Mipaliava Fampionognagne amy i Jehovah

1. Nanao akore ty fiaigna i Jiosy nindevo ta Babilona tagne rey?

ALAO sare an-tsaigne moa ty raha tsy maintsy ho nitsapa i Jiosy nindevo ta Babilona tao rey. Nitrea iareo ty nandravagne i tanendraza iareoy. Nalaegne boake amy i tanà iareoy ao iareo, le nindesegne an-tane hafa agne noho ty fahota iareo naho ty ahy ty raza iareo. (2 Tan. 36:15, 16, 20, 21) Maregne fa afake nanao ty raha fatao iareo andavanandro iareo ta Babilona tagne. (Jer. 29:4-7) Faie tsy nimora ty fiaignagne tagne sady tsy nagniry ty hitoboke agne ka iareo. Ino ty nitsapa iareo tamy izay? Izao ty nirehafe ty raike tamy iareo: “Tamoro ty renerano ta Babilona agne zahay ro nitobotoboke. Nitagny zahay naho fa nahatsiaro i Ziona.” (Sal. 137:1) Tena nila fampaherezagne o Jiosy reo, faie ia ty afake hampahery iareo?

2-3. a) Ino ty natao i Jehovah hoahy i Jiosy nindevo rey? b) Ino ty hodinehentika amy ty lahatsoratse toy?

² “Andrianagnahare ze kila fampionognagne” ty Jehovah. (2 Kor. 1:3) Amy ty maha Andrianagnahare bey hatea aze, le tea’e ty mampionogne ze ndaty miharine aze. Niony i Jehovah tie hagneke ty fagnanara’e ty ila’e amo o Jiosy nindevò, le hiheregne ama’e. (Isaia 59:20) Zato taogne mahery taloha ty naha ndevo o Jiosio ta Babilona tagne, le nimea i Jehovah fagnahy masigne ty Isaia mpaminany mba hanoratse i boke minday ty agnara’ey. Ino ty tanjo o boke iohoe? Hoe ty Isaia: “‘Ampionogno, ampionogno o vahoakò’ hoe i Andrianagnahare’areoy.” (Isaia 40:1) Ty raha nisorate o mpaminany iohoe ty nampiasae i Jehovah mba hampaherezagne o Jiosy ndevo reo.

³ Mila fampaherezagne manahake o Jiosy reo ka tikagne kindraike. Handineke fomba telo nampahereza i Jehovah iareo tikagne amy ty lahatsoratse toy: 1) Nampitamà reke tie hamela ze mibebake, 2) nagnomey fampitamagne iareo reke sady 3) nagnampe iareo mba tsy hatahotse. Naho fa mandineke o hevetse rehoe tika, le mareho tie ino ty azontika atao mba handrambesantika soa boake amy ty fomba ampahereza i Jehovah antika.

MAMINDRA FO TY JEHOVAH LE MAMELA ANTIKA

4. Akore ty nanoroa i Jehovah fa Andrianagnahare mamindra fo reke? (Isaia 55:7)

⁴ “Rae ty fitretrézagne” ty Jehovah. (2 Kor. 1:3) Naneho o toetse iohoe reke naho fa nampitamà tie hamela ze Jiosy ndevo nibebake. (Vakio ty Isaia 55:7.) Hoe reke: “Tea azo naho tsy mivalike ama’o nainai’e raho, le hamindra fo ama’o.” (Isaia 54:8) Akore ty nanoroa i Jehovah tie namindra fo reke? Ndra tie toko’e ho niaretse ty voka ty fahadisoagne natao iareo ta Babilona agne tagnate ty taogne maro aza o Jiosy reo, le nampitamà reke tie tsy ho agne nainai’e iareo. (Isaia 40:2) Tsy maintsy ho nampahery naho nagnomey toky ze Jiosy nibebake areke o rehake reo!

