Asa o Apostolio

7 Faie hoe i mpisorombeỳ: “Maregne iaby vao ze raha rezay?” 2 Hoe ty navale i Stefana: “O ry rahalahiko naho inareo raeko, mba janjigno’areo raho. Niseho tamy i Abrahama razambeintikagne i Andrianagnahare ty voninahitsey, tamy ireke ta Mezopotamia agney taloha ty nitoboha’e ta Harana agne. 3 Le hoe reke tama’e: ‘Mialà amo o tane’ò naho amo o longo’ò rehe, le mandehana amy ze tane hatoroko azo zay.’ 4 Le niala tamy ty tane o Kaldeanao eo reke, le nitoboke ta Harana agne. Tagne ty nimateza i baba’e. Tafara izay, le nampifindraen’Andrianagnahare amy ty tane misy anareo toy eto reke. 5 Faie tsy nimean’Andrianagnahare lova ndra kedekede amy ty tane toy eto reke, ndra tie hoe lia tomboke raike aza. Faie nampitamà aze ty Andrianagnahare tamy izay tie, homei’e aze naho ty tarana’e i taney, ie amy izao reke mbe tsy nanagne anake ndra raike tamy izay. 6 Nisaontsy tama’e ka ty Andrianagnahare tie, hiambahiny an-tane o ndaty agne ty tarana’e, sady hatao ty ndaty agne ndevo naho hampijaléjalé iareo agnate ty 400 taogne. 7 ‘Hotsaraegne o firenena hagnandevo iareo iohoe’, hoe ty Andrianagnahare, ‘le afara izay iareo hafahagne sady hanao fanompoagne masigne ho ahy amy ty toeragne toy eto.’

8 “Nanao fifagnekeagne tama’e miomba ty fanapahagne ajaja reke. Niterake i Isaka reke tafara izay, le nitapahe’e ty Isaka valo andro tafara ty niterahagne aze. I Isaka niterake i Jakoba, le i Jakoba niterake i 12 lahy loha ty keleiantika rey. 9 Nialogna i loha ty keleiantika rey ty Josefa, le navaro iareo tamo o Ejipsianao. Faie nagnampe aze ty Andrianagnahare, 10 le nagnavotse aze tamy ze fijaleagne nahazo aze. Nimea’e hilala tagnatreha i Farao mpanjaka i Ejipta eo reke sady natao’e ze hahavy i Farao hotea aze. Tinendre i Farao hiandraikitse i Ejipta naho ze an-tragno’e ao ka reke. 11 Faie nisy keré ty nagneneke i Ejipta naho i Kanana. Tena nimafe ze hakerégne zay, le tsy nahatrea raha hohanegne ndra raike i razambeintikagne rey. 12 Faie nirey i Jakoba tie nisy hanegne ty ta Ejipta agne, le nirahe’e tagne i razambeintikagne rey. 13 Tamy iareo nandeha tagne fagnindroe’ey vaho izay nampahafantare i Josefa i rahalahi’e rey tie ia reke. Nanjare nifanta i Farao areke i keleia i Josefa rey. 14 Nagnafatse i rahalahi’e rey ty Josefa mba hinday i Jakoba rae’e naho i keleia’e rey hiala i Kanana, le homba Ejipta mbeo. Dime amby fitompolo ty isa iareo iaby tie boake agne. 15 Nandeha ta Ejipta tagne ty Jakoba, le nimate tagne. Nimate ka i razambeintika rey. 16 Nentegne ta Sekema agne ty fate iareo, le nalevegne tamy i kibory nivilie i Abrahama tamy i ana-dahy i Hamora ta Sekema agney.

17 “Naho fa nihanarine ty fotoagne hahatanteraha i fampitamagne nisaontsien’Agnahare tamy i Abrahamay, le nitombo naho nihamaro i tarana i Jakoba ta Ejipta agne rey. 18 Nisy mpanjaka raike tsy nahafantatse i Josefa zay ninday i Ejipta tafara tatoy. 19 Nampiasa hafetsean-draty o mpanjaka iohoe, mba hanereagne i razambeintikagne rey hagnary ty ana iareo vaho aterake, amy izay tsy velogne. 20 Tamy ze fotoagne zay ty Mosesy ro naterake. Tena nisoasoa tagnatrehan’Agnahare eo reke. Tineza* tan-tragnon-drae’e ao tagnate ty telo volagne reke. 21 Faie naho fa nariagne reke, le nalae i anak’ampela i Faraoy sady tineza’e manahake ty ana’e. 22 Nahazo ty fampianaragne* fara’e soa nisy ta Ejipta agne areke ty Mosesy. Tena nisy heri’e lahibey ty raha nirehafe i Mosesy sady niambake ty raha nivita’e.

