U Er Msen Nena Ve Aôndo Una Ungwa?

EREN MSEN HEN YEHOVA AÔNDO KEN ITI I YESU

“Aluer ne sôn Ter nyityôkwagh cii kpa, una na ne ken iti yam.”—Yohane 16:23.

Mkaanem ma Yesu ma i ôr sha heen ne tese wang ér Yehova soo ér se eren msen hen a na, i de lu hen ieev shin mbakpenev shin mbatyomov shin hen uter mbatsev ga, kpa i lu ken iti i Yesu Kristu. Ka sea er msen hen Aôndo ken iti i Yesu yô, se tese ser se fa er Aôndo a ongo msen wase sha ci u kwagh u Yesu er sha ci wase la yô. Yesu kaa ér; “Or môm nana gba van hen Ter ga, saa nana kar her a mo.”—Yohane 14:6.

ÔR KWAGH U A LU U KEN ISHIMA LA

“Pase nen asema a en sha ishigh Nagh.”—Pasalmi 62:8.

Shighe u se lu eren msen hen Yehova yô, gba u se lam a na vough er ka se lam a ter u se doo nan ishima nahan. Doo u se kimbir msen u i nger shin takeda shin u se kôr ken ityo la ga, kpa se pase un kwagh u a lu se ken ishima la sha icivir.

ER MSEN SHA KWAGH U A LU SHA ISHIMA I AÔNDO YÔ

“Nyityôkwagh i se sôn Aôndo man i lu i sha ishima na cii yô, ngu a ungwa se.”—1 Yohane 5:14.

Yehova Aôndo ôr se kwagh u una er sha ci wase man u a soo ér se er sha ci na la kpaa ken Bibilo. Aluer se soo ser Aôndo a ungwa msen wase yô, saa se er msen sha kwagh u a lu “sha ishima na” yô. Cii man se er msen sha kwagh u a lu sha ishima i Aôndo yô, gba u se hen Bibilo sha er se seer fan kwagh na tsembelee yô. Aluer se er nahan yô, mbamsen asev vea doo un.

KA AKAA A NYI NAHAN SE FATYÔ U EREN MSEN SHA MINI?

Er Msen sha Akaa a A Gbe u La. Se fatyô u eren msen hen Aôndo sônon un akaa a kwagh a gbe se a mi ayange ayange la, er kwaghyan man akondo kua ijiir i tsan nahan. Shi se fatyô u sônon ser a na se kwaghfan u una wase se u tsuan kwagh u vough yô, shi sônon ser a na se agee a se fatyô u wan ishima a atsan yô. Shi se fatyô u sônon Aôndo ser a̱ na jighjigh u nan wase a̱ seer taver shi a̱ de se akaabo shi a̱ wase se.—Luka 11:3, 4, 13; Yakobu 1:5, 17.

Er Msen sha Ci u Mbagenev. Mbamaren mba kwagh u ônov vev a gbe ve ishima yô, ônov vev ka vea doo ayol a ve yô, ve kpa i saan ve iyol. Yehova kpa soo ér se uumace mba se lu ônov nav ne cii se nengen ser hanma wase nan gba kwagh shi se wa hanma wase ikyo. Sha nahan yô, doo u se eren msen sha ci u nom shin kwase u se vôso yô, man mbayev asev man tsombor wase man azende a ase. Orhenen Yakobu nger ér, “Eren nen msen sha ci u hanmô wen.”—Yakobu 5:16.

Sughun Aôndo. Bibilo ôr kwagh u Aôndo u a gbe se la ér, a er ‘akaa a dedoo, nôôn ne ura, nan ne iyiav mgbeghaa sha ashighe a mbi, shi nan ne kwaghyan kpishi, shi ivin asema a en a msaanyol.’ (Aerenakaa 14:17) Aluer se hen sha akaa a Aôndo a er sha ci wase la cii yô, kwagh la una na se er msen se sugh un. Heela tseegh ga, shi gba u se eren kwagh ken uma wase sha gbenda u tesen ér se mba sughun Aôndo.—Mbakolose 3:15.