5. Nagnino tika ro managne anto’e lahibey atokisagne mandikoatse i Jiosy nindevo rey fa mamindra fo ty Jehovah?

⁵ Ino ty ianarantika boake amy izay? Vognogne hamela tanterake ty helo ty vahoa’e ty Jehovah. Managne anto’e lahibey atokisagne izay mandikoatse o Jiosio tikagne amy hinane zao noho ty fandaharagne natao i Jehovah mba hahafaha’e mamela ty fahotantikagne. An-jato’e taogne tafara ty nirehafa i Isaia i faminaniagney, le nandefa i Ana-dahi’ey ty Jehovah, mba hagnomey solovoigne hoahy ze mpanota mibebake. Afake ‘mamafa’ tanterake ty fahotantika ty Jehovah noho o solovoigne iohoe. (Asa. 3:19; Isaia 1:18; Efes. 1:7) Mamela heloke vata’e ty Jehovah, i Andrianagnahare tompoentikagney!

6. Nagnino ro mampahery antika ty fisaintsaignagne miomba ty famelan-kelo i Jehovah? (Henteo ka i sarey.)

⁶ Naho mbe magnamelo-tegna amy ty hadisoagne nataontika taloha avao tika ndra tie fa nibebake aza, le afake magnampe antika i hafatse nampanorate i Jehovah hoahy o Jiosio amy Isaia 55:7 aoy. Naho mieke ty helontikagne tika sady tsy manao raha raty sasa, le afake matoky tie hamela antika ty Jehovah. Naho fa mamela antika reke, lelia’e tsy tadidie’e sasa i fahotantikagney. (Ampitahao amy ty Jeremia 31:34.) Naho tsy mitadidy ty fahotagne nataontika taloha areke ty Jehovah, le tsy toko’e hitadidy izay ka tikagne. Ty raha ataontika amy izao ro lahibey ama’e fa tsy ty fahadisoagne nataontikagne taloha. (Ezek. 33:14-16) Tsy ho ela le hagnafake antika amy ty fijaleagne voka ty fahotantikagne, i Raentika mitretré ey amy i tontolo vaovaoy ao.

7. Ino ty hagnampe antika hahavita hirehake amo o androanavio ty fahotagne lahibey nataontika?

⁷ Ino ty toko’e hataontika naho magnenjeke antikagne ty eretserentika noho itika magnetake ty fahotagne lahibey nataontika? Mandrisike antika mba hangatake fagnampeagne amo o androanavio ty Baiboly. (Jak. 5:14, 15) Tsy mora ty manao izay. Faie ndra tie eo zay, le hahavita izay tika naho tena mibebake sady mitadidy tie bey hatea naho mamindra fo manahake i Jehovah o lahilahy tsy mivalike reo. Mampiasa iareo ty Jehovah mba hagnampeagne antika. Nenjehe ty eretsere’e noho ty hadisoagne natao’e ty rahalahy atao tihoe Arthur.a Dineho ty fomba nampiasà i Jehovah o androanavio mba hampaherezagne aze. Hoe reke: “Nagnente sare vetaveta raho tagnate ty tao’e raike eo ho eo. Naho fa naharey ze lahajaka raike mirehake miomba ty feo ty fieretseretagne zay raho, le nieke ty hadisoako tamy i valiko naho tamo o androanavio. Nahatsiaro naivagne raho tafara izay faie mbe nalahelo avao. Naniahy ahy i androanavy rey tie mbe tea ahy ty Jehovah. Ty hatea’e antika ty mahavy aze magnanatse antikagne. Tena nanohigne ty foko o rehake reo sady nagnampe ahy hagnova ty fomba fiheverako ty tegnako.” Mpisava lalagne ty Arthur tie amy izao sady mpagnampe amy ty fiangonagne. Tena mampahery ty mahafantatse tie mamindra fo amantika ty Jehovah naho tena mibebake tikagne!

