Asa o Apostolio
5 Namarotse ty tane’e ka ze lahilahy raike atao Ananiasy zay naho ty vali’e. I Safira ty agnara o vali’e iohoe. 2 Faie nahaja’e ty ila’e amy ty vily i taney sady nahay izay ka ty vali’e. Nindese’e tamy i apostoly rey agne areke ty sisa i volay, le natao’e tan-tombo iareo eo. 3 Faie hoe ty Petera: “O Ananiasy, nagnino rehe ro nagnenga i Satana hitarike azo hahavany havande amy i fagnahy masigney, le nahaja’o ty ila’e amy ty vily i taney? 4 Toe tsy fa niazo avao vao i taney tamy ireke mbe tsy navaro’oy? Le naho fa navaro’o reke, tsy mbe azo avao vao i vola’ey, le azo’o ampiasaegne amy ze tea’o hampiasagne aze? Nagnino rehe ro nieretseretse hanao ze o raha raty zao tam-po’o ao? Tsy navande tama o ndaty rehe fa navande taman’Agnahare.” 5 Naho fa naharey ze reha’e zay ty Ananiasy, le avy le nidaraboke, le nimate. Natahotse iaby ze ndaty naharey ze raha niseho zay. 6 Nitsangagne ze ajalahy teo rezay, le nifognose iareo tamy ty lamba i fate’ey. Nindese iareo i fatey, le naleve iareo.
7 Telo lera tafara izay, le niavy ty vali’e. Faie tsy fanta’e ty raha niseho. 8 Le hoe ty Petera tama’e: “Fa itoy iaby vao ty vily i tane navaro’areoy?” Hoe reke: “Ie, fa ie iaby igne.” 9 Le hoe ty Petera tama’e: “Nagnino nareo mirovaly ro niharo hevetse mba hitsapagne i fagnahy i Jehovah-y? Fa an-dalan-tragno eo ty tombo i ndaty nandevegne i vali’o rey, le hinday azo ka iareo.” 10 Le avy le nidaraboke tan-tombo i Petera eo ka reke, le nimate. Naho fa nizilike i ajalahy rey, le nizoe iareo reke tie fa mate. Nindese iareo reke, le naleve iareo tagnila i vali’e eo. 11 Tena natahotse i fiangonagney iaby naho ze ndaty naharey ze raha rezay.
12 Ankoatse izay, le nanao famantaragne naho fahagagagne maro tagnatreha i vahoakey eo i apostoly rey. Niarake nivory tamy i lalagne misy tafo’e naore i Solomonay eo iareo iaby. 13 Maregne fa tsy nisy ndaty hafa nahavany niarake tamy iareo, faie nirehake raha soa miomba iareo avao o ndatio. 14 Faie ndra tie teo zay, le maro ty lahilahy naho ty ampela nanjare nino i Tompo, le vao mainke nihamaro avao ty isa iareo. 15 Nisy tamy iareo aza ninday ty longo iareo narare, le nampandrè iareo tamy ty fandreagne kedekede naho tamy ty tihy, le natao iareo tan-dalagne ey. Amy izay farafaharati’e mba alofa ty talinjo i Petera ty ila’e amy iareo naho fa mandalo eo reke. 16 Nisy vahoake maro boake amy ty tanàgne nagnodidigne i Jerosalema tey ka ninday ty longo iareo narare naho nisy demonia teo. Nisitràgne i apostoly rey iaby iareo.
17 Faie nialogne iareo i mpisorombeỳ naho i mpanohagne aze, agnisa ty sekta o Sadoseò rey. Nitsangagne areke iareo, 18 le nitsepahe iareo i apostoly rey sady natao iareo tamy i pirizòm-panjakagney ao. 19 Faie naho fa nihalegne, le nisy anjely i Jehovah nanokake ty lala i pirizòy sady nampiakatse iareo. Hoe reke: 20 “Akia nareo mitsangana amy i tempolỳ ao, le atalilio’areo o ndatio iaby avao ty hafatse miomba i havelogney.” 21 Naho fa naharey izay iareo, le nizilike tamy i tempolỳ ao tamy i mangararak’atignanagney, le nampianatse tao.
