U Hiihii u Peteru
4 Er Kristu yange ya ican sha iyol yô,+ ne kpa lu nen a imba ishima la,* sha ci u or ka nana̱ ya ican sha iyol yô, nan de u eren asorabo,+ 2 sha er nana kera lu uma sha iyol sha u eren asaren a ior ga,+ kpa a lu sha u eren ishima i Aôndo yô.+ 3 Gadia shighe u a kar ne kuma u yange ma ne er ishima i akuraior,+ zum u ne lu eren akaa a ndôhôrshima,* ne lu a asaren a bo a ior ve kôron iyol tsaha sha mi ga, ne lu man msôrom karen ikyaa inya, ne lu eren uiniongo mba dang, ne lu gban ugesa sha msôrom ma man, shi ne lu civir ieev sha ihyembeato la.+ 4 Kpiligh ve iyol er ne due ken dang ve u a lu vihin gban a gba kera la sha yô, nahan ka ve lamen sha a ven dang.+ 5 Kpa ambaaior ne aa va ôr kwagh ve sha ishigh ki un u a we iyol a lu keghen u va ôron mbaumav man mbakpenev ijir la.+ 6 Jighilii yô, ka sha ityôkyaa ne mbakpenev kpa yange i ôr ve loho u dedoo ye,+ sha u, er i lu ôron ve ijir sha iyol sha inja i uumace nahan kpa, vea lu uma ken jijingi sha mnenge u Aôndo yô.
7 Kpa mkur u akaa cii zurum. Sha nahan yô, eren nen kwagh sha kwaghfan,*+ shi lu nen tsevaa* sha mbamsen mba eren.+ 8 Kwagh u hemban cii yô, doo nen ayol a en tsung je,+ sha ci u dooshima cirin asorabo kpishi.+ 9 Ngohol nen hanma wen sar sar, a ahon a gban shio.+ 10 Hanma wen nana̱ eren tom u wasen orgen a iyua i i ne nan yô, er iyua shon i lu la cii, sha ci u ne mba mbanengen sha ya mba̱ fan kwagh. Gadia i tese ne erdoo u hemban u Aôndo sha igbenda kposo kposo.+ 11 Aluer or ngu ôron kwagh yô, nana̱ ôron sha inja i nan ngu ôron ka akaaôron a Aôndo; aluer or ngu eren tom u wasen mbagenev yô, nana̱ eren u sha inja i nan ngu suur sha tahav mbu Aôndo ka a na la;+ sha er a na Aôndo icivir sha akaa cii+ ken Yesu Kristu yô. Icivir man tahav cii ka akaa a na, shi aa lu a na zan zan gbem sha won. Amen.
12 Ne mba doon mo ishima, shighe u ne tagher a atsan a vihin tsung yô,+ kwagh la a̱ de kpiligh ne iyol inja er ka kwagh ugen kposo a lu eren ne ga. 13 Kpa za nen hemen u ember+ sha atsan a Kristu, a ne kpa ne lu yan la,+ er a lu la cii, sha er a saan ne iyol shi ne ember tsung sha shighe u ne va nenge a iengem na la kpaa yô.+ 14 Zum u i lu lahan ne sha ci u iti i Kristu yô, i̱ saan ne iyol,+ gadia jijingi u iengem, ka jijingi u Aôndo je la, ngu sha a ven.
15 Nahan kpa, or wen môm nana̱ de ye ican er nan ngu orwuanor shin ormbaiv shin iferor shin or u wan ave sha akaa a ior nahan ga.+ 16 Kpa aluer ma or ngu yan ican sha ci u nan ngu Orkristu yô,+ nana̱ de nengen ér nan hee ga, kpa nana̱ za hemen u wuese Aôndo, sha u eren kwagh u a kom sha iti ne yô. 17 Gadia shighe kuma u a hii u ôron ya* u Aôndo ijir.+ Nahan, aluer ijirôron hii sha a vese yô,+ mba ve we loho u dedoo u Aôndo ikyo ga la, kwagh ve una za nena?+ 18 “Man aluer ka u a yima orperapera sha ican yô, ka nyi ia er or u nan civir Aôndo ga la kua orsholibo?”+ 19 Sha nahan yô, mba ve lu yan ican sha ci u mba eren ishima i Aôndo la, ve̱ za hemen u wan ayol a ve* sha ikyev i un u a lu u jighjigh, U A Gbe Akaa Cii la, shi ve eren kwagh u dedoo.+