Magnampe ze Niazom-boigne vao Nareo Vavolombelo i Jehovah-o?

Eka. Mateteke o Vavolombelo i Jehovah-o ro magnampe ze niazom-boigne. Ampea’ay iaby ndra Vavolombelogne ndra ndaty hafa satria ampihare’ay ty toro lala ty Baiboly amy Galatianina 6:10 ao manao tihoe toy tie: “Naho mbe misy andro azontikagne anoagne soa, le andao hanao soa amy ze kila ndaty, somandrake fa amy ty mpiharo finoagne.” Mikezake ka zahay mba hampahery i niazom-boigne rey naho magnampe iareo hanagne finoagne matanjake satria izay ty raha tena ilae iareo.​—2 Korintianina 1:3, 4.

Fomba andaminagne i fagnampeagney

Afara i lozay, le miantso ndra magnantogne ze ndaty amy ty fiangonagne amy i faritse niazom-boigney o androanavi-pagnahio. Izay ty ahafantara’e tie tsy nisy nagninogne vao iareo sady ino ty raha va’e hilae’e. O androanavi-pagnahio ka naho fa avy eo ro mandefa hafatse amy ty birò ty sampa ty Vavolombelo i Jehovah. Rehafe iareo tie ino ty fagnampeagne vonjemeke fa natao.

Naho tsy mahavita misahagne ty fagnampeagne ilaegne i fiangonagne amy i faritsey ao rey, le mandamigne fomba hagnampeagne aze ty Filan-keve-pitantanagne. Hoe izay ka ty natao o Kristiana voaloha’e reo naho fa nisy keré ty tamy izay. (1 Korintianina 16:1-4) Manendre Komity Mikarakara ze Niazom-boigne ty birò ty sampagne mba handaminagne naho hitarihagne i fandaharam-pagnampeagney. Misy Vavolombelogne boake amy ty tane hafa ka mahafoe vola naho fotoagne mba hagnampeagne.​—Ohabolana 17:17.

Boake aia ty vola ampiasaegne?

Fagnomezagne an-tsitrapo voarae ty birò ty sampa ty Vavolombelo i Jehovah ro angalagne mba hagnampeagne ze niazom-boigne. (Asan’ny Apostoly 11:27-30; 2 Korintianina 8:13-15) Satria areke mpiasa an-tsitrapo o ndaty minday i fagnampeagney reo, le tsy lany mba hagnaramagne iareo i volay fa atokagne ho amy i fagnampeagney iaby. Ampiasaegne soa i fagnomezagne voarae’ay rey.​—2 Korintianina 8:20.