MAGNOMEY RAHA TAMAEGNE ANTIKA TY JEHOVAH

8. a) Ino ty raha nampitamae i Jehovah i Jiosy nindevo rey? b) Arake ty Isaia 40:29-31, ino ty nivoka i fampitamagney tamy ze Jiosy nibebake?

⁸ Naho ty fomba fiheve o ndatio, le tsy misy raha tamaegne sasa ty amo o Jiosio satria o Babilonianao, i Firenena Fara izay ty Matanjake tamy izaỳ, le nalaza ho tsy mamotsotse ze ndaty azo iareo ndevo. (Isaia 14:17) Faie nimey i Jehovah raha tamaegne o vahoa’eo. Nampitamà reke tie hagnafake iareo sady tsy misy afake mikalagne aze tsy hagnatanterake izay. (Isaia 44:26; 55:12) Amy i Jehovah, le hoe lemboke o Babilonianao. (Isaia 40:15) Tiofe o tiokeo avao o lembokeo le fa tsy trea. Ino ty voka i fampitamagney tamy i Jiosy rey? Tsy vita tihoe nampahery iareo avao zay fa izao ka ty nisorate i Isaia: “Ze mitamà i Jehovah avao ro hahazo hery indraike.” (Vakio ty Isaia 40:29-31.) “Hitiligne iareo, mitovy amy ty managne ela-boromahery” satria hagnatanjake iareo i fampitamagney.

9. Nagnino i Jiosy rey ro afake natoky fa hagnafake iareo boake a Babilona agne ty Jehovah?

⁹ Natao i Jehovah ka ze hahavy i Jiosy nindevo rey hatoky tie, hotanterake vata’e i raha nampitamae’e iareoy. Akore ty fomba nanoa’e izay? Eretsereto moa ty faminaniagne fa nitanterake nitrea iareo. Fanta iareo fa nitanterake mifagnarake amy ty nisaontsia i Jehovah aze i faminaniagne tihoekey tie hanafike ty foko folo o Israelio ty Asiria sady hinday iareo ho ndevo. (Isaia 8:4) Nitrea iareo nandrava i Jerosalema vata’e o Babilonianao sady ninday ty ndaty tao ho ndevo. (Isaia 39:5-7) Teo ka iareo tamy i Zedekia Mpanjaka nigoagne naho nindesegne ta Babilona agney. (Jer. 39:7; Ezek. 12:12, 13) Nitanterake ze kila raha iaby nisaontsie i Jehovah. (Isaia 42:9; 46:10) Azo antoke fa nagnatanjake ty finoa iareo zay, le nahavy iareo hatoky tie tsy maintsy hotanterake i fampitamà i Jehovah tihoey tie hafahagne iareo!

10. Ino ty hagnampe antika hatoky ty raha tamaentika?

¹⁰ Ino ty ianarantika boake amy izay? Hampahery antika sady hahavy antika hatanjake indraike ty raha tamaentika naho fa kivy tikagne. Miaigne agnate ty fotoan-tsarotse tika sady miatreke ty fanohera o fahavalon’Agnahareo, faie tsy toko’e ho kivy. Nampitamà ty Jehovah fa hiaigne nainai’e amy i Paradisay ao tika amy ty hoavy. Tena hovoaro naho hiadagne tikagne naho fa ao. Faie tsy maintsy mampifantoke ty saintikagne naho ty fontika amo o fampitamagne iohoe tika. Naho tsy manao izay tika, le hanjavozavo manahake ty toeragne fanjaka talakesegne amy ty lafinete vitre maloto i raha tamaentikay. Mila “magnalio i lafinetey” areke tika, amy izay mazava soa i raha tamaentikagney. Akore ty azontika anoagne izay? Azontika atao ty misaintsaigne tsy tapake ty fiaignagne fanjaka amy i Paradisay ao. Azontika atao ka ty mamaky lahatsoratse, magnente video naho mitsanogne hira mirehake miomba i Paradisay. Azontika rehafegne amy i Jehovah ka ty raha tena fa tsy lignentika amy i Paradisay ao naho fa mivavake tikagne.

