Fagnampeagne ze Niazon-doza Tamy 2023: “Tsapa’ay ty Hatea i Jehovah”

Fa nirehafe ty Baiboly mialoha fa “hisy firenena hanafike firenena”, le hisy loza amy “ty fotoagne hifaragna ty tontolo toy.” (Matio 24:3, 7) Nitreantika ty fahatanteraha o faminaniagne rehoe tagnate i taom-panompoagne 2023-y.a Faie ndra tie nisy aly naho loza arake ty natiora aza ty tamy ty tane 100 mahery, le nitsikombe ty hatea i Jehovah o Vavolombelo i Jehovah-o. Akore ty nanoroa iareo izay?

Loza 200 mahery eo ho eo ty nanjò ty rahalahy naho ty rahavaventika maro tagnate i taom-panompoagne 2023-y. Ndra zay loza arake ty natiora, ndra noho ty loza natao o ndatio. Naho atambatse, le mihoatse ty folo tapetrisa dolarab ty vola fagnomezagne hoahy ty asa magneran-tane nampiasae ty Vavolombelo i Jehovah mba hagnampeagne ze niazon-doza. Tsy izay avao fa nagnomey vola fagnomezagne hoahy ze mipay fagnampeagne amy ty toeragne misy iareo eo ka o rahalahy naho o rahavaveo. Mareho ty fomba ampiasaegne i fagnomeza’o rey mba hagnampeagne o rahalahy naho o rahavave niazon-dozao.

“Tena Tea Vata’e o Mpiara-manompò”

Mateteke misy ranobey ty amy ty faritse ila’e a Nizeria agne. Faie ty ranobey nisy tamy Oktobra 2022-y ro tena nibey sady mbe tsy nisy tagnate ty folo taogne lasa. Teteke mihoatse ty 676 000 hektara ty nisimba le ndaty mahery ty roe tapetrisa ty nafindra toeragne. Le avy le nanendre Komity Mikarakara ze Niazom-boigne ty birò i sampagne a Nizeria agne mba handamigne ty fagnampeagne ze raha ilae o rahalahy naho o rahavaveo ara-nofo naho ara-pagnahy.

Ty Voka’e Tamo o Rahalahy Naho o Rahavaventikagneo

• 7 505 ty mpitory nafindra toeragne

• 860 ty tragno nisimba ndra rava tanterake

• 90 ty Anjomba Fanjakagney nalimpo i ranoy le raike ty Anjomba fanoagne havoriambey

Ty Ampiasaegne i Fagnomezagne Rey

Mihoatse ty 250 000 dolara ty vola nilany tamy ty fagnampeagne ze niazon-doza. Retoa iaby ty nampiasaegne izay:

• Nivilianagne ze hanegne tena nilae iareo agnisa izay ty vare, tsaramaso naho paty

• Nivilianagne ze raha ilaegne an-tragno ao, agnisa izay ty kidory naho mostikera

• Nagnamboaragne ndra nagnoregnagne indraike ze tragno nisimba

Ino ty natao o rahalahio mba hampiasagne soa i fagnomezagne rey? Dinehe iareo soa zao ohatse ty tragno tsikiraidraike kera mbe azo amboaregne. Naho trea iareo tie mila fagnamboaragne tanterake i tragnoy, le mikezake magnoregne i tragnoy indraike iareo mitovitovy amy ty tragno magnodidigne eo avao.

Maro ty rahalahy naho ty rahavave tena nankasitrake i fagnampeagne iareoy. Izao zao ohatse ty raha nirehafe ty rahavave raike toy: “Sinimba i ranobeỳ ty fambolea’ay naho ty tragno’ay. Tena nisimba tanterake ty fiaigna’ay sady tsy nanan-tragno hitobohagne zahay. Faie hein hein hoe ty fiai’ay naho fa niavy ama’ay eo o mpiara-manompò tamy i androy mba hagnampe naho hagnomey ze raha ilae’ay. Tena nahatsiaro ho naivankivagne zahay. Vao mainke nivelombolo ka zahay naho fa nahazo i hanegne fagnampeagne boake amy ty birò i sampagney. Tsy naharehake sasa zahay satria nahatrea ty fahatanteraha ty Jaona 13:34, 35 tama’ay. ... Tena tea vata’e o mpiara-manompò. Izao ty hafatse boake ama’ay keleian-draike: ‘Tena mankasitrake amy ty fo’ay zahay noho i fagnampeagne natao’areo tamy ty fotoagne metey.’”

