Mbaheberu

11 Jighjigh u nan ka u lun a vangertiôr wer kwagh u u lu veren ishima keghen la una er keng a bunde ga; ka ikyav i tesen wang ér* kwagh u u lu nengen a mi ga la ngu kpôô kpôô. 2 Gadia ka sha jighjigh u nan u ior mba sha ayange a tsuaa la i er shiada sha kwagh ve* ye.

3 Ka sha jighjigh u nan ka se nenge er i gbe akaa a sha man a shin tar* sha kwaghôron u Aôndo ye, nahan akaa a i nengen a mi la due ken akaa a i nengen a mi ga la.

4 Lu sha jighjigh u nan Abel na Aôndo nagh ku hemban lun a inja a ku Kain kura ye, shi lu sha ci u jighjigh u nan shon i er shiada sha kwagh na ér ngu orperapera ye, gadia Aôndo lumun* uiyua nav, man er a kpe nahan kpa, ngu lamen her sha jighjigh u nan na la.

5 Lu sha jighjigh u nan u Enoki la i kar a na kera sha u a̱ de nengen a ku ashe ga ye, nahan i kera nenge a na ga, sha ci u Aôndo kar a na kera; gadia cii man i kar a na kera yô, i er shiada i pase un ér a er kwagh u doon Aôndo. 6 A jighjigh u nan shio yô, or a fatyô u eren kwagh u doon Aôndo ga, gadia cii man or a kporom hen Aôndo yô, saa nana na jighjigh ér ngu, shi kimbin mba ve keren un sha mimi la injar.

7 Lu jighjigh u nan u Noa la na ve, zum u Aôndo ôr un akaa a i lu a nenge a mi ga la, a tese ér un cian Aôndo, nahan a gba tso sha ci u yiman ya na ye; shi lu sha jighjigh u nan na shon ne yange na tar ibo ye, nahan hingir orperapera* sha jighjigh u nan na la.

8 Lu jighjigh u nan u Aberaham la na ve, zum u Aôndo yila un la, a ungwa imo na, a yem hen ijiir i lu u a na un dyako la ye; yange due yem, shin er fa ape lu zan ga nahan kpaa. 9 Lu sha jighjigh u nan yem za lu shiror ken tar u ityendezwa la er or ka nan za lu ken tar u u lu u nan ga nahan ye; lu tsan ken utenti vea Isaka man Yakob, ve mba ve lu mba yan dyako u ityendezwa shon a na imôngo la. 10 Gadia lu keghen gar u i we un imaagh kpôô kpôô, u Aôndo a lu orkpelan man ormaan un la.

11 Lu sha jighjigh u nan kpa Sara zua a tahav mbu jiren wan* ye, shin er anyom a na kar mar nahan kpaa, sha ci u yange nenge ér Un u a er ityendezwa la ka u jighjigh. 12 Sha ityôkyaa ne yô, lu ken or môm u yange lu inja er uma ngu ken a na ga la, ônov va hingir u duen ngeen iyenge er asan a sha kwavaôndo nahan, shi ngeen ganden u ôron er waarawa u shin kpe zegemnger nahan ye.

13 Mban cii yange ve lu a jighjigh u nan zan zan ve kar kpen, shin er ve lu a zua a akaa a i er ityendezwa sha mi la ga nahan kpaa; kpa ve nenge a mi ken ica, ve ngohol a, shi ve pase ken igbar ér ve mba mbavan a va man ushirmbaiorov ken tar la. 14 Gadia mba ve ôron ambaakaa ne la ka ve tesen ér ve mba keren u lun a ijiir ve kpôô kpôô. 15 Kpa luun ér ve zer umbur ijiir i ve mough her la yô, yange ma ve zua a ian i hiden yemen her. 16 Kpa gema ka ijiir i i hembe doon la ve lu nôngon kpoghuloo ér vea zua a mi ye, ka ijiir i i dugh sha la je la. Sha nahan yô, kunya kôr Aôndo u̱ ve̱ yilan un ér Aôndo ve ga, gadia a ver gar sha ci ve.

17 Lu jighjigh u nan u Aberaham la na ve, zum u i kar un la, a nôngo u nan nagh sha wan na Isaka ye—or u yange i er uityendezwa a na ve doo un ne, nôngo u nan nagh sha wan na u môm môm la— 18 shin er i vande kaan a na ér: “Mba a yilan ve ér ônov ou* la vea due ken Isaka” nahan kpaa. 19 Kpa a nenge yô, Aôndo una fatyô u nderen un shin ku, nahan lu inja er ka shin ku je i nder wan na ve a hide a zough a na nahan, sha u tesen kwagh u una va er ken hemen yô.

