ኣብ ኣገልግሎት ክእለትካ ኣመሓይሽ—ዘይወግዓዊ ምስክርነት ንምሃብ ዝርርብ ብኸመይ ከም እትጅምር

ኣገዳሲ ዝዀነ ስለምንታይ እዩ፦ ካብ ቤት ናብ ቤት ከነገልግል ከለና፡ መብዛሕትኡ ግዜ፡ ሰብ ኣይንረክብን ኢና። ይኹን እምበር፡ ህዝባዊ መጕዓዝያ ኽንጥቀም ከለና፡ ኣብ ቦታ ሕክምና ተራ ኽንጽበ ኸለና፡ ኣብ ስራሕ ወይ ኣብ ቤት ትምህርቲ ንዕረፍቲ ኽንወጽእ ከለና፡ ከምኡ እውን ኣብ ካልእ ቦታታት ነቶም ኣብ ቤቶም ዘይተረኽቡ ሰባት ክንረኽቦም ንኽእል ኢና። የሆዋ፡ ኵሎም ሰባት መልእኽቲ ብስራት መንግስቲ ኣምላኽ ኪሰምዑ ይደሊ እዩ። (1 ጢሞ. 2:3, 4) መብዛሕትኡ ግዜ፡ ምስክርነት ንኽንህብ፡ ባዕልና ዝርርብ ክንጅምር ኣሎና።

እንታይ ክትገብር ኣሎካ፧

መራጺ ኹን። እቲ ሰብ ምቕሉልን ንኺዛረብ ፍቓደኛን ድዩ፧ እቲ ሃዋህው ከይተሰከፍካ ንምዝርራብ ይፈቅድ ድዩ፧ ገሊኦም ኣስፋሕቲ፡ መጀመርታ ነቲ ሰብ ይጥምትዎ እሞ ፍሽኽ ይብሉ። እቲ ሰብ ፍሽኽ እንተ ኢሉ ኸኣ፡ ዝርርብ ኪጅምሩ ይፍትኑ።
ንኽትዛረብ ትብዓት ምእንቲ ኽትረክብ፡ ብልብኻ ጸሊ።—ነህ. 2:4፣ ግብ. 4:29።
ሓጺር ሓሳባት ብምሃብ፡ ምናልባት እውን ሰላም ብምባል ጀምር። የሱስ ምስታ ሳምራዊት ሰበይቲ ንዝገበሮ ዝርርብ፡ ብዛዕባ መንግስቲ ኣምላኽ ብምዝራብ ኣይኰነን ጀሚርዎ። (ዮሃ. 4:7) ሓድሓደ ግዜ፡ ብናእዳ፡ ንኣብነት፡ “ደቅኻ እዱባት እዮም!” ብምባል ዝርርብ ክትጅምር ትኽእል ኢኻ። ብሕቶ እውን ዝርርብ ክትጅምር ትኽእል ኢኻ። ንኣብነት፡ “ትማሊ ምሸት ንዝቐረበ ዜና ሰሚዕካዮዶ፧” ኢልካ ኽትሓትቶ ትኽእል ኢኻ።
ዝርርብ ምስ ጀመርካ፡ ብዛዕባ ብስራት መንግስቲ ኣምላኽ እተፋልጠሉ ኣጋጣሚ ኣናዲ፣ ግናኸ ኣይትተሃወኽ። ነቲ ዝርርብ ባህርያዊ ግበሮ። ምናልባት እውን፡ ነቲ ሰብ ሃንቀውታኡ ኼለዓዕለሉን ከም ዚሓትት ኪገብሮን ዚኽእል ነጥቢ ኸተበግስ ትኽእል ኢኻ። ንኣብነት፡ ዝርርብኩም ኣብ ጕዳይ ስድራ ቤት ዘተኰረ እንተ ዀይኑ፡ “ብዛዕባ ኣተዓባብያ ቘልዑ ዜተኣማምን ምኽሪ ረኺበ ኣለኹ” ኽትብሎ ትኽእል ኢኻ። ኣብ ዜና ብዛዕባ ዝቐረበ ነገር ትመያየጥ እንተ ኣሊኻ ድማ፡ “ኣብዚ ቐረባ እዋን ዘንበብክዎ ዜሕጕስ ጸብጻብ ኣሎ” ኽትብሎ ትኽእል ኢኻ። ምስክርነት ቅድሚ ምሃብካ እቲ ዝርርብ እንተ ተቛሪጹ፡ ተስፋ ኣይትቝረጽ።
ተገዳስነት ንዘርኣየ ሰብ ክትህቦ እትኽእል ትራክትታት ወይ ካልእ ጽሑፋት ሓዝ።

ኣብዛ ወርሒ እዚኣ፡ ነዚ ፈትኖ፦

እንተ ወሓደ ሓንሳእ ኣብ ሰሙን፡ ዘይወግዓዊ ምስክርነት ንምሃብ፡ ዝርርብ ክትጅምር ፈትን።