Hoahy o Romanao

13 Mila magneke o manam-pahefagneo ty ndaty iaby, satria boake aman’Agnahare o fahefagneo. Andrianagnahare ty nagnenga o manam-pahefagneo ho amy ty toera iareo eo iaby. 2 Ze manohetse o fahefagneo areke, le manohetse ty lamigne napetran’Agnahare. Ze manohetse ze lamigne zay, le mipay fagnamelohagne amy ty vata’e. 3 Ty anto’e, tsy atahora ze manao ty soa o manam-pahefagneo, fa ze manao raha raty ro matahotse iareo. Tea’o vao ty tsy hatahotse o manam-pahefagneo? Manoa ty soa lognandro areke, amy izay iareo hidera azo. 4 Ty anto’e, mpanompon’Agnahare natao mba hahasoa azo iareo. Faie naho manao raty rehe, le matahora iareo, satria misy anto’e iareo kanao minday mesa. Mpanompon’Agnahare iareo sady magnasaze ze manao raha raty.

5 Misy anto’e soa areke mahavy anareo toko’e hankatò o manam-pahefagneo. Tsy tihoe mba tsy hahavoasaze anareo avao, fa noho ty feo ty fieretsereta’areo ka. 6 Izay ka ty anto’e mahavy anareo mandoa hetra, satria mpanompon’Andrianagnahare miasa hoahy o vahoakeo iareo sady manao ze asa zay avao. 7 Aloavo’areo amy iareo iaby areke ze raha toko’e haloa amy iareo: Hetra hoahy ze mitake hetra; haga hoahy ze mitake haga; tahotse hoahy ze toko’e hatahoragne; haja hoahy ze toko’e hohajaegne.

8 Ko engagne hisy trosa o ndaty ty ama’areo, ankoatse ty fifankateava’areo. Ze tea ty nama’e, le magnatanterake i lalànay. 9 Ty anto’e, ty lalàna voasoratse retoa: “Ko magnitsakitsa-baly, ko mamono ndaty, ko mangalatse, ko magniry mafe fanagna o ndaty”, naho ty lily hafa amy i lalànay ao, le fintigne ty lily raike toy: “Teavo manahake ty vata’o ty nama’o.” 10 Ze managne hatea, le tsy hanao raha raty amy ty nama’e; magnatanterake i lalànay areke ze maneho hatea.

11 Anò’areo zay satria fa hai’areo ze o fotoagne iaignantika zao. Fa lera toko’e fa hifohaza’areo amy ty roro’areo zao, satria ty fagnavotagne antika, le tena fa marine naho oharegne amy i fotoagne tamy itika nanjare mpinoy. 12 Fa ho tapetse i halegney, le fa ho maraindray i androy. Andao areke hialantika ze raha fatao o ndatio amy i iegney ao, le andao hiakanjoantika i fitaovam-pialia ty mazavay. 13 Andao ka tika hikezake ho soa findesam-batagne avao manahake ty atao o ndatio amo o andro mazavao, le tsy hanao fete feno filibagne, tsy ho mamo, tsy hijangajanga, tsy hanao findesam-batagne tsisy hegnatse, tsy hifanointoigne naho tsy hialogne. 14 Fa iakanjò ty toetse i Jesosy Kristy Tompo, le ko manao raha mba hagnomezagne fahafaham-po ty fagniria ty nofotse.