ንጉስ ኣብ ጻዕብ ተወጢሑ ናብ የሩሳሌም ኣተወ

ንጽብሒቱ ንግሆ 9 ኒሳን፡ የሱስ ምስ ደቀ መዛሙርቱ ኻብ ቢታንያ ወጺኡ ናብ የሩሳሌም ከደ። ኣብ ደብረ ዘይቲ ናብ እትርከብ ቤት-ፋጌ ምስ ቀረቡ፡ ንኽልተ ኻብ ደቀ መዛሙርቱ ኸምዚ በሎም፦

“ኣብ ማዕዶኹም ናብ ዘላ ቝሸት ኪዱ፣ ብኡብኡ ኸኣ እስርቲ ኣድጊ፡ ጻዕብ ድማ ምስኣ ኽትረኽቡ ኢኹም። ፈቲሕኩም ከኣ ኣምጽኡለይ። ዝዀነ ሰብ ገለ እንተ ኢሉኩም፡ ‘ጐይታ ደልይዎም ኣሎ’ በልዎ። ብኡብኡ ኸኣ ኪሰድዶም እዩ።”—ማቴዎስ 21:2, 3።

እቶም ደቀ መዛሙርቱ፡ እዚ ዝበሎም ነገራት ምስ ትንቢት መጽሓፍ ቅዱስ ዚተሓሕዝ ምዃኑ ኣየስተውዓልዎን። ጸኒሖም ግና ፍጻመ ትንቢት ዘካርያስ ምዃኑ ተገንዚቦም እዮም። ዘካርያስ ብዛዕባ እቲ ኣምላኽ ዘተስፈወሉ ንጉስ ናብ የሩሳሌም ዚመጸሉ መገዲ፡ “ትሑት እዩ፡ ኣብ ኣድጊ፡ ኣብ ጻዕብ፡ ኣብ ውላድ ኣድጊ ድማ ተወጢሑ ኣሎ” ኢሉ ተነብዩ ነይሩ እዩ።—ዘካርያስ 9:9።

እቶም ደቀ መዛሙርቲ ናብ ቤት-ፋጌ ምስ ኣተዉ እሞ ጻዕብን ኣዲኡን ኪወስዱ ምስ ጀመሩ፡ ኣብኡ ደው ኢሎም ዝነበሩ፡ “እንታይ ክትገብሩ ኢኹም ነቲ ጻዕብ እትፈትሕዎ ዘለኹም፧” በልዎም። (ማርቆስ 11:5) ንጐይታ ይወስዱሉ ኸም ዘለዉ ምስ ነገርዎም ግና፡ ነቶም ደቀ መዛሙርቲ ሓደግዎም። እቶም ደቀ መዛሙርቲ ኸኣ ኣብታ ኣድግን ኣብቲ ውላዳን ክዳውንቶም ጠይቂ ገበሩሉ፣ የሱስ ግና ነቲ ጻዕብ እዩ ተወጢሕዎ።

የሱስ ነቲ ጻዕብ ተወጢሑ ናብ የሩሳሌም ኪኸይድ ከሎ፡ እቶም ህዝቢ እናበዝሑ ኸዱ። ብዙሓት እውን ክዳውንቶም ኣንጸፉ። ካልኦት ከኣ ካብቲ ኣብ ግራውቲ ዚርከብ ኣእዋም “ጨናፍር” ሰሊዖም ነስነሱ። “በጃኻ ኣድሕን! ብስም የሆዋ ዚመጽእ ብሩኽ እዩ! እታ እትመጽእ ዘላ መንግስቲ ኣቦና ዳዊት ብርኽቲ እያ!” እናበሉ እውን ጨደሩ። (ማርቆስ 11:8-10) ኣብ መንጎ እቲ ህዝቢ ዝነበሩ ፈሪሳውያን ከኣ በዚ ተቘጥዑ። ንየሱስ ድማ፡ “መምህር፡ ንደቀ መዛሙርትኻ ግንሓዮም” በልዎ። ንሱ ኸኣ፡ “እብለኩም ኣለኹ፡ እዚኣቶም እኳ ስቕ እንተ በሉ፡ እዚ ኣእማን እዚ ኺጭድር እዩ” ኢሉ መለሰሎም።—ሉቃስ 19:39, 40።

