యెరూషలేము గోడలు

కొన్ని సంవత్సరాలు వెనక్కు వెళ్దాం. పర్షియా పట్టణమైన షూషనులో నెహెమ్యా అనే ఇశ్రాయేలీయుడు ఉండేవాడు. అతను అర్తహషస్త రాజు సేవకుడు. నెహెమ్యా సోదరుడు యూదా నుండి ఒక చేదు వార్తను తీసుకొస్తాడు. అతను: ‘యెరూషలేముకు తిరిగి వెళ్లిన ప్రజలు సురక్షితంగా లేరు. బబులోనీయులు నాశనం చేసిన పట్టణ గోడలు, గేట్‌లు ఇంకా కట్టలేదు’ అని చెప్తాడు. నెహెమ్యాకు చాలా బాధేసింది. అతను సహాయం చేయడానికి యెరూషలేముకు వెళ్లాలని అనుకుంటాడు, అందుకే రాజు తనను పంపించేలా చేయమని ప్రార్థన చేస్తాడు.

తర్వాత, నెహెమ్యా బాధగా ఉండడాన్ని గమనించి రాజు ఇలా అడుగుతాడు: ‘నిన్ను నేను ఇలా ఎప్పుడూ చూడలేదు. ఏమి జరిగింది?’ నెహెమ్యా ఇలా చెప్తాడు, ‘మా పట్టణం యెరూషలేము పాడైపోయి ఉంటే నాకు బాధే కదా?’ అప్పుడు రాజు ఇలా అడుగుతాడు: ‘నీ కోసం నన్ను ఏమి చేయమంటావు?’ వెంటనే, నెహెమ్యా మనసులో దేవునికి ప్రార్థన చేసుకుని ఇలా అడుగుతాడు: ‘యెరూషలేముకు వెళ్లి గోడలను తిరిగి కట్టడానికి దయచేసి నన్ను పంపించండి.’ నెహెమ్యా వెళ్లవచ్చని రాజైన అర్తహషస్త చెప్తాడు. అతను ఆ దూర ప్రాంతానికి క్షేమంగా వెళ్లేలా రాజు ఏర్పాట్లు చేస్తాడు. నెహెమ్యాను యూదాకు అధిపతిగా చేసి, పట్టణ గేట్లు కట్టడానికి చెక్కను కూడా ఇస్తాడు.

నెహెమ్యా యెరూషలేముకు చేరుకున్నాక పట్టణ గోడలు ఎలా ఉన్నాయో వెళ్లి చూస్తాడు. తర్వాత ఆయన యాజకులను, నాయకులను పిలిచి ఇలా చెప్తాడు: ‘ఇది చాలా ఘోరం. మనం వెంటనే పని మొదలుపెట్టాలి.’ ప్రజలు ఒప్పుకుని గోడలు తిరిగి కట్టడం మొదలుపెడతారు.

కానీ ఇశ్రాయేలీయుల శత్రువులు కొంతమంది వాళ్లను వెక్కిరిస్తారు, వాళ్లు ఇలా అంటారు: ‘మీరు కట్టే ఈ గోడను ఒక నక్క పడేయగలదు.’ కానీ పనిచేసేవాళ్లు వాటిని పట్టించుకోకుండా కడుతూనే ఉన్నారు. గోడలు ఎత్తుగా, బలంగా అయ్యాయి.

శత్రువులు వేర్వేరు వైపుల నుండి వచ్చి రహస్యంగా యెరూషలేము మీద దాడి చేయాలని అనుకున్నారు. అది విని యూదులు చాలా భయపడ్డారు. కానీ నెహెమ్యా ‘భయపడకండి, యెహోవా మనతో ఉన్నాడు’ అని చెప్పాడు. పనిచేసేవాళ్లను కాపాడడం కోసం నెహెమ్యా కొంతమంది సైనికులను అడ్డుగా పెట్టాడు, అప్పుడు శత్రువులు దాడి చేయలేకపోతారు.

కేవలం 52 రోజుల్లో గోడలు, గేట్‌లు పూర్తి అయ్యాయి. పూర్తైన సంతోషంలో నెహెమ్యా యాజకులందర్నీ యెరూషలేముకు పిలిపించాడు. వాళ్లను పాటలు పాడడానికి రెండు భాగాలుగా చేశాడు. ఊట గుమ్మం దగ్గర ఉన్న మెట్లు ఎక్కి ఒక్కో గుంపు ఒక్కో వైపు వెళ్లి పట్టణం చుట్టూ నడిచారు. వాళ్లు బూరలు, తాళాలు, హార్ప్‌లు వాయిస్తూ యెహోవాకు పాటలు పాడారు. ఎజ్రా ఒక గుంపుతో, నెహెమ్యా మరో గుంపుతో వెళ్లారు. ఆ రెండు గుంపులు నడుచుకుంటూ వెళ్లి ఆలయం దగ్గర కలుసుకున్నారు. ప్రజలందరూ పురుషులు, స్త్రీలు, పిల్లలు యెహోవాకు బలులు అర్పించి, పండుగ జరుపుకున్నారు. సంతోషంతో వాళ్లు వేసిన కేకలు చాలా దూరం వరకు వినిపించాయి.