ధరలు పెరిగిపోతుంటే బ్రతికేదెలా?
ఇచ్చే గుణం చూపించండి
రేట్లు కొండెక్కి కూర్చోవడం వల్ల ఏమీ కొనలేక-తినలేక మీరు ఇబ్బందులు పడుతుండవచ్చు. అలాంటి సమయంలో ఇంకొకరికి పెట్టడమంటే, జరిగే పనేనా అని మీకు అనిపించవచ్చు. కానీ ఒకరికి పెట్టడం వల్ల మీకు లాభమే ఉంటుంది గానీ నష్టం రాదు. ఒక చేత్తో మీ రూపాయిని జాగ్రత్త చేస్తూనే, ఇంకో చేత్తో వేరేవాళ్లకు సహాయం చేయవచ్చు.
ఇవ్వడం ఎందుకు అలవాటు చేసుకోవాలి?
మీరు వేరేవాళ్లకు ఏ చిన్న సహాయం చేసినా మీకు సంతోషంగా ఉంటుంది, మంచి పని చేశారనే ఫీలింగ్‌ వస్తుంది. నిజానికి వేరేవాళ్లకు మంచి చేసినప్పుడు మీ శరీరం, మనసు ఆరోగ్యంగా ఉంటాయని పరిశోధనలు చెప్తున్నాయి. ఉదాహరణకు మన టెన్షన్‌లు, ఒత్తిళ్లు, ఆఖరికి నొప్పులు కూడా తగ్గవచ్చు. అంతేకాదు, మంచి నిద్ర కూడా పడుతుంది.
మనం వేరేవాళ్లకు డబ్బులు గానీ ఇంకేదైనా గానీ ఇచ్చి సాయం చేస్తే, మనం అవసరంలో ఉన్నప్పుడు వేరేవాళ్లు చేసే సహాయాన్ని తీసుకోవడానికి మన మనసు ఒప్పుకుంటుంది. ఇంగ్లాండ్‌లో ఉంటున్న హవర్డ్‌ ఇలా అంటున్నాడు: “వేరేవాళ్లకు ఇవ్వడానికి లేదా సహాయం చేయడానికి నేను, నా భార్య ఎప్పుడూ ముందుంటాం. అలా చేసినప్పుడు, మాకు ఎవరైనా సహాయం చేస్తే తీసుకోవడానికి ఇబ్బందిగా అనిపించదు.” నిజమే, ఇచ్చే గుణం ఉన్నవాళ్లు ఇతరులు తమకు తిరిగి ఏదోకటి చేయాలని ఆశించరు. బదులుగా, కష్టంలో తమను ఆదుకునే నిజమైన స్నేహితుల్ని సంపాదించుకోగలుగుతారు.
మీరేం చేయవచ్చు?
మీకు ఉన్నదాంట్లోనే ఇవ్వండి. మీ సంపాదన తక్కువే అయినా, అందులో నుండి కూడా మీరు వేరేవాళ్లకు ఎంతోకొంత ఇవ్వవచ్చు. బహుశా మీరు ఎక్కువ హడావిడి లేకుండా ఒక్క కూరతో భోజనం పెట్టినా చాలు! ఉగాండాలో ఉంటున్న డంకన్‌కి, ఆయన కుటుంబానికి వచ్చే ఆదాయం చాలా తక్కువే, కానీ వాళ్లకు ఇచ్చే గుణం మాత్రం చాలా ఎక్కువనే చెప్పాలి. డంకన్‌ ఇలా అంటున్నాడు: “ఆదివారాల్లో నేను, నా భార్య ఎవరో ఒకరిని ఇంటికి పిలిచి మాకు ఉన్నదాంట్లోనే వండిపెడుతుంటాం. అలా వాళ్లతో కలిసి తింటూ, కబుర్లు చెప్పుకోవడం అంటే మాకు చాలా ఇష్టం.”
నిజమే, వేరేవాళ్లకు సహాయం చేస్తున్నప్పుడు మీరు వివేచన చూపించాలి. ఉన్నదంతా వేరేవాళ్లకు ఊడ్చిపెట్టేసి మీకు, మీ కుటుంబానికి ఏమీ మిగలకుండా ఉండే పరిస్థితి తెచ్చుకోకండి.—యోబు 17:5.
ఇలా చేసి చూడండి: ఎవరినైనా ఇంటికి పిలిచి సింపుల్‌గా ఏదోకటి వండి పెట్టవచ్చు లేదా టీ, కాఫీ లాంటివి ఇవ్వవచ్చు. మీరు వాడకుండా పక్కన పెట్టేసిన వస్తువులు ఏమైనా ఉంటే మీ ఫ్రెండ్స్‌కి గానీ, ఇరుగు-పొరుగు వాళ్లకు గానీ ఇవ్వవచ్చు. అవి వాళ్లకు పనికొచ్చేవి అయితే వాడుకుంటారు.
మనసుంటే మార్గాలు ఎన్నో. కొన్ని గిఫ్ట్స్‌ని రూపాయి ఖర్చు లేకుండానే ఇవ్వవచ్చు. ఉదాహరణకు, మన టైమ్‌ పెట్టి వేరేవాళ్లకు అవసరమయ్యే కొన్ని పనులు చేయవచ్చు. మీరు దయగా రెండు మాటలు మాట్లాడడం కూడా ఒక గిఫ్ట్‌ కిందే లెక్క! కాబట్టి మీరు అవతలి వాళ్లను ఎంత ఇష్టపడుతున్నారో, వాళ్లంటే మీకు ఎంత ప్రేమ ఉందో చెప్పండి.
ఇలా చేసి చూడండి: ఎవరికైనా ఇంటి పనులు చేయడంలో గానీ, రిపేర్లు చేయడంలో గానీ, సరుకులు లాంటివి తేవడంలో గానీ సహాయం చేయండి. ఒక ఫ్రెండ్‌కి మీ మనసులోని మాటల్ని కార్డులో గానీ, మెసేజ్‌లో గానీ రాసి పంపించండి. మీరు వాళ్లను గుర్తు చేసుకున్నారనో, మిస్‌ అవుతున్నారనో చెప్పే ఒక్క మాటైనా చాలు.
మీరు గోరంత ఇచ్చినా చాలు మీకు కొండంత దీవెనలు వస్తాయి.