WA ISHIMA SHI DE GBE UWER U EREN MSEN GA

Ashighe agen yô, alaghga se ure sha ci u se er msen a ishima i môm sha ma kwagh u a ze se iyol yô shighe kar je kpa, se mba nengen a mkposo ga. Nahan a doo u se kaa ser kwagh wase gba Aôndo ishima gaa? Ei! Nenge ase er akaa a a er ior, a i ter shin heen ne a tese ér doo u se gba uwer u eren msen ga yô.

Steve u se ter kwagh na ken ngeren u hiihii la kaa ér, “Luun er m de u eren msen yô, ma m vôr a uma ngise je.” Ka nyi yange i wase un ve a gbe uwer u eren msen ga? Yange hii u henen Bibilo nahan fa er i gbe u una eren msen shi una gba uwer u eren ga yô. Steve kaa ér, “Ka m er msen hen Aôndo m sugh un sha hanma iwasen i azende a am a nem cii. Er m eren msen yô, hemba saan mo iyol hegen.”

Jenny, u yange nenge ér un kuma u Aôndo una ungwa msen na ga la di ye? A kaa ér, “Hanma shighe u yange mea nenge mer m gba kwagh cuku tsô kpaa ga yô, m zamber a Aôndo mer a wasem me kav er i hii ve m nenge mer m gba kwagh ga yum nahan yô.” Nahan kwagh la wase un nena? A kaa ér, “Er m lamen a Aôndo ken msen yô, kwagh la wasem u nengen iyol yam er Aôndo kpa a nengen mo la, shi nengen mer aluer ishima nam ibo sha ma kwagh je kpa, un yô a nam ibo ga. Kwagh la wasem u eren msen gban uwer ga.” Ka nyi i dugh kere? A kaa ér, “Msen wasem u nengen mer Yehova ngu kpôô kpôô; ngu Aôndo u m doo un ishima shi a wem ikyo yô, shi ngu Terem man Ijende yam, undun mo ga, shi wasen mo er m lu nôngon mer me eren kwagh u a soo la hanma shighe yô.”

Shi nenge ase kwagh u yange er kwase ugen ne kpaa, iti na ér Isabel. Yange we iyav yô, mbatwerev kaa a na ér una va mar wan a due a iwan i vihin tsung. Ongo nahan yô, a vôr a uma. Mbagenev je yô wa un kwagh ér a̱ vihi iyav mbura. Isabel kaa ér, “Yange ishima zam iyol sha kwagh ne je yô, lum er ka u me kpe nahan.” Nahan yange er nena? A kaa ér, “Yange m er msen hen Aôndo sha kwagh ne acin imôngo mer a wasem.” Shighe kar yô, a mar wan u nomso, iti na ér Gerard, shi due a iwan er i vande ôron nahan. Isabel nenge ér Aôndo ongo mbamsen nav kpa? Een, a nenge nahan! Sha ci u nyi? Sha ci u a kaa ér, “Ka mea nenge er i saan wan wam u a lu anyom 14 hegen la iyol, shin er a gbe iwan nahan kpaa yô, m nenge mer ka gbenda u hemban doon u Aôndo a ongo msen wam yô, ka iveren i hemban cii i Yehova Aôndo a nem yô.”

Kwagh u Isabel ôr a ishima na i môm la umbur se mkaanem ma Orpasalmi nger ne, a kaa ér: “TERE, U ungwa isharen i mbaasemaleghlegh; U taver asema ve, U gema U ver ato sha u ungwan.” (Pasalmi 10:17) Nenge er se lu a atôakaa a doon tsung a eren msen gban uwer ga sha wono!

I nger mbamsen mba Yesu la kpishi ken Bibilo. Msen u hemban ken ve yô, ka u yange er sha u tesen mbahenen nav er ve kpa vea eren msen la. Ka nyi se fatyô u henen ken msen shono?