Hoahy o Romanao
10 Ry rahalahy, ty tena fagniria ty foko naho ty raha ihalaleako aman’Agnahare, le ty hahavoavonje iareo. 2 Iraho ty vavolombelogne tie mafana fo ho an’Agnahare iareo, faie tsy mifagnarake amy ty fahalalagne maregne soa. 3 Tsy hay iareo ty hamaregnan’Agnahare, le namorogne fitsipike hoahy iareo manokagne iareo. Tsy nagneke hagnorike i hamaregnan’Agnaharey areke iareo. 4 I Kristy ty fara i Lalànay, amy izay ze ndaty iaby maneho finoagne ro hambara ho maregne.
5 Ty anto’e, izao ty nisorate i Mosesy miomba ty ndaty maregne noho i Lalànay: “Ze ndaty mankatò irey, le hovelogne amy ty alala irey.” 6 Fa naho ty ndaty maregne noho ty finoagne, le izao ty voasoratse: “Ko mirehake am-po’areo ao tie: ‘Ia ty hiakatse an-dagnitse agne?’ Ty dika izay, mba hampizotso i Kristy, 7 ndra ka: ‘Ia ty hizotso amy i lavake tsikeokeokey agne?’ Ty dika izay, mba hamelogne i Kristy amy ty mate.” 8 Faie ino ty rehafe’e? “Ambava’o eo naho am-po’o ao i rehakey fa tsy lavitse azo.” Tsy ino zay fa “i reha” ty finoagne torie’aỳ. 9 Ho voavonje nareo naho magnambara agnatreha o ndaty maro eo tie, i Jesosy ro Tompo sady naho mino am-po’areo ao ka fa nivelomen’Agnahare amy ty mate reke. 10 Ty anto’e, ze maneho finoagne vokatse ty fo ro hanjare ndaty maregne, fa ze manao fagnambaragne agnatreha o ndaty maro eo ro ho voavonje.
11 Ty anto’e, hoe ty Soratse Masigne: “Tsy hisy ho diso tama ze mino aze.” 12 Tsy misy maha sambe hafa o Jiosio naho o Grikeo. Raike avao ty Tompo ambone iareo iaby, tsy ia zay fa i matarike amy ze mitoka azey. 13 Ty anto’e, “ze mitoka ty tahina i Jehovah ro ho voavonje.” 14 Faie akore ty hitokava iareo aze naho tsy inoa iareo reke? Akore ty hinoa iareo aze naho tsy naharey ty miomba aze iareo? Akore ka ty hahareiza iareo aze naho tsy misy ndaty mitory amy iareo? 15 Ia ty hitory amy iareo naho tsy nisy nagnirake? Fa voasoratse tie: “Soasoa ty tombo ze magnambara i talily soa miomba ty raha fanjakay!”
16 Faie tsy iareo iaby ty nagnorike i talily soay. Ty anto’e, hoe ty Isaia: “O Jehovah, ia ty nino ty raha nirey iareo boake ama’ay?” 17 Ty finoagne areke, le boake amy ty raha rey. Ty raha rey, le boake amy ty rehake miomba i Kristy. 18 Faie hoe ty ontaneko: A kera tsy naharey iareo? Faie naho ty maregne anio, le “fa niparitake magneran-tane ty feo iareo sady fa niavy hatrake amy ty fara ty tane toy agne ty hafatse nindese iareo.” 19 Le hoe indraike ty ontaneko: A kera tsy nahafantatse o Israelio? Hoe ty Mosesy: “Hataoko ze hahavy anareo hialogne ze tsy firenena; hataoko ze hahavy anareo ho boseke amo o firenena gegeo.” 20 Faie tena naneho herim-po ty Isaia ty nirehake tie: “Ze tsy nipay ahy ro nahatrea ahy, le ze tsy nitoka ahy ro nanjare nahafantatse ahy.” 21 Faie izao ty nirehafe’e miomba o Israelio: “Namelatse ty tagnako marain-tsy hariva tamy ty ndaty tsy mankatò naho mafe loha retoagne avao raho.”