Taratasy Faharoe Hoahy o Tesalonianao

2 Faie naho ty miomba i fagnatreha i Jesosy Kristy Tompontikagney naho i famoriagne antika mba hiarake ama’ey ry rahalahy, le mangatake anareo zahay, 2 mba tsy halaky hivali-doha nareo, ndra ho endrakendrake naho misy fagnambaragne hoe boake amy i fagnahỳ, ndra hafatse, ndra taratasy hoe boake ama’ay mirehake tie, fa avy i andro i Jehovah-y.

3 Ao tsy hisy ndaty henga’areo hamitake anareo, ndra amy ty fomba manao akore ndra amy ty fomba manao akore, satria tsy ho avy ze andro zay naho tsy miseho heike i fivaliham-pinoagney, sady abaribary i lahilahy mpandika lalànay, ndra i ana i famonovonoagneỳ. 4 Mitsangagne mba hanohetse naho manondrotse ty vata’e ho ambone ze atao tihoe andrianagnahare naho ze raha tompoegne reke, amy izay reke hitoboke amy i tempolin’Agnaharey ao, mba hampisehoa’e ty vata’e ho andrianagnahare agnatreha o ndatio eo iaby. 5 Tsy tsiaro’areo vao tie, fa nirehake o raha rehoe mateteke raho, tamy iraho niarake tama’areoy?

6 Hai’areo ka hinane zao tie, ino i raha mikalagney, amy izay tsy hibaribary reke naho tsy amy i fotoagne fa tinondro’ey. 7 Maregne tie fa miasa o fandikan-dalàna iohoe ndra i raha mietakey, faie amparake ty hagnafahagne i ndaty mikalagne aze amy izaoy avao. 8 Habaribary vata’e i mpandika lalànay, le i Jesosy Tompo ro hamono aze amy ty alala ty fofognay ty vava’e,* sady hofoagne reke naho fa mibaribary tie magnatreke ty Jesosy. 9 Faie ty fagnatreha i mpandika lalànay, le noho ty asa i Satana miarake amy ty asa mahagaga sambe karaza’e naho ty famantaragne vande vaho mahaveregne, 10 naho ze famitahagne tsy maregne hoahy ze hozamagne. Izay ty saze iareo, satria iareo tsy nagneke sady tsy tea i hamaregnagney mba ho nahavy iareo ho niavotse. 11 Izay ty nahavy an’Agnahare nagnenga iareo ho voafita ty fampianaran-diso, amy izay iareo mino vande, 12 mba hahavy iareo iaby hotsaraegne. Ty anto’e, tsy nino i hamaregnagney iareo, fa nifale tamy ty tsy hamaregnagne.

13 Faie mahatsapa zahay tie, mila misaotse an’Agnahare lognandro noho ty ama’areo ry rahalahy tea i Jehovah, satria fa boake tam-boaloha’e tagne ty Andrianagnahare ro nijobogne anareo mba havotagne. Nanao izay reke naho fa nagnamasigne anareo, tamy ty alala i fagnahi’e masigney naho ty finoa’areo i hamaregnagney. 14 Tamy ty alala i talily soa ambara’aỳ ty nikanjia’e anareo, amy izay nareo hahazo i voninahy i Jesosy Kristy Tompontikagney. 15 Naho izay areke ry rahalahy, le mikezaha ho mafe oregne, le tano’areo mafe ka i fampianaragne* nampianaregne anareoy, ndra nirehafe’ay am-bava zay, ndra nisorate’ay tamy ty taratasy. 16 Lonike ka abey ty Jesosy Kristy Tompontikagne naho i Andrianagnahare Raentika, i tea antika sady nagnomey fampionognagne nainai’e antika vaho fanantenagne soa, tamy ty alala ty hasoa fagnahy miambakey, 17 hampionogne ty fo’areo naho hagnamafe oregne anareo, amy ty asa soa sambe karaza’e naho amy ty raha rehafegne.