ప్రజలకు సహాయపడాలనుకున్న తిమోతి

తిమోతి అనే యువకుడికి ప్రజలకు సహాయం చేయడమంటే ఎంతో ఇష్టం. దానికోసం అతను చాలా ప్రాంతాలు తిరిగాడు. అందుకే అతని జీవితం ఆనందంగా, ఉత్సాహంగా సాగిపోయింది. అతను చేసినదాని గురించి తెలుసుకోవాలనుందా?—

తిమోతి లుస్త్ర అనే పట్టణంలో పెరిగాడు. వాళ్ల అమ్మ యునీకే, అమ్మమ్మ లోయి చిన్నప్పటి నుండే తిమోతికి యెహోవా గురించి నేర్పించారు. తిమోతి పెద్దవాడవుతుండగా, యెహోవా గురించి ఇతరులకు నేర్పించాలనే కోరిక అతనిలో కలిగింది.

పౌలు వేరే ప్రాంతాల్లో ప్రకటనా పని చేయడానికి తనతో రమ్మని తిమోతిని అడిగాడు. తిమోతి అప్పటికి ఇంకా యువకుడే. అయితే పౌలు అడిగినప్పుడు తిమోతి, ‘అలాగే, వస్తాను!’ అన్నాడు. వేరేచోటికి వెళ్లి ప్రజలకు సహాయం చేయడానికి అతను సిద్ధంగా ఉన్నాడు.

పౌలుతో కలిసి తిమోతి మాసిదోనియలోని థెస్సలొనీక అనే పట్టణానికి వెళ్లాడు. అక్కిడికు వెళ్లాలంటే వాళ్లు చాలా దూరం నడిచి ఓడ ఎక్కాలి. చివరకు వాళ్లు అక్కడికి చేరుకున్నారు. ఆ పట్టణంలో చాలామందికి యెహోవా గురించి నేర్పించారు. కానీ కొంతమంది వీళ్ల మీద కోప్పడ్డారు, వీళ్లకు హాని చేయాలని చూశారు. అందుకే పౌలు, తిమోతి అక్కడ నుండి వెళ్లిపోయి వేరే ప్రాంతాల్లో ప్రకటించాల్సి వచ్చింది.

కొన్ని నెలల తర్వాత, మళ్లీ థెస్సలొనీకకు వెళ్లి సహోదరులు ఎలా ఉన్నారో చూసిరమ్మని పౌలు తిమోతికి చెప్పాడు. అపాయకరమైన ఆ పట్టణానికి మళ్లీ వెళ్లాలంటే చాలా ధైర్యం కావాలి! అయినా, అక్కడున్న సహోదరులు ఎలా ఉన్నారో ఏంటో చూడాలనే తపనతో తిమోతి వెళ్లాడు. అయితే మంచివార్తతో పౌలు దగ్గరకు తిరిగొచ్చాడు. థెస్సలొనీకలోని సహోదరులు క్షేమంగా ఉన్నారు!

తిమోతి చాలా సంవత్సరాలు పౌలుతో కలిసి పనిచేశాడు. తన దగ్గర తిమోతిలాంటి వాళ్లు ఎవ్వరూ లేరని, సంఘాలకు సహాయం చేయడానికి తిమోతియే సరైనవాడని పౌలు ఒక ఉత్తరంలో రాశాడు. తిమోతి యెహోవాను, ప్రజలను ప్రేమించాడు.

మీరు ప్రజలను ప్రేమిస్తున్నారా? వాళ్లకు యెహోవా గురించి నేర్పించాలని అనుకుంటున్నారా?— అలాగైతే, తిమోతి జీవితంలాగే మీ జీవితం కూడా ఆనందంగా, ఉత్సాహంగా సాగిపోతుంది!