23 “Naho fa nifeno 40 taogne ty Mosesy, le nitiry tam-po’e ao ty fagniriagne* hitilike i rahalahi’e rey ndra ty tarana o Israelio. 24 Naho fa nitrea’e tie nampijalé ze Ejipsiana raike zay ty raike amy i rahalahi’e rey, le niaro aze reke. Vinono’e ka i Ejipsianay mba hamaleagne fate aze. 25 Ty anto’e, nieretseretse reke fa hotaka i rahalahi’e rey tie ireke ro hampiasaen’Agnahare mba hagnavotagne iareo, faie tsy nitaka iareo zay. 26 Nandeha tamy i rahalahi’e rey agne reke naho fa nihamaray igne, le nahatrea ty roe lahy amy iareo nialy. Nikezake nampilongo iareo reke, le rinara’e iareo sady hoe reke: ‘Mpirahalahy anio inareò! Nagnino nareo ro mialy hoe izao?’ 27 Faie natose i raike nijera i nama’eỳ ty Mosesy sady hoe reke: ‘Ia ty nanendre azo ho mpitondra naho ho mpitsara anay? 28 Sa tea’o hovonoegne manahake i Ejipsiana vinono’o omaley ka raho?’ 29 Naho fa naharey izay ty Mosesy, le nilay sady nitoboke tamy ty tane o Midianao agne. Niterake roe lahy reke tie tagne.

30 “Ie 40 taogne tafara izay, le nisy anjely niseho tama’e ty tagnate i lelan’afo tamy ze hatae misy fatipatike nirehetse tam-patrambey agne zay. Tamy i Vohy Sinay teo ty nisehoa izay. 31 Tena nigaga ty Mosesy naho fa nahatrea izay. Faie naho fa niharine mbeo reke mba handineke aze soa, le naharey ty fiaragnana i Jehovah nanao tihoe: 32 ‘Iraho i Andrianagnahare ty razambei’oy, le i Andrianagnahare i Abrahama naho i Isaka vaho i Jakobay.’ Le nihondrahondra ty Mosesy, hafarà’e reke tsy nahavany niharine mbeo mba handineke i rahay. 33 Hoe ty Jehovah tama’e: ‘Afaho i kapa’oy satria tane masigne o itsangana’o iohoe. 34 Hitako soa ty haorea o ndatiko a Ejipta agne reo, sady fa reiko ka ty fitaraigna iareo, le hizotso mbeo raho mba hagnavotse iareo. Izao areke, hiraheko a Ejipta agne rehe.’ 35 O Mosesy iohoe i niliere iareo sady nirehafe iareo tihoey tie: ‘Ia ty nanendre azo ho mpitondra naho ho mpitsara?’ Faie nirahen’Andrianagnahare reke mba hatao’e mpitondra naho ho mpagnavotse iareo, le tamy ty alala i anjely niseho tama’e tamy i hatae misy fatipatike nirehetsey ao ty nanoa’e izay. 36 Ireke ty ninday iareo hiala a Ejipta agne. Nanao famantaragne naho fahagagagne maro reke ta Ejipta agne, tamy i Riake Menay eo vaho tam-patrambey agne tagnate ty 40 taogne.

