Hoahy o Romanao
15 Faie ho antika ze matanjake, le mila miaretse ty fahalemea ze tsy matanjake, sady tsy hanao ze raha mampifale ty vatantikagne avao. 2 Andao tika tsikiraidraike hanao ze raha mampifale ty nama’e mba hahasoa aze naho hampaherezagne aze. 3 Ty anto’e, ndra i Kristy aza tsy nanao ze raha nampifale ty vata’e avao, satria voasoratse tie: “Ze raha rehafegne mba hanivetiveagne azo, le mihatse amako.” 4 Ty anto’e, ze raha iaby voasoratse taloha, le nisorategne mba hampianaragne antika, amy izay tika hanan-draha tamaegne amy ty alala ty fiaretantikagne naho ty fampionognagne boake amy ty Soratse Masigne. 5 Lonike abey i Andrianagnahare magnampe anareo hiaretse sady magnomey fampionognagney mba hagnomey anareo toe-tsaigne mitovy amy ty nanagna i Kristy Jesosy. 6 Amy izay nareo hiharo saigne sady amy ty feo raike ty hagnomeza’areo voninahitse an’Andrianagnahare, i Rae i Jesosy Kristy Tompontikagney.
7 Rambeso soa areke ty hafa, manahake ty nandrambesa i Kristy anareo soa. Hagnomey voninahitse an’Agnahare ty fanoagne izay. 8 Rehafeko ama’areo, fa nanjare mpanompo o ndaty mitapakeo ty Kristy mba hanoroagne tie, maregne ty raha saontsien’Agnahare sady hagnaporofoagne fa azo atokisagne ty raha nampitamae’e i razambey iareo rey. 9 Amy izay ka hagnomey voninahitse an’Agnahare o firenenao noho ireke mamindra fo. Fa voasoratse tie: “Izay ty mahavy ahy hagneke azo agnatreha o firenenao eo sady hihira fideragne hoahy ty tahina’o.” 10 Hoe indraike reke: “Mifalea miarake amo o vahoa’eo nareo ry firenena.” 11 Hoe indraike ka reke: “Derao ty Jehovah ry firenena iaby sady lonike ty ndaty iaby hidera aze.” 12 Hoe ka ty Isaia: “Hisy vaha i Jese hitsangagne, le hinday o firenenao iaby sady ireke ty hotamae o firenenao.” 13 Lonike abey i Andrianagnahare magnomey fanantenagney mba hameno fifaleagne naho fiadagnagne anareo, satria nareo matoky aze! Amy izay vao mainke hihamafe ty fanantena’areo noho ty hery i fagnahy masigney.
14 Tena rese lahatse raho ry rahalahy, fa feno hasoa toetse ka nareo, sady feno fahalalagne, le afake mifagnitsy.* 15 Faie tsy niolakolake raho naho fa nanoratse tama’areo miomba ty raha ila’e mba haniahiagne anareo indraike, noho ty hasoa fagnahy miambake nasehon’Agnahare tamako. 16 Nanendre ahy ka reke mba ho mpanompo i Kristy Jesosy amo o ndaty boake amy ty firenena hafao. Manao asa masigne miomba i talily soan’Agnaharey raho, amy izay o firenena hafao hanjare ho fagnatetse ankasitrahagne, sady hamasignegne amy ty alala i fagnahy masigney.
17 Mahafale ahy tihoe mpiana i Kristy Jesosy naho ty manao ty asan’Agnahare. 18 Tsy hirehake raha hafa raho ankoatse ty raha natao i Kristy tamy ty alalako, mba hagnampeagne o ndaty boake amy ty firenena hafao hankatò noho ty raha nirehafeko naho nataoko. 19 Nankatò iareo noho ty hery ty famantaragne naho ty asa mahagaga natao tamy ty alala ty hery ty fagnahin’Agnahare. Vitako soa areke ty nitory ty talily soa miomba i Kristy, boake a Jerosalema agne naho tamy ty magnodidigne hatrake a Ilirikiona agne. 20 Ty tanjoko tamy izay, le tsy ty hagnambara i talily soay amy ty tanàgne fa nampahafantaregne ty agnara i Kristy, amy izay raho tsy hagnoregne ambone ty fototse fa natao o ndaty hafa. 21 Ty anto’e, voasoratse tie: “Ze mbe tsy nitaliliagne ty miomba aze ro hahatrea aze, le ze mbe tsy naharey ty miomba aze ro hahafantatse aze.”
22 Izay ka ty nahavy ahy lava nivoasakagne avao, le tsy niavy ama’areo agne. 23 Faie amy izao, le fa nitoriako iaby ty faritane amy i faritse rey sady fa tagnate ty taogne maro ka raho ro nite handeha ama’areo agne. 24 Naho fa handeha a Espaigne agne areke raho, le mitama fa hahatrea anareo sady hatetere’areo naho fa boake niarake tama’areo kedekede heike. 25 Faie fa an-dalagne ho a Jerosalema agne raho hinane zao, mba hanompo o ndaty masigneo. 26 Ty anto’e, nahafale ty rahalahy ta Makedonia naho a Akaia agne ty nizara ty raha nanagna iareo mba hagnampeagne o ndaty masigne mahantra a Jerosalema agneo. 27 Maregne fa nahafale iareo ty nanao izay, faie trosa toko’e haloa iareo amo o ndaty masigneo ka zay. Ty anto’e, nizara raha ara-pagnahy tamo o firenena hafao o ndaty masigneo, le adidy iareo ka ty mikarakara o ndaty masigneo amy ty lafi’e ara-nofo. 28 Naho fa vitako atetse agne sady voarae iareo ze fagnomezagne zay, le handeha a Espaigne agne raho, le hahatrea anareo amy iraho an-dalagne hombeoy. 29 Fantako fa naho fa avy ama’areo agne raho, le hinday fitahiagne maro boake amy i Kristy.
30 Mandrisike anareo raho ry rahalahy, amy ty alala i Jesosy Kristy Tompontikagne naho ty hatea boake amy i fagnahy masigney, mba hivavake mafe ho ahy aman’Agnahare nareo manahake ty fa ataoko. 31 Mivavaha nareo mba hafahagne amo o ndaty tsy mpino a Jodia agneo raho sady mba hankasitraha o ndaty masigne a Jerosalema agneo ty fanompoagne ataoko hoahy iareo. 32 Naho zoton’arofon’Agnahare, le ho avy ama’areo agne am-pifaleagne raho amy izay sambe hovelombolo tika. 33 Ho ama’areo iaby abey i Andrianagnahare magnomey fiadagnagney! Amena.