Nanagn’anake maro ty Adama naho i Eva naho fa nisintake tamy i tete i Edenay ao. I Kaina ty voaloha’e, mpambole ty asa’e. I Abela ty faharoe, mpiarak’agnondry reke.

Nanao fagnatetse hoahy i Jehovah ty Kaina naho i Abela tie indraike. Ino o fagnatetse zao? Raha meigne an’Andrianagnahare. Nahafale i Jehovah ty raha nimey i Abela, fa tsy nahafale aze ty ahy i Kaina. Izay ty nahaboseke i Kaina. Nampitao i Kaina ty Jehovah fa hanao raty reke naho boseke loatse. Faie tsy nitsanogna’e.

‘Andao kahe ho amako an-teteke agne’ hoe ty Kaina tamy i Abela. Naho fa tsy nisy ndaty nahatrea iareo, le vinono i Kaina ty Abela rahalahi’e. Akore ty natao i Jehovah? Nisazea i Jehovah ty Kaina, le nampisintahe’e lavitse ty longo’e. Tsy nengagne hiheregne amy iareo agne sasa reke.

Inogne ty lesogne ianarantikagne amy izay? Va’e ho boseke tika naho tsy mifanandrife amy ty iteàntikagne aze ty raha miseho. Naho fa mitombo ze habosehantikagne zay, le va’e hisy ndaty hampitao antikagne, faie soa tika naho manao fagnitsiagne malaky, mba tsy hanahake i Kaina.

Tsy haligno i Jehovah ty Abela satria nitea aze sady nanao raha soa. Mbe hovelome i Jehovah indraike ty Abela naho fa hatao’e paradisa ty tane toy.

Nanjare maro ty ndaty tambone tane etoy naho fa nandeha ty fotoagne. Maro tamy iareo ty nanao raty. Ndra ty anjely ila’e tan-dagnitse agne ka nanao raty. Nienga i lagnitsey iareo, le nizotso an-tane etoy. Ino ty anto’e? Amy izay iareo manjare ndaty, le hanambaly ampela.

Nanagn’ana-dahy iareo naho fa nifanambaly. Natanjake ty ana iareo naho fa nibey sady nanjare mpampijale ndaty. Tsy tea i Jehovah hitohy ty raha raty natao iareo, le nanapa-kevetse handefa safodrano reke mba hamonovonoagne ty ndaty raty.

Faie nisy lahilahy raike tsy nanao raty sady tea an’Andrianagnahare. I Noa ty agnara’e. Nanambaly reke sady nanagn’anake telo lahy, le i Sema, i Hama naho i Jafeta. Sambe nanambaly ka o ana’e reo. Nampamboare i Jehovah sambofiara ty Noa, mba hagnavotagne iareo keleian-draike tsy ho mate i Safodranoy.Sambo fiara zao, le vata bey afake mitsikafogne ambone ranoey. Nisaontsia i Jehovah ka iareo mba hanjilike biby maro agnate i sambofiaray ao.

Tsy nangatake andro ty ry Noa fa le avy le namboatse i sambofiaray. Afake 50 taogne vaho izay nivita ty fagnamboaragne aze. Namboare iareo mitovy soa amy ty raha nisaontsie i Jehovah i sambofiaray. Nampitao o ndatio miomba i Safodranoy ka ty Noa, faie tsy nisy nitsanogne.

Nilitse tagnate i sambofiaray ao iareo tamy ty fara’e. Andao hohenteantika ty raha niseho.