ሕቶታት ካብ ኣንበብቲ

እቲ ኣብ ዳንኤል 9:24 ተነጊሩ ዘሎ “ናይ ቅዱሳን ቅዱስ” መዓስ ኢዩ ተቐቢኡ፧

ዳንኤል 9:​24-​27 ብዛዕባ ምቕልቃል እቲ “መሲሕ: መስፍን” ዝዀነ ክርስቶስ እትገልጽ ትንቢት ኢያ። እቲ ኣቐዲሙ እተነግረ ምቕባእ ናይቲ “ናይ ቅዱሳን ቅዱስ” እምበኣር ንምቕባእ ናይቲ ኣብ ቤት መቕደስ የሩሳሌም ዝነበረ ቅድስተ ቕዱሳን ኣየመልክትን ኢዩ። ኣብ ክንድኡ እቲ “ናይ ቅዱሳን ቅዱስ” ዝብል ስያመ: ኣብቲ ዝዓበየ መንፈሳዊ ቤት መቕደስ የሆዋ ንዝርከብ ሰማያዊ መቕደስ ኣምላኽ​—⁠ሰማያዊ ቅድስተ ቕዱሳን​—⁠ኢዩ ዘመልክት።a​—⁠እብራውያን 8:⁠1-5፣ 9:⁠2-10, 23

መንፈሳዊ ቤት መቕደስ የሆዋ ክዓዪ ዝጀመረ መዓስ ኢዩ፧ የሱስ ብ29 ከ.ኣ.ዘ. ርእሱ ንጥምቀት ምስ ኣቕረበ እተፈጸመ ነገር እሞ ሕሰበሉ። ካብቲ ግዜ እቲ ጀሚሩ የሱስ ነተን ኣብ መዝሙር 40:⁠6-8 ዘለዋ ቓላት ፈጺምወን ኢዩ። ጸኒሑ ሃዋርያ ጳውሎስ: የሱስ “ስጋ ኣዳሎኻለይ እምበር: መስዋእቲ ሕሩድን መስዋእቲ ብልዕን ኣይደሌኻን” ብምባል ናብ ኣምላኽ ጸልዩ ከም ዝነበረ ሓቢሩ ኣሎ። (እብራውያን 10:5) ኣምላኽ መስዋእቲ እንስሳታት ኣብ ቤት መቕደስ የሩሳሌም ምቕራብ ክቕጽል ከም ‘ዘይደሊ’ የሱስ ይፈልጥ ነይሩ ኢዩ። ኣብ ክንድኡ: መስዋእቲ ገይሩ ምእንቲ ከቕርቦ ንየሱስ ፍጹም ሰብኣዊ ኣካል ኢዩ ኣዳልይሉ። የሱስ ልባዊ ባህጉ እንታይ ምዃኑ ኽገልጽ ከሎ ቐጺሉ ከምዚ በለ:- “እንሆ: ኣብቲ መጽሓፍ ብዛዕባይ ጽሑፍ እዩ፤ ዎ ኣምላኽ: ፍቓድካ ኽገብር ኢለ እመጽእ አሎኹ።” (እብራውያን 10:7) ናይ የሆዋ ምላሽከ እንታይ ነበረ፧ ወንጌል ማቴዎስ ከምዚ ብምባል ይገልጽ:- “የሱስ ምስ ተጠምቀ: ብኡብኡ ኻብ ማይ ወጸ። እንሆ ኸኣ: ሰማያት ተኸፍተ: መንፈስ ኣምላኽ ድማ ከም ርግቢ ወሪዱ: ኣብ ርእሱ ኪቕመጥ ረአየ። እንሆ ድማ: ብእኡ ዝሰመርኩ ፍትዊ ወደይ እዚ እዩ: ዚብል ድምጺ ኻብ ሰማይ መጸ።”​—⁠ማቴዎስ 3:16, 17

የሱስ ኣካሉ ንመስዋእቲ ምስ ኣቕረበ የሆዋ ኣምላኽ ተቐቢልዎ ኢዩ: እዚ ድማ ካብቲ ቃል ብቓሉ ኣብ ቤት መቕደስ የሩሳሌም ዝነበረ ዝዓቢ መሰውኢ ኣብ ህላወ ከም ዝመጸ ኢዩ ዘመልክት። እዚ ነቲ ከም መስዋእቲ ዝቐረበ ሰብኣዊ ህይወት የሱስ ንኽቕበሎ ኣምላኽ ዘርኣዮ “ፍቓድ” ወይ ምድላው ዘመልክት ኢዩ። (እብራውያን 10:⁠10) ንየሱስ ብመንፈስ ቅዱስ ምቕብኡ ኸኣ ኣምላኽ ነቲ ናይ መንፈሳዊ ቤት መቕደስ ምድላው ብምልኡ ኣብ ህላወ ከም ዘምጽኦ ዘመልክት ኢዩ።b ስለዚ ኸኣ ኣብ ግዜ ጥምቀት የሱስ: ሰማያዊ ማሕደር ኣምላኽ ኣብቲ ዝዓበየ ናይ መንፈሳዊ ቤት መቕደስ ምድላው ከም “ናይ ቅዱሳን ቅዱስ” ኰይኑ ተቐብአ: ወይ ተፈልየ።

[እግረ-ጽሑፍ]

[ኣብ ገጽ 18 ዘሎ ስእሊ]

የሱስ ምስ ተጠምቀ እቲ “ናይ ቅዱሳን ቅዱስ ” ተቐብአ