20 Lu sha jighjigh u nan kpa Isaka na Yakob man Isou iveren sha akaa a yange lu van ken hemen la ye.

21 Lu jighjigh u nan u Yakob la na ve, shighe u zurum u una kpe la, na ônov mba Yosev mba nomso mbara cii iveren, shi suur sha gbough nagh civir Aôndo ye.

22 Lu jighjigh u nan u Yosev la na ve, shighe u zurum u una kpe la, a ôr kwagh u mdugh u ônov mba Iserael, shi a tese* kwagh u a er a akuhe a na* ye.

23 Lu jighjigh u nan u mbamaren mba Mose la na ve, zum u ve mar un la, ve tôô un ve za yer iwer itiar ye, sha ci u ve nenge wan u cuku la doo ashe, nahan wada u tor je kpa ve cia ga. 24 Lu jighjigh u nan u Mose la na ve, zum u a wa ikyondo la, a venda ér i de yilan un ér wan u Wanfarou ga ye. 25 Yange tsua u yan ican imôngo vea ior mba Aôndo, gema venda msaanyol u ken isholibo, u a lun gbem ga la, 26 sha ci u a nenge u zuan a ilyahan sha inja i Kristu la hemba un akaainjaa a Igipiti, gadia lu veren ashe keghen injar i a va kimbi un la. 27 Lu sha jighjigh u nan due undu Igipiti, cia iyugh i tor ga ye, gadia yange taver ishima her er ngu nengen a Un u i nengen a na ga la nahan. 28 Ka sha jighjigh u nan yange er Paseka shi mishi awambe ye, sha u ortimin ior la a̱ de eren ônovmbaiundav vev kwagh* ga yô.

29 Lu sha jighjigh u nan ve per Zegemnger u Nyian la er ka sha tareghnyaagh u uman tseghe tseghe nahan ye, kpa Mbaigipiti mba ngur nôngon vea per yô, ve saa mnger.

30 Lu sha jighjigh u nan gar u Yeriko yôhôr haa inya zum u ior zende ningir un tser zan zan ayange ataankarahar la ye. 31 Lu sha jighjigh u nan Rahabi u lu gbagakwase la tim vea mba ve hemba ato la ga ye, sha ci u yange ngohol ior mba ve za u za gban mker la bem bem.

32 Shi me kaa mer nyi? Gadia aluer m yem ôron kwagh u Gidiôn man Baraki man Semson man Yefeta, man Davidi man Samuel kua uprofeti mbagen yô, shighe a yinam. 33 Lu sha jighjigh u nan ve la ve hemba ityartor ityav, ve va a kwagh u perapera, i er uityendezwa a ve, shi ve cir ubegha ijô ye, 34 shi usu lu a tahav sha a ve ga, ve war ku u sanker, ve lu a mpe iyol ga, kpa i na ve hingir u lun a tahav kpishi, ve hingir anomaior ken uitya, ve zenda akumautya a a va u va tan num sha tar ve la. 35 Kasev zua a ior vev mba yange ve saa ku la zum u i nder ve shin ku yô, kpa i er ior mbagen ican gbem ve kar kpen sha ci u ve lumun ér vea nyiman jighjigh u nan ve sha u i̱ paa ve ga, sha er a va nder ve shin ku ken mlu u hemban doon yô. 36 I er mbagenev ican sha u nahan ve tar man sha ugbidi, man jighilii yô hemba nahan, sha ci u i kange ve mshirim shi i wuhe ve ken upurusu. 37 I ta ve awen, i kar jighjigh ve, i tôndo ve atôôn ahar ahar,* i sôngo ve sha sanker, ve lu zenden a akôv a iyôngo iyol man a akôv a ivo iyol, shi ve lu ken ibanave man ken ican, shi i nzughul a ve; 38 shi tar kuma sha a ve ga. Ve zende wue wue ken udesereti man sha iwo, ve tsa ken ubar man ahura a* shin inya.

39 Nahan kpa, mban cii nenge a kwagh u i er ityendezwa sha mi la ga, shin er i er shiada u dedoo sha kwagh u jighjigh u nan ve la nahan kpaa, 40 sha ci u Aôndo tsenganengen a kwagh u a hembe doon sha ci wase yô, sha er vea hingir vough a vese shio ga yô.