ንእከይ ብሰናይ ምስዓር

13, 14. (ሀ) ምጽራር ኬጋጥመና ኸሎ ኺገርመና ዘይብሉ ስለምንታይ እዩ፧ (ለ) ነቶም ዜሳጕጉና ኽንምርቕ እንኽእል ብኸመይ ኢና፧

¹³ ሮሜ 12:14, 21 ኣንብብ። የሆዋ ዕላማኡ ኸም ዚፍጽም ምሉእ ምትእምማን ስለ ዘሎና፡ “ወንጌል መንግስቲ . . . ንምስክር ኵሎም ኣህዛብ ኣብ ብዘላ ዓለም” ኣብ ምስባኽ ከነተኵር ንኽእል ኢና። (ማቴ. 24:14) እዚ ክርስትያናዊ ንጥፈት እዚ፡ ንጸላእትና ኸም ዜቘጥዖም ንፈልጥ ኢና፣ ከመይሲ፡ የሱስ፡ “ብዛዕባ ስመይ ከኣ ኣብ ኵሎም ኣህዛብ ጽሉኣት ክትኰኑ ኢኹም” ኢሉ ኣጠንቂቑ ነይሩ እዩ። (ማቴ. 24:9) ስለዚ፡ ምጽራር ኬጋጥመና ኸሎ ኣየገርመናን ወይ ተስፋ ኣየቝርጸናን እዩ። ሃዋርያ ጳውሎስ፡ “ኣቱም ፍቁራተይ፡ በቲ ንምፍታን ዝረኽበኩም ዘሎ ዋዒ ሓዊ፡ ሓደ ሓድሽ ነገር ከም ዝበጽሓኩም ኴንኩም፡ ኣይትገረሙ። . . . ኣብቲ ስቓይ ክርስቶስ ሕቡራት ካብ እትዀኑስ፡ ተሐጐሱ ደኣ” ኢሉ ጸሓፈ።—1 ጴጥ. 4:12, 13።

15. ንእከይ ብሰናይ ክንስዕሮ እንኽእለሉ ብሉጽ መገዲ እንታይ እዩ፧

¹⁵ ስለዚ፡ ሓደ ናይ ሓቂ ክርስትያን ነቲ ኣብ መወዳእታ ሮሜ ምዕራፍ 12 ዘሎ፡ “ነቲ እከይ ደኣ ብሰናይ ጌርካ ስዐሮ እምበር፡ በቲ እከይ ኣይትሰዐር” ዚብል ምኽሪ ኬቕልበሉ ኣለዎ። ምንጪ ዅሉ እከይ፡ ሰይጣን ድያብሎስ እዩ። (ዮሃ. 8:44፣ 1 ዮሃ. 5:19) ኣብቲ የሱስ ንሃዋርያ ዮሃንስ ዘርኣዮ ራእይ ተገሊጹ ኸም ዘሎ፡ እቶም ቅቡኣት ኣሕዋት የሱስ “ሳላ ደም እቲ ገንሸልን ሳላ እቲ ቓል ምስክሮምን [ንሰይጣን] ሰዐርዎ።” (ራእ. 12:11) እዚ ነጥቢ እዚ፡ ንሰይጣንን ነቲ ንሱ ኣብዚ ስርዓት እዚ ዜሕድሮ ዘሎ እኩይ ጽልዋን ክንስዕሮ እንኽእለሉ ብሉጽ መገዲ፡ ብዕዮ ምስክርነት፡ ማለት ንብስራት መንግስቲ ኣምላኽ ብምስባኽ ምዃኑ ዚሕብር እዩ።