Taratasy Faharoe Hoahy o Korintianao

2 Nanapa-kevetse areke raho, fa tsy hampalahelo anareo amy ty fitilihako anareo magnarake. 2 Naho manao ze hampalahelo anareo raho, ia moa ty hampifale ahy naho tsy i nampalahelovekoy avao? 3 Nanoratse ze raha zay raho, amy izay tsy hampalahelo ahy ze toko’e hampifaleko, naho fa avy raho. Satria matoky raho, fa ty raha mahafale ahy, le mahafale anareo iaby ka. 4 Naho fa nanoratse tama’areo raho, le niore naho nalahelo mafe ty foko sady nitagny raho. Faie tsy tihoe mba hampalahelo anareo ka, fa mba hampahafantarako anareo tie, tena teako vata’e nareo.

5 Naho nisy ndaty nanao raha nampalahelo ty hafa, le tsy iraho avao o nampalahelove’eo, fa le fa ho inareo iaby. Faie ndra izay aza, le tsy te hampiasa rehake mafe raho. 6 Fa ampe i fagnanaragne mafe nimea ty ankamaroa’areo i ndatỳ. 7 Toko’e hamela aze amy ty fo’areo naho hampionogne aze nareo, amy izay reke tsy hamoe fo noho ireke malahelo loatse. 8 Mandrisike anareo areke raho, mba hampiseho ty hatea’areo aze. 9 Nanoratse tama’areo ka raho mba hahatreavako porofo tie, mankatò amy ze kila raha nareo. 10 Naho misy ndaty avela’areo ty helo’e, ndra inogn’ino raha tsy mete natao’e, le mamela aze ka raho. Naho ty maregne, naho fa iraho namela heloke, (ndra inogn’ino heloke navelako) le nataoko zay mba hahasoa anareo sady vavolombelo izay ty Kristy. 11 Amy izay tika tsy ho voafita i Satana, satria haintika ty fomba fiasa’e.*

12 Naho fa niavy ta Troasy agne raho mba hitory ty talily soa miomba i Kristy, satria nisy lalagne nisokafegne ho ahy mba hanoako ty asa i Tompo, 13 le tsy nilamigne ty saiko. Ty anto’e, tsy nitreako ty Titosy rahalahiko. Nanao veloma iareo areke raho, le nandeha ho a Makedonia atoy.

14 Faie isaoragne ty Andrianagnahare, i mitarike antika lognandro mpanonjohy ty lia i Kristy, manahake o maramila boake nandreseo, sady mampiparitake ty hagny ty fahalalagne miomba aze mbeombeo, amy ty alalantikagne. 15 Aman’Andrianagnahare, le hagny i Kristy tikagne amy ze ho voavonje naho amy ze hozamagne. 16 Amy ze hozamagne, le fofom-pate mitarike mbamy i fatey mbeo. Fa amy ze ho voavonje, le hagny ty fiaignagne mitarike amy i havelogney mbeo. Ia ty mahafeno fepetse hanao izay?* 17 Izahay, satria zahay tsy mamarotse ty saontsin’Agnahare manahake ty atao ty ndaty maro. Mirehake ty maregne zahay naho fa mitory, satria mpiana i Kristy. Ie, nirahen’Agnahare zahay, sady agnatreha’e eo ty anoa’ay izay.