37 “O Mosesy iohoe ka, i nirehake tamy ty tarana o Israelio tihoey tie: ‘Hanendre mpaminany manahake ahy ho anareo boake amo o rahalahi’areò eo ty Andrianagnahare.’ 38 Niarake tamy i fiangonagney teo reke tamy iareo tam-patrambey agney. Teo ka reke tamy i anjelỳ nirehake tama’e naho tama o razambeintikagneo tamy i Vohy Sinay teoy. Teo ty nandrambesa’e i Saontsin’Agnahare velogne nimea’e antikagney. 39 Faie tsy nimete nankatò aze i razambeintikagne rey, fa namibike aze sady nite hiheregne ta Ejipta agne iareo, 40 le nirehake tamy i Arona tie: ‘Mamboara andrianagnahare mba handeha alohantikagne eo, fa tsy fantatse ty raha nanjò i Mosesy, i nitarike antikagne niala boake a Ejipta agney.’ 41 Namboatse sare sarake areke iareo tamy izay, le nanolotse sorogne hoahy o sampy iohoe sady nifalefale tamy i raha namboare ty tagna iareoy eo. 42 Niala tamy iareo areke ty Andrianagnahare, le nenga’e iareo hanao fanompoagne masigne hoahy ze raha amy i lagnitsey ey, satria izao ty voasoratse amy ty boke o Mpaminanio ao tie: ‘O ry Israely, tsy raha izaho anio i nanolora’areo sorogne tam-patrambey agne tagnate ty 40 taogney! 43 Tsy raha izaho ty nanolora’areo igne fa ty tragnolay i Moloka naho ty vasia i andrianagnahare atao tihoe Refana nindese’areoy. Tsy ino zay fa i sare i andrianagnahare namboare’areo mba hivavaha’areo rey. Hataoko sese-tane a Babilona agne areke nareo.’

44 “Nanagne ty tragnolay ty vavolombelogne o razambeintika reo tam-patrambey agne. Nampamboaren’Agnahare i Mosesy mitovy amy i modely natoro’e azey o tragnolay iohoe. 45 Nilovà ty tarana i razambeintika rey o tragnolay iohoe, le nente iareo reketse i Josoa, tamy ty tane o ndaty boake amy ty firenena hafa niroahen’Andrianagnahare tsy ho agnatreha o razantikagneo eò. Le teo avao i tragnolaỳ, amparake ty niavia ty andro i Davida. 46 Tena nitea aze ty Andrianagnahare, hafarà’e reke nangatake tama’e, mba homea’e tombotsoa hagnoregne anjomba hoahy i Andrianagnahare i Jakobay. 47 Faie i Solomona ro nagnoregne anjomba ho aze. 48 Faie tsy miambesatse amy ty anjomba namboaregne tagnagne i Fara’e Amboney, satria nirehake o mpaminanio tie: 49 ‘I lagnitsey ty sezan-droandriako, le i taney ty fisiako tomboke. Tragno manao akore areke ro hamboare’areo ho ahike?, hoe ty Jehovah. Ndra toeragne manao akore ro hitofàtofàko? 50 Tsy ty tagnako vao ty nanao o raha rehoe iaby?’

51 “O ty lahilahy mafe loha naho tsy mitapake ty fo’e naho ty sofi’e retoa! Lava manohetse i fagnahy masigney avao nareo manahake ty natao o razambei’areò ka. 52 Ia ty mpaminany tsy nenjehe o razambei’areò? Vinono iareo aza ze nagnambara tie ho avy i maregney. Nanjare mpifotetse naho mpamono aze ka nareo hinane zao, 53 ie amy izao nareo nahazo i Lalàna nimeigne tamy ty alala ty anjelỳ, faie tsy norihe’areo.”

54 Tena niboseke tama’e iareo naho fa naharey izay, le nampikodri-nife. 55 Faie nifeno fagnahy masigne reke sady nagnente i lagnitsey, le nahatrea ty voninahin’Andrianagnahare naho i Jesosy nitsangagne t’ankavan’Andrianagnahare eo. 56 Sady hoe reke: “Treako i lagnitsey nisokake naho i Ana o ndatỳ nitsangagne tan-kavanan’Andrianagnahare eo.” 57 Naho fa naharey izay iareo, le nikorakorake mafe sady nitapena iareo ty sofy iareo, le nifandrombogna iareo reke. 58 Nindese iareo ivela i tanàgney agne reke naho fa niavy eo, le nitorahe iareo vato. Natao i vavolombelogne rey tan-tombo ze ajalahy atao tihoe Saoly zay eo i akanjo iareo ivela’ey. 59 Tamy i Stefana nitorahe iareo vatoy, le nangatake hoe izao: “O Jesosy Tompo, rambeso ty fiaiko.” 60 Nitongaleke reke naho fa niavy eo sady nitoka mafe tihoe: “O Jehovah, ko melohegne noho ze o fahotà iareo zao iareo.” Nimate reke naho fa boake nirehake izay.