Sha Uwegh ku Mateu
3 Shighe kar yô, Yohane+ u Eren Batisema due gba pasen kwagh+ ken taaikyôngo u Yudia. 2 Lu kaan ér: “Gema nen asema, gadia Tartor u sha zurum.”+ 3 Ka Yohane shon je profeti Yesaia tsengaôron kwagh ne+ sha a na ye, ér: “Imo i or ngi yôôn ken taaikyôngo ér: ‘Sôr nen gbenda u Yehova!* Kôôm nen igbenda na i lu jighilii.’”+ 4 Yohane ne huan ikyondo i sha aive a rakumi, shi tsulen kwange u ikyôv ken iwenge.+ Kwaghyan na lu ikyomon* man iyough.+ 5 Ior mba ken Yerusalem man Yudia man mba hen haregh u Yordan la cii lu zan hen a na,+ 6 nahan lu eren ve batisema* shin Ifi u Yordan,+ ve lu pasen asorabo a ve ken igbar.
7 Er nenge Mbafarishi man Mbasadushi+ kpishi lu van ape lu eren ior batisema la yô, a kaa a ve ér: “Ne ônov mba igbindev mban,+ ka an nan we ne kwagh ér ne yevese iyugh i i lu van laa?+ 8 Nahan yô, ume nen ityamegh ki ki tese mgemshima yô. 9 De kaan nen ken ishima yen ner, ‘Se mba ônov mba Aberaham’+ ga. Nenge, me kaa ne, Aôndo una fatyô u geman awen ne aa hingir ônov mba Aberaham. 10 I ver ijembe hen atineakyon mba keghen a kegh. Nahan hanma kon u u um ityamegh ki dedoo ga cii yô, a gber u a kende ken usu.+ 11 Mo yô, m ngu eren ne batisema sha mnger sha ci u ne gema ishima.+ Kpa orgen u a lu van mo ken ijime la hembam tahav. M kuma u tsuan un akôv shin angahar ga.+ Un yô, una er ne batisema sha icighan jijingi+ man sha usu.+ 12 Ngu a kwagh u peer akoo* a mi ken uwe. Nahan una ese vande na u gbidyen iyiav pele pele, shi una kura alakema na una za ombo ken iyou i koson iyiav.* Kpa akoo yô, una nande a ken usu+ u a fatyô u pirin ga yô.”
13 Tsô Yesu mough ken Galilia va hen Yohane hen Yordan, sha u a̱ er un batisema yô.+ 14 Kpa Yohane gba vendan a na kaan ér: “Ka we i gbe u ma u erem batisema ye, man u gema u ngu van her a moo?” 15 Yesu gema kaa a na ér: “Hegen yô de i lu nahan, sha ci u ka kwagh u se er ve se fatyô u eren hanma kwagh u perapera je ne.” Maa a kera venda a na ga. 16 Mba eren Yesu batisema yô, a due shin mnger fese. Tsô i bugh sha,+ maa a nenge jijingi u Aôndo lu senen sha a na er ikyungugh nahan.+ 17 Shi imo due sha aôndo*+ kaa ér: “Ngun ka Wan wam+ u ishima ishima. Doom a na.”+