11. Ino ty nagnampe i rahavave tararegney hatanjake avao?

¹¹ Tararegne ty rahavave raike atao tihoe Joy, faie nampahery naho nagnatanjake aze ty raha tamae’e. Hoe reke: “Rehafeko amy i Jehovah ze raha tsapako naho fa kivy raho noho ty olagne mahazo ahy. Haiko fa oni’e soa zay. Nahatsapa raho tafara izay tie, nagnomey ahy ‘hery mihoatse ty anagna o olombelogneo’ reke.” (2 Kor. 4:7) Mangalake sare an-tsaigne ty tegna’e miaigne amy i tontolo vaovaoy ao ty Joy. ‘Tsy hisy ndaty hanao tihoe marare raho.’ (Isaia 33:24) Hanagne hery hiaretagne raha sarotse ka tika naho mifantoke avao amy i raha tamaentikagney sady mirehake amy i Jehovah ze raha tsapantikagne.

12. Ino ty anto’e mahavy antika matoky ty raha ampitamae i Jehovah? (Henteo ka i sarey.)

¹² Manahake ty natao i Jehovah tamy i Jiosy rey avao, le atao’e ka ze hahavy antika hatoky tie hotanterake i raha nampitamae’e antikagne rey. Eretsereto ty faminaniagne tanterake amy izao. Treantika zao ohatse tie ‘matanjake ty ampaha’e’ amy i fanjakagne matanjake magneran-taney fa ‘ty ampaha’e maleme.’ (Dan. 2:42, 43) Reintika ka tie misy ‘horohoron-tane ty amy ty tane sambe hafa’ agne. Mitory “amy ty tane toy iaby” ka tika. (Mat. 24:7, 14) Ty fahatreavantika ty fahatanteraha o faminaniagne reo naho ty maro hafa, le vao mainke mahavy antika hatoky tie tsy maintsy ho tanterake ty raha fanjaka iaby nampitamae i Jehovah.

MAGNAMPE ANTIKA TSY HATAHOTSE TY JEHOVAH

13. a) Ino ty raha sarotse hatrehe i Jiosy rey naho fa avy i fotoagne hagnafahagne iareoy? b) Arake ty rehafegne amy Isaia 41:10-13 ao, akore ty fomba nampahereza i Jehovah iareo?

¹³ Ndra tie nampahery i Jiosy rey tamy ty alala i fampitamagne fanjaka rey aza ty Jehovah, le nioni’e ka tie hiatreke raha sarotse iareo amy i fotoagne hagnafahagne iareoy. Fa nisaontsie’e mialoha tie hisy mpanjaka matanjake raike hanafike naho hifehe ty firenena magnodidigne i Babilona. Hanafike i Babilona ka o firenena iohoe afara izay. (Isaia 41:2-5) Faie toko’e hatahotse vao o Jiosio? Nampahery o vahoa’eo hoe izao ty Jehovah, taloha bey ty hisehoa izay: “Ko matahotse fa hanohagne azo raho. Ko minekoneko fa izaho ro Andrianagnahare’o.” (Vakio ty Isaia 41:10-13.) Ino ty tea’e ho saontsiegne amy tihoe: ‘Izaho ro Andrianagnahare’o’? Tsy naniahy o Jiosio ty Jehovah tie mila manompo aze iareo satria fa hay iareo zay. Naniahy iareo reke tie agnila iareo eo avao.​—Sal. 118:6.