Niavy areke i mpisorombeỳ naho i mpanohagne aze rey, le navory iareo i Fitsaragne Ambone Jiosio naho ze androanavy tamo o vahoa o Israelio eo. Le nirahe iareo i mpiambegne i tempolỳ rey mba hangalake i apostoly rey am-pirizò agne. 22 Faie naho fa niavy tagne i mpiambegne rey, le tsy nitrea iareo tam-pirizò ao iareo. Niheregne areke iareo mba hitalily izay. 23 Hoe iareo: “Nizoe’ay nihily soa i pirizòy sady nitsangagne an-dalagne eo i mpiambegne rey. Faie naho fa nisokafe’ay i lalagney, le tsy nahatrea ndaty tao zahay.” 24 Naho fa naharey izay i lahibey i mpiambegne i tempolỳ naho ty lahibey o mpisorogneo, le sambe nivali-doha tie inogne ty ho voka izao. 25 Faie nisy ndaty niavy nitalily tamy iareo tie: “Ao ingo i ndaty ginadra’areo rey mitsangagne amy i tempolỳ ao sady mampianatse.” 26 Le nandeha nangalake i apostoly rey i lahibey ty mpiambegne i tempolỳ naho i mpiambegne i tempolỳ rey. Faie tinambetambe iareo avao i apostoly rey satria natahotse i vahoakey iareo tsy mone hotorahe iareo vato.
27 Nindese iareo areke i apostoly rey sady nampitsangane iareo tagnatreha i Fitsaragne Ambone Jiosỳ eo. Nagnontenea i mpisorombeỳ iareo 28 tie: “Tsy fa rinara’ay vao inareò tie ko mampianatse amy ze agnaragne zay sasa? Faie henhenke fineno’areo ty fampianara’areo ty Jerosalema. Nirehake ka nareo tie izahay ty tompon’andraikitse amy ty lio i lahilahy ignehoe.” 29 Le namale ty Petera naho i apostoly ila’e rey tie: “Andrianagnahare ty mpitondra anay, le ireke ro tsy maintsy ankatoave’ay fa tsy ndaty. 30 I Andrianagnahare ty razambeintikagney ty namelogne i Jesosy tamy ty mate, i vinono’areo sady nahanto’areo tamy ty boda-kataey. 31 Nimean’Andrianagnahare toeragne ambone t’ankavana’e eo reke, le natao’e Mpitarike Fara’e Lahibey naho Mpagnavotse mba hahafaha o Israelio hibebake naho hahazo famelan-keloke. 32 Le izahay naho i fagnahy masigney ty vavolombelo’e. Omean’Andrianagnahare ze magneke aze ho mpitondra o fagnahy masigne iohoe.”
33 Naho fa naharey izay iareo, le tena niboseke sady naina iareo, le avy le ho namono i apostoly rey. 34 Nisy Fariseo raike atao Gamaliela zay mpampianatse Lalàna sady nihajae i vahoakey. Nitsangagne tagnatreha i Fitsaragne Ambone Jiosỳ eo reke, le nampiakare’e tsielatsiela hey i apostoly rey. 35 Hoe reke naho fa niavy eo: “O ry lahilahy Israelita, mandineha soa hey nareo aloha ty hanoa’areo raha amo o ndaty reo! 36 Taloha zao ohatse ty Teodasy nihevetse ty vata’e ho tsy misy hoe’e, le nisy lahilahy 400 teo ho eo ty nanohagne aze. Faie naho fa nisy namono reke, le tsy fantatse tie nimbaia iaby i ndaty mpanohagne aze rey. 37 Tafara i Teodasy, le niavy ka ty Jodasy te Galelia tamy i fotoagne fisoratagne agnaragney, le nitarike ndaty mba hagnorike aze. Faie nimate ka reke, le tsy fantatse tie nimbaia iaby i ndaty mpanohagne aze rey. 38 Izao areke ty raha rehafeko ama’areo amo o raha misy zao: Ko idira’areo ty raha atao o ndaty reo fa engao’areo avao iareo. Ty anto’e, naho boake ama o ndaty o raha tea iareo hatao iohoe ndra o asa atao iareo io, le ho rava avao ka. 39 Fa naho boake aman’Agnahare, le tsy hovita’areo ty handrava aze. Tsy mone ndra ho inareo ka ro hanjare ho mpialy aman’Agnahare.” 40 Norihe iareo areke i soso-keve i Gamalielay, le nitokave iareo i apostoly rey. Nikaravasie iareo i apostoly rey, sady rinara iareo mafe mba tsy hirehake amy ty agnara i Jesosy sasa. Nenga iareo handeha i apostoly rey tafara izay.
41 Nifale iareo naho fa niala tagnatreha i Fitsaragne Ambone Jiosỳ eo satria natao fagneva ty ho afa-baraka noho ty agnara’e. 42 Le nampianatse naho nitory ty talily soa miomba i Kristy ndra i Jesosy avao iareo. Nanao izay isan’andro iareo ndra tamy i tempolỳ ao ndra isan-tragno.