Nisy ndaty tsy Vavolombelogne nahavoamareke ty asa fagnampeagne nataontika. Nisy ndaty bey zay ty tamy ty tanà i Sabagreia, a Bayelsa agne nirehake tie: “Maro ty fikambanagne ndra fiangonagne magneran-tane faie mbe tsy nisy nanao raha mihoatse ty natao o Vavolombelo i Jehovah-o. ... Agnisa ty fikambanagne fara izay ty soa magneran-tane o fikambana’areò.”

“Tsapa’ay ty Hatea i Jehovah”

Tamy Fevrie 2023, le nisy afo tena nanimba raha maro ty ta Silia agne. Mahery ty 430 000 hektara ty tane misy harena voajagnahare nisimba. Fa ho 8 000 ty ndaty nafindra toeragne. Tsiela tafara i lozay, le nanao raha ty birò i sampagne mba hagnomeagne fagnampeagne ze nihara i lozay.

Ty Voka’e Tamo o Rahalahy Naho o Rahavaventikagneo

• 222 ty mpitory nafindra toeragne

• 20 ty tragno nisimba

Ty Ampiasaegne i Fagnomezagne Rey

Mihoatse ty 200 000 dolara ty vola nilany tamy ty fagnampeagne ze niazon-doza. Retoa iaby ty nampiasaegne izay:

• Nivilianagne hanegne naho rano

• Nivilianagne gazoaly, esansy, fitaovagne fagnaliovagne naho fagnafoly

• Nagnamboaragne ze tragno nisimba

Tena nikivy ze keleiagne raike zay naho fa nisimba ze kila raha nanagna iareo, agnisa izay ty tragno naho ty asa iareo. Tsy nanagne fivelomagne sasa iareo voka izay. Tagnate ty andro tsiampeampe, le vao mainke nikivy iareo naho fa nahita i tragno iareoy nirava. Faie naho fa nandeha i fagnamboaragney, le nanomboke tsy ninekoneko sasa iareo. Nagnampe iareo hahavita hiatreke i raha nahazo iareoy ty hatea naseho o mpiara-manompò tamy iareo. Nanohigne ty fo iareo zay, le nandrisike iareo mba hanao asa an-tsitrapo. Nagnampe tamy ty fagnoregnagne ty tragno ty rahalahy hafa areke iareo.

Nanohigne ty fo ty rahalahy naho ty rahavave hafa i asa fagnampeagne ze niazon-dozay. Izao ty nirehafe ty rahalahy raike: “Tena mahalatsa ty lamigne atao i Jehovah amy ty fisia o Komity Mikarakara ze Niazom-boigneo. Tsiela tafara i lozay, le avy le niavy tamy i toeragne nisia i lozay eo iareo ninday ze fagnampeagne tena nilaegne. Tena mampahery ty mamaky miomba ty fagnampeagne ze niazon-doza amy ty toeragne hafa agne. Faie vao mainke tena tsapa’o zay naho fa irehe ty zoe’e. Vao mainke rehe mankasitrake i fandaminagne naho ty fomba anahafa o rahalahio ty toetse i Jehovah. Tena ankasitraha’o ka ty fomba ikarakara iareo ze raha ilaentika amy ty lafi’e ara-nofo naho ara-pagnahy vaho ara-pihetseham-po. Tena azo tsapaen-tagnagne ty hatea i Jehovah anay.”

Vao mainke hihamaro ty loza hiseho arakarake ty mamparine ty hifaragna ty tontolo toy. (Lioka 21:10, 11) Faie ndra tie eo zay, le mampiasa o fiangonagne Kristianao ty Jesosy Kristy Mpanjakantikagne mba hanoroagne ty hatea’e antikagne. Hiarake amantika avao reke “amparake ty hiavia ty fara ty tontolo toy.” (Matio 28:20) Atorontika tie manohagne i Fanjakagney naho ty hatea i Mpanjakantikagney tika naho mikezake hatarike, le magnomey fagnomezagne hoahy ty asa magneran-tane amy donate.jw.org ao ndra amy ty fomba hafa. Azo’o omeagne ka ty fotoa’o naho ty heri’o. Tena ankasitraha’ay ty fatariha’areo.