Asa o Apostolio

10 Nisy lahilahy raike tokavegne tihoe Kornelio zay ty ta Kaisaria agne. Manam-boninahitse tamy i antoko maramila italianay ao reke. 2 Mpivavake bey naho natahotse an’Agnahare reke naho ze ndaty nitoboke tan-tragno’e ao. Nagnomey fagnomezagne maro mba hiferegnesagne o ndaty mahantrao ka reke, sady nihalale lognandro taman’Agnahare. 3 Ie tamy ty lera fahasive teo ho eo,* le nahatrea fahitagne mazava soa reke. Nitrea’e tao tie nisy anjelin’Agnahare niavy ama’e eo sady nirehake tihoe: “O Kornelio!” 4 Nagnente aze soa ty Kornelio sady tena natahotse avao ka, le hoe ty ontane’e aze: “Inogne ze raha ipalia’o ahy zay Tompo?” Hoe i anjelỳ tama’e: “Fa nijanjignen’Agnahare i vavake natao’o rey, sady oni’e soa ka i fiferegnesa’o o ndaty mahantrao rey, le tsy haligno’e rey. 5 Izao areke, magniraha ndaty ho a Jopa agne rehe mba hangalake ze lahilahy atao tihoe Simona zay, i tokavegne tihoe Peteray. 6 Miambahiny amy i Simona mpamboatse holitse ao reke. A moron-driake ey ty misy ty tragno o Simona iohoe.” 7 Naho vaho nandeha i anjely nirehake tamy i Kornelioy, le nitoka roe lahy tamy i mpanompo’e rey naho ze maramila’e mpivavake bey zay reke. Sambe manompo i Kornelio iareo iaby. 8 Nitantarae’e tamy iareo ze kila raha, le nirahe’e ho a Jopa agne iareo.

9 Ie nihamaray igne, tamy iareo mbe tan-dalagney sady fa nihanarine i tanàgneỳ, le nanganike tambone tragno agne ty Petera tamy ty lera fahaenegne teo ho eo* mba hivavake. 10 Faie tena nikeré reke, le nite hihinagne. Tamy i hanegney mbe nikarakaraegney, le nahatrea fahitagne ty Petera. 11 Nitrea’e nisokake i lagnitsey, le nisy raha hoe lamba rongony bey zay ty nizotso boake agne. Tamy i zoro’e efatse rey ty nanjotsoagne i lambay mban-tane etoy. 12 Nisy biby sambe karaza’e ty tagnate’e tao. Tao ty biby efatse ty tombo’e, tao ty biby milaly naho ty vorogne mitiligne. 13 Nisy feo nirehake tama’e naho fa niavy eo tie: “Mitsangana rehe Petera, le vonò reo sady hano!” 14 Faie hoe ty Petera: “Sagnatria Tompo, iraho mbe liako naho nihinagne raha maloto ndra tsy malio.” 15 Le hoe indraike i feoy tama’e: “Ko atao’o tihoe maloto ze raha fa nilioven’Agnahare.” 16 Nirei’e intelo ze feo zay. Ie tafara izay, le avy le nakaregne an-dagnitse agne i raha nitrea’ey.

17 Tamy i Petera mbe nivali-doha miomba ty va’e ho dika i fahitagne nitrea’eỳ, le fa nitsangagne am-bavahady eo i lahilahy nirahe i Kornelio rey naho fa boake nagnontane ty tragno misy i Simona. 18 Nitoka iareo sady nagnontane tie, mivantagne amy iareo ao vao ty Simona, i tokavegne tihoe Peteray. 19 Tamy i Petera mbe nandineke i fahitagneỳ, le hoe i fagnahỳ tama’e: “Misy lahilahy telo rezay ty ao mipay azo. 20 Mitsangana areke rehe, le mizotsoa sady miaraha amy iareo. Ao ka rehe tsy hisalasala fa iraho o nagnirake iareò.” 21 Nizotso areke ty Petera, le hoe reke tamy i lahilahy rey: “Iraho o ndaty paliae’areo zao. Inogne o raha ipalia’areo ahio?” 22 Hoe iareo: “Ze maramila manam-boninahitse tokavegne tihoe Kornelio zay o nagnirake anay io. Ndaty maregne naho matahotse an’Agnahare reke sady soa laza amy ty firene o Jiosio eo iaby. Nisy anjely masigne nirahen’Agnahare zay nirehake tama’e hampangalake azo ho an-tragno ama’e agne mba hitsanogne ty raha rehafe’o.” 23 Nampandrosoe i Petera areke iareo, le niambahiny tama’e tao ka.

