe i Christa, valy i Dennis i nirehafegne taloha teoy ty fanantenagne. Hoe reke: “Narare raho le nanjare naleme ty ozako. Nampiasa seza misy larò’e areke raho sady mateteke ro tsy niala tam-pandreagne eo. Nanaintaigne avao raho isan’andro. Vaho tsiela i dokoterakoy ty nirehake tie, tsy tamaegne ho sitragne sasa raho. Faie hoe raho tie: ‘Tsy mitovy ty fahatreava’ay ty hoavy.’ Nilamin-tsaigne avao raho satria mifantoke amy ty raha tamaeko. Va’e hiaretse raho amy ty tontolo toy eto, faie ho feno ty hafaleako amy i tontolo vaovaoy ao!”

“ZE MATAHOTSE AZE TSY HO ORE NDRA INOGN’INO”

16. Nagnino ty Davida Mpanjaka ro afake nirehake tie “tsy ho ore ndra inogn’ino” reke?

¹⁶ Ndra ty mpanompo i Jehovah mahay mionogne aza, le mbe hiatreke olagne avao. Telo fara fahatsiampe’e ty ana i Davida Mpanjaka nimate, le tena nimafe tama’e zay. Nisy nanao kitomboke, nifotetse, nalaigne vaho nite hamono reke tagnate ty taogne maro. Faie tamy tie ireke niaretse o raha rehoe, le izao ty nirehafe’e miomba i Jehovah: “Ze matahotse aze tsy ho ore ndra inogn’ino.” (Sal. 34:9, 10) Nagnino reke ro nirehake hoe izay? Satria fanta’e tie ndra tie tsy mikalagne ty olagne mahazo antika aza ty Jehovah, le lava hagnomey ze raha tena ilaentika avao reke. (Sal. 145:16) Afake matoky ka tika fa hanohagne antika amy ze kila raha sarotse ty Jehovah. Toko’e ho afa-po areke tika.

17. Nagnino rehe ro tapa-kevetse ty hahay hionogne?

¹⁷ Tea i Jehovah ho afa-po amy ty fiaignagne rehe. (Sal. 131:1, 2) Mikezaha areke mba hahay hionogne. Naho irehe mikezake hahay hankasitrake, mifantoke amy ty fanoagne ty zoton’arofo i Jehovah, miambane sady magnamafe ty raha tamae’o, le ho afake hirehake tie: “Ie, afa-po raho.”​—Sal. 16:5, 6.