Hoahy o Romanao
9 Mpanonjohy ty lia i Kristy raho, le mirehake ty maregne fa tsy mavande sady ty feo ty fieretseretako tarihe i fagnahy masigney ty vavolombelogne 2 tie tena malahelo naho ore mafe avao raho am-poko ato. 3 Ndra aleoko iraho ro nisarahegne amy i Kristy naho nozognegne mba hahasoa o rahalahiko reo, ndra o longoko arake ty nofotseo, 4 tsy ia zay fa o Israelitao. Natsangan’Andrianagnahare ho ana’e iareo, le nimea’e voninahitse, nanoa’e fifagnekeagne, nimea’e Lalàna naho tombotsoa hanao fanompoagne masigne ho aze vaho fampitamagne. 5 Tarana i razambeintikagney iareo, le tarana iareo ty Kristy naho arake ty nofotse. Hoderaegne nainai’e abey ty Andrianagnahare, i ambone ze kila rahay! Amena.
6 Faie tsy ombia tsy hotanterake ty saontsin’Andrianagnahare. Tsy ze taranake iaby boake amy i Israely ro tena “Israely”, 7 sady tsy iareo iaby ro agnisa i taranakey, ndra tie tarana i Abrahama aza. Ty anto’e, izao ty voasoratse: “Boake amy i Isaka ty hiavia i hatao tihoe tarana’oy.” 8 Trea boake amy izay, fa tsy ze ana ty nofotse ro tena anan’Agnahare, fa ze ana i fampitamagney ro tena agnisa i taranakey. 9 Ty anto’e, izao i fampitamagney: “Hiheregne raho tao’e raike afara izao, le fa hanagne ana-dahy ty Saraha amy izay.” 10 Faie tsy tamy izay avao, fa nisy fampitamagne ka naho fa nivesatse ty Rebeka, i niterake hambagne tamy i Isaka razambeintikagney. 11 Tamy i hambagne rey mbe tsy naterake sady mbe tsy nanao ty soa ndra ty ratỳ, le natoron’Agnahare tie ty fomba fijobogna’e, le tsy miankigne amy ty raha atao fa miankigne amy ze jobogne ie mikanjy. 12 Izao ty nisaontsie’e tamy i Rebeka: “I zoke’ey ty hanompo i zai’ey.” 13 Mifagnarake amy ty raha voasoratse toy zay: “Niteako ty Jakoba, fa i Esao nihejeko.”
14 Hirehake vao areke tika tie, manao ty tsy rare’e ty Andrianagnahare? Sagnatria zay! 15 Ty anto’e, izao ty nisaontsie’e tamy i Mosesy: “Hamindra fo amy ze teako hamindragne fo raho, le hiferegnesako ze teako hiferegnesagne.” 16 Tsy miankigne amy ty fagniria ty ndaty raike ndra ty kezake atao’e areke ze raha zay, fa miankigne aman’Agnahare, i mpamindra fo oy. 17 Ty anto’e, izao ty rehafe ty Soratse Masigne miomba i Farao: “Izao ty anto’e mbe agnengako azo ho velogne: Ty hanehoako ty heriko ama’o naho mba hagnambaragne ty agnarako magneran-tane.” 18 Ze tean’Andrianagnahare hamindragne fo areke ro amindra’e fo, faie enga’e ho mafe loha ze tea’e ho mafe loha.
19 Va’e hirehake amako rehe tie: “Nagnino ro mea’e tsiny ze vazoho’e manao raha tsy mete? Ia moa ty hahavita hanohetse ze tea’e hatao?” 20 Fa ia rehe ro hagnakiagne* an’Agnahare? I raha bokobokoegney vao, le hirehake amy i ndaty mampibokoboko azey tie: “Nagnino raho ro natao’o hoe izao?” 21 O ndaty mpamboatse fanake boake amy ty tane lietseo vao tsy managne fahefagne amy i fanake amboare’e rey? Ty ila’e atao’e fanake ampiasaegne amy ty fotoagne miambake, fa ty ila’e ampiasaegne isan’andro. 22 Akore ka areke ty aman’Agnahare naho te haneho ty havignera’e sady te haneho ty heri’e reke, faie ndra nandefetse naho naneho faharetagne amy i fanake ivignera’e sady fagneva ty hozamanegne rey? 23 Nanao izay reke mba hanehoagne ty voninahi’e amy ze fanake ty famindram-po, i niomane’e mialoha mba homeagne voninahitse rey. 24 Tsy ia zay fa itika tinoka’eo, faie tsy boake amo o Jiosio avao fa boake amo o firenena hafao ka. 25 Satria izao ka ty nisaontsie’e amy ty boke i Hosea ao: “Hotokaveko tihoe ‘vahoako’ o ndaty tsy vahoakò, le horehafeko tihoe ‘teako’, i tsy teakoy. 26 Amy i toeragne nirehafako tamy iareo tihoey tie: ‘Tsy vahoako nareo’, ro hitokavagne iareo tie: ‘Ana i Andrianagnahare velogney.’”
27 Tsy izay avao, fa nirehake mafe hoe izao miomba o Israelio ty Isaia: “Ndra tie manahake o faseke an-driake eio aza ty isa ty ana i Israely, le ty sisa’e amy iareo avao ro ho voavonje. 28 Satria fa hitsara ty tane toy ty Jehovah sady fa tsy ho ela ze fitsara’e zay.” 29 Izao ka ty fa nirehafe i Isaia mialoha: “Naho tsy i Jehovah Tompo ty tafike ro nagnenga ty ila’e amy ty taranantika hovelogne, le fa ho nanahake i Sodoma tikagne sady fa ho nanahake i Gomora ka.”
30 Ino areke ty horehafentikagne? Ndra tie tsy nikezake ho ndaty maregne aza o ndaty boake amy ty firenena hafao, le nambara ho maregne iareo tamy ty alala ty finoagne. 31 Fa o Israelio, ndra tie nikezake nagnorike i lalà ty hamaregnagney aza, le tsy nahavita nagnorike ze lalàna zay. 32 Fa nagnino? Satria ndra tie nikezake nagnorike irey iareo, le tsy nanao izay tamy ty alala ty finoagne fa tamy ty raha natao. Nivoafingagne areke iareo noho i “vato mamingagney.” 33 Izao ty voasoratse: “Mametrake vato mamingagne naho lamilamy manonta a Ziona ao raho. Faie tsy ho diso tama ze mino io.”