የሱስ ንየሩሳሌም ምስ ረኣያ፡ “ኣየ፡ በዛ መዓልቲ እዚኣ ንሰላምኪ ዚኸውን ነገር እንተ ትፈልጢ! ሕጂ ግና ካብ ኣዒንትኺ ተሰዊሩ ኣሎ” ኢሉ በኸየላ። የሩሳሌም እናፈለጠት ብዘይምእዛዛ፡ ዓስባ ኽትቅበል ነይርዋ እዩ። የሱስ ኣስዒቡ ኸምዚ ኢሉ ተነበየ፦ “ጸላእትኺ ኣብ ዙርያኺ ዕርዲ ዓሪዶም ዚኸብቡኺ፡ በዝን በትን ከኣ ዜጽብቡልኪ መዓልትታት ኪመጻ እየን። . . . ንዓኽን ኣባኺ ንዚነብሩ ደቅኽን ኪድዕምኹኹም፡ እምኒ ኣብ ልዕሊ እምኒ ኸኣ ኣይኪሓድጉልክን እዮም።” (ሉቃስ 19:42-44) ከምቲ የሱስ እተነበዮ ኸኣ፡ ጥፍኣት የሩሳሌም ብ70 ድ.ክ. መጸ።

የሱስ ናብ የሩሳሌም ምስ ኣተወ ኸኣ፡ “ብምልእታ እታ ኸተማ፡ ‘እዚ መን እዩ፧’ እናበለት ዕግርግር በለት። እቶም ህዝቢ ድማ፡ ‘እዚ ነብዪ የሱስ ብዓል ናዝሬት ናይ ገሊላ እዩ’ ይብሉ ነበሩ።” (ማቴዎስ 21:10, 11) እቶም ንኣልኣዛር ኬተንስኦ ኸሎ ዝረኣዩ ኸኣ ንኻልኦት ብዛዕባ እቲ ተኣምር ይነግሩ ነበሩ። እቶም ፈሪሳውያን ድማ ዋላ ሓንቲ የስልጡ ኸም ዘየለዉ ተዛረቡ። ንሓድሕዶም እውን፡ “ብዓለሙ ደድሕሪኡ ይስዕብ ኣሎ” ተባሃሃሉ።—ዮሃንስ 12:18, 19።

የሱስ ከኣ ከምቲ ናብ የሩሳሌም ኪኸይድ ከሎ ኣዘውቲሩ ዚገብሮ፡ ኪምህር ናብ ቤተ መቕደስ ከደ። ኣብኡ ኸኣ ዕዉራትን ሓንካሳትን ኣሕወየ። ሊቃውንቲ ኻህናትን ጸሓፍትን ነቲ ዚገብሮ ተግባራትን ነቶም ኣብ ቤተ መቕደስ፡ “ንወዲ ዳዊት፡ በጃኻ ኣድሕን!” እናበሉ ዚጭድሩ ኣወዳትን ምስ ረኣዩ፡ ተቘጥዑ። ንየሱስ ድማ፡ “እዚኣቶም ዚብልዎስ ትሰምዕዶ ኣለኻ፧” በልዎ። ንሱ ኸኣ፡ “‘ካብ ኣፍ ቈልዑን ሕጻናትን ውዳሰ ኣውጺእካ’ ዚብል ከቶዶ ኣየንበብኩምን ኢኹም፧” ኢሉ መለሰሎም።—ማቴዎስ 21:15, 16።

የሱስ ድማ ናብ ቤተ መቕደስ ኣትዩ፡ ግልጽ ግልጽ ኢሉ ጠመተ። መስዩ ብምንባሩ ኸኣ፡ ምስ ሃዋርያቱ ወጸ። 10 ኒሳን ቅድሚ ምጅማራ፡ ናብ ቢታንያ ተመልሰ፣ በታ ለይቲ እቲኣ እውን ኣብኣ ሓደረ።