Ie nihamaray igne, le niomagne ty Petera sady nandeha niarake tamy iareo naho fa niavy eo. Nisy rahalahy boake a Jopa ao ka niarake tama’e. 24 Ie nihamaray igne ka, le niavy ta Kaisaria agne reke. Fa nandindigne iareo avao ty Kornelio tamy izay sady fa navori’e iaby ty longo’e naho ze ragne’e maifitse aze. 25 Naho fa nizilike ty Petera, le nanalaka aze ty Kornelio. Nanongaleke naho niankohoke tan-tombo i Petera eo reke. 26 Faie natroa i Petera reke sady hoe reke: “Mitsangana, fa ndaty manahake azo avao ka raho.” 27 Sady nirehake tama’e ty Petera ro nizilike tan-tragno ao, le aheo’e naho feno ndaty ty ao. 28 Hoe reke tamy iareo: “Hai’areo soa fa tsy azo o Jiosio atao ty mifagnosehose amo o ndaty boake amy ty firenena hafao naho ty miharine iareo. Faie natoron’Andrianagnahare ahy fa tsy toko’e hitoka o ndatio tihoe maloto ndra tsy malio raho. 29 Tsy mba nandietse areke raho naho fa nampangalaegne fa le niavy. Izao areke, ino ty anto’e nampangala’areo ahy?”

30 Le hoe ty Kornelio: “Efatse andro androany zay raho ro nivavake tan-tragnoko ao tamy ty lera fahasive* hoe izao. Le nisy lahilahy raike nagnisy akanjo namilepiletse zay nitsangagne talohako eo, 31 sady hoe reke: ‘O Kornelio, fa nijanjignen’Agnahare ty vavake natao’o sady oni’e soa ka i fiferegnesa’o o mahantraoy, le tsy haligno’e. 32 Magniraha ndaty ho a Jopa agne areke rehe mba hangalake i Simona, i tokavegne tihoe Peteray. Miambahiny an-tragno i Simona ao reke, i mpamboatse holitse mitoboke a moron-driake eoy.’ 33 Le avy le nagnirake ndaty areke raho mba hangalake azo, le tena soa rehe fa niavy. Vory agnatrehan’Agnahare eto zahay iaby tandroany mba hitsanogne ty raha nandilia i Jehovah azo horehafe’o ama’ay.”

34 Le nirehake indraike ty Petera tie: “Takako soa hinane zao fa tsy mifily volo ty Andrianagnahare. 35 Fa ze ndaty matahotse aze naho manao ty maregne ro tea’e ndra inogn’ino firenena niavia’e. 36 Nandefa hafatse tamy ty tarana o Israelio ty Andrianagnahare tie toko’e hambara amy iareo i talily soa tihoey, afake milongo aman’Andrianagnahare amy ty alala i Jesosy Kristy, i Tompo ze kila rahay iareo. 37 Hai’areo soa fa tafara ty nitoria i Jaona miomba i badisa’ey, le tsy nirehake raha hafa ty ndaty magneneke i Jodia, manomboke a Galelia agne 38 naho tsy i Jesosy te Nazareta avao. Nihosoran’Agnahare tamy ty fagnahi’e masigne reke sady nimea’e hery, le nandeha nagneneke i taney mba hanao asa soa naho hagnasitragne ze nampijalé i Devoly, satria nagnampe aze ty Andrianagnahare. 39 Le izahay ty vavolombelo ty raha natao’e iaby tamy ty tane o Jiosio agne naho a Jerosalema agne. Faie nivonoe iareo reke, le nahanto iareo tamy ty boda-katae. 40 Faie nivelomen’Agnahare indraike reke tamy ty andro fahatelo, le nenga’e hiseho amo o ndatio. 41 Faie tsy tamy ty ndaty iaby, fa ze vavolombelogne tinendren’Agnahare avao, le tsy ia zay fa izahay. Niarake nihinagne naho ninogne tama’e zahay tafara i namelomagne aze tamy ty matey. 42 Nandily anay ka reke mba hitory amo o ndatio naho hagnazava soa amy iareo tie ireke ty tinendren’Andrianagnahare ho mpitsara ty velogne naho ty mate. 43 Ireke o nambara o mpaminanio iaby tihoey tie, ze mino aze, le hahazo famelan-keloke amy ty agnara’e.”

44 Tamy i Petera nirehake tamy iareo ze raha rezaỳ, le nipoke tamy ze ndaty nitsanogne ty saontsin’Agnahare teo i fagnahy masigney. 45 Le nigaga i mpino fa nitapake niarake tamy i Petera rey satria nahazo i fagnomezagne maimaim-poagney ndra i fagnahy masigney ka o ndaty boake amy ty firenena hafao. 46 Nirey iareo nirehake tamy ty firehake sambe hafa naho nidera an’Agnahare iareo. Hoe ty navale i Petera iareo naho fa niavy eo: 47 “Nahazo i fagnahy masigney manahake antikagne ka ty ndaty retoa. Ia areke ty ndaty ho afake hikalagne iareo tsy hatao badisa agnate rano?” 48 Le avy le nampanoe i Petera badisa amy ty agnara i Jesosy Kristy areke iareo tamy izay. Nangatahe iareo hijanogne tamy iareo tagne tagnate ty andro tsiampeampe ka ty Petera.