14. Akore ka ty fomba nagnampea i Jehovah i Jiosy rey mba tsy hatahotse?

¹⁴ Nagnampe i Jiosy rey tsy hatahotse ka ty Jehovah naho fa naniahy iareo tie tena mahery naho mahay ze kila raha reke. Nampagnentea’e ty vasiagne amy i lagnitsey ey i Jiosy rey. Nisaontsy tamy iareo reke tie tsy niforogne’e avao i raha rey fa oni’e soa ka ty agnara iareo tsikiraidraike. (Isaia 40:25-28) Ty agnara i vasiagne rey aza ony i Jehovah, somandrake fa ty agnara o mpanompo’eo tsikiraidraike! Nanagne hery hamorognagne o vasiagneo ty Jehovah. Midika areke zay tie managne hery hagnampeagne ty vahoa’e ka reke. Tsy misy raha toko’e hatahora o Jiosio areke.

15. Ino ty natao i Jehovah mba hagnampeagne iareo hovognogne amy ty raha hiseho?

¹⁵ Nisaontsie i Jehovah tamy iareo mialoha ka ty raha toko’e hatao iareo naho fa ho avy i fotoagne hagnafahagne iareoy. Hoe ty Jehovah tamo o vahoa’eo, amy ty boke i Isaia ao: “Mandehana mizilike amy ty efetragno’o agnate’e ao ... le hilio i lalagney. Mietaha tsielatsiela, amparake ty handehana i fagnamelohagney.” (Isaia 26:20) Va’e nampihatse o toromareke iohoe o Jiosio naho fa nanafike i Babilona ty Kyrosy Mpanjaka. Hoe ze mpahay tantara Grike taloha zay tie ‘nagnomey baiko o maramila’eo ty Kyrosy mba hamono ze ndaty trea iareo an-tane eo naho fa nilitse ta Babilona ao.’ Alao sare an-tsaigne moa ty nitaho ty ndaty nitoboke ta Babilona tao tamy izay! Faie i Jiosy ndevo rey va’e nivoaro satria nankatò i toromareke boake amy i Jehovah-y.

16. Nagnino tikagne ro tsy toko’e hatahotse ty raha hiseho amy ty hoavy? (Henteo ka i sarey.)

¹⁶ Ino ty ianarantika boake amy izay? Tsy ho ela tika le hiatreke haoreagne lahibey mbe tsy nisy hoe’e. Naho fa manomboke io, le hivali-doha naho hatahotse ty ankamaroa o ndatio. Faie tsy hoe izay o vahoa i Jehovah-o. Fantantika fa i Jehovah ty Andrianagnaharentika. Tsy matahotse tika satria fantantikagne “fa marine ty fagnavotagne [antika].” (Lioka 21:28) Mbe hatoky i Jehovah avao tika ndra tie fa manafike antika aza i firenena maromaro mitambatsey. Hampiasa anjely ty Jehovah mba hiarovagne antikagne sady hagnomey toromareke mba hamonjeagne antikagne. Akore ty fomba hagnomea’e ze toromareke zay? Mbe hotreantikagne eo. Faie ty azo antoke le tihoe hahazo toromareke amy ty alala o fiangonagneo tikagne. Io ty va’e “efetragno agnate’e” afake hiaro antika. Akore ty ahafahantikagne miomagne amy ze raha hiseho amy ty hoavy rezay? Tsy maintsy mifandrambe soa amo o rahalahy naho o rahavaveo tika sady vognogne hankatò ze toromareke boake amy ty fandamina i Jehovah. Mila rese lahatse ka tika tie mitarike ty fandaminagne misy antika toy ty Jehovah.​—Heb. 10:24, 25; 13:17.

17. Ino ty azo’o atao mba hahazoagne fampaherezagne boake amy i Jehovah?

¹⁷ Ndra tie nimafe aza ty raha niaigna i Jiosy nindevo rey, le nagnomey ze fampaherezagne nilae iareo ty Jehovah. Manao hoe izay amantikagne ka reke. Mipaliava fampaherezagne amy i Jehovah avao ndra inogn’ino raha sarotse hiseho amy ty hoavy. Matokia fa tena mamindra fo reke. Anò an-tsaigne avao i raha tamae’o rey. Ko haligno fa i Jehovah ty Andrianagnahare’o, le tsy misy raha toko’e hatahora’o.