Матта
28 Сабат гүни геченден соң, хепдәниң биринҗи гүни* җахан ягтылып башланда, магдалалы Меръем билен бейлеки Меръем мазары гөрмәге гелдилер.
2 Бирденкә гүйчли ер титрәп, Ехованың* перишдеси гөкден ере инди. Ол мазарың агзындакы дашы айырды-да, онуң үстүнде отурды. 3 Перишде йылдырым кимин ягты сачярды, эгин-эшиги болса гар ялы ап-акды. 4 Шонда гаравуллар горкудан яңа сандырашып, доңуп галдылар.
5 Перишде аяллара шейле дийди: «Горкмаң, мен сизиң пүрсе чүйленен Исаны гөзлейәндигиңизи билйәрин. 6 Ол бу ерде дәл. Ол айдышы ялы дирелди. Гелиң-де, онуң ятан ерини гөрүң. 7 Сиз чалт гидиң-де, шәгиртлерине онуң дирелендигини айдың. Ол сизден өң Җелилә барар. Сиз оны шол ерде гөрерсиңиз. Айданларымы ядыңыздан чыкараймаң».
8 Аяллар шол бада мазарың янындан гитдилер ве бу хабары горкы хем улы шатлык билен шәгиртлере етирмек үчин ылгадылар. 9 Бирденкә Иса олара душуп: «Салам!» дийди. Олар онуң янына барып, аягына йыкылдылар-да, тагзым этдилер. 10 Соңра Иса: «Горкмаң! Гидиң-де, доганларыма* Җелилә бармалыдыгыны айдың. Олар мени шол ерде гөрерлер» дийди.
11 Аяллар хениз ёлдака, гаравулларың кәбири шәхере барып, улы руханылара әхли болан затлары гүррүң бердилер. 12 Шонда олар яшулулар билен йыгнанышып маслахатлашдылар. Соңра эсгерлере көп күмүш теңңе берип, 13 адамлара шейле диймеги табшырдылар: «„Онуң шәгиртлери гиҗе гелип, уклап ятыркак җеседи огурладылар“ дийиң. 14 Эгер бу затлар хөкүмдарың гулагына етсе, биз оңа әхли зады дүшүндирерис*, сиз алада этмәң». 15 Олар күмүш теңңелери алып, айдылышы ялы этдилер. Бу гүррүң гиңден яйрап, ехудыларың арасында шу гүнлере ченли айдыляр.
16 Он бир шәгирди болса, Иса билен душушмак үчин Җелилә барып, онуң айдышы ялы, дага чыкдылар. 17 Олар Исаны гөрүп, тагзым этдилер, эмма кәбирлери оңа шүбхеленйәрдилер. 18 Иса оларың янына гелип, шейле дийди: «Гөкде ве ерде әхли ыгтыяр маңа берилди. 19 Шонуң үчин гидиң-де, әхли халклардан шәгирт тайярлаң. Олары Ата, Огул ве мукаддес рухуң ады билен сува чүмдүриң. 20 Олара мениң әхли табшыран затларымы берҗай этмеги өвредиң. Ине, мен дүнйәниң* соңуна ченли элмыдама сизиң билен боларын».