Яхя
17 Иса булары айдансоң, гөге бакып, шейле дога этди: «Атам, вагт гелип етди. Оглуң сени шөхратландырар ялы, сен хем Оглуңы шөхратландыр. 2 Оглуң хеммелере эбеди яшайшы берип билер ялы, сен оңа әхли адамларың үстүнден ыгтыяр бердиң. 3 Эбеди яшайшы алмак үчин, олар сен, ягны еке-тәк хак Худай ве сениң иберениң Иса Месих хакда билим алмалыдыр*. 4 Маңа табшыран ишиңи тамамлап, сени ер йүзүнде шөхратландырдым. 5 Инди болса, Атам, ынсан ярадылмаздан өң сениң яныңдакам болан шөхратымы ене-де берип, мени шөхратландыр.
6 Маңа шу дүнйәден берен адамларыңа сениң адыңы аян этдим. Олар сениңкиди, сен хем олары маңа бердиң, олар сениң сөзүңи берҗай этдилер*. 7 Олар маңа берен әхли задыңы билдилер. 8 Маңа берен сөзлериңи айданымда, олар кабул этдилер ве сениң векилиң хөкмүнде гелендигиме долы гөз етирдилер, мени сениң иберендигиңе хем иман этдилер. 9 Мен олар үчин сенден хайыш эдйәрин; дүнйә үчин дәл-де, сениң маңа берен адамларың үчин хайыш эдйәрин, себәби олар сениңкидир. 10 Мениң әхли задым сениңкидир, сениң әхли задың болса мениңкидир, мен оларың арасында шөхратландым.
11 Мен дүнйәден гидип барярын, йөне олар дүнйәде галярлар, мен болса яныңа барярын. Эй мукаддес Атам, олары өз адың, ягны маңа гөтермәге берен адың хатырасы үчин гора. Шонда бизиң бирликде болшумыз ялы, олар хем бирликде боларлар. 12 Мен оларың янындакам, сениң адың, ягны маңа гөтермәге берен адың хатырасы үчин олары горадым; хава, мен олары горадым ве оларың хич бири хеләк болмады. Язгылардакы сөзлер берҗай болар ялы, оларың диңе бири йитер ве хеләк болар. 13 Хәзир болса сениң яныңа барярын. Олар мендәки шатлыгы долы дуюп билер ялы, бу сөзлери дүнйәдекәм айдярын. 14 Олара сениң сөзүңи бердим, эмма дүнйә олары йигренди, себәби мениң дүнйәден болмайшым ялы, олар хем дүнйәден дәлдирлер.
15 Мен олары дүнйәден алмагыңы дәл-де, залымдан* горамагыңы хайыш эдйәрин. 16 Мениң дүнйәден болмайшым ялы, олар хем дүнйәден дәлдирлер. 17 Олары сөзүң билен мукаддес эт, себәби сениң сөзүң хакыкатдыр. 18 Мени шу дүнйә иберишиң ялы, мен хем олары дүнйә ибердим. 19 Олар хакыкат аркалы мукаддес болуп билер ялы, мен оларың хатырасы үчин мукаддеслигими саклаярын.
20 Мен диңе олар үчин дәл, эйсем, оларың өвредйән затларыны диңләп, маңа иман этҗек адамлар үчин хем хайыш эдйәрин. 21 Атам, шонда сениң мениң билен, мениң хем сениң билен бирликде болшум ялы, оларың әхлиси-де бирликде боларлар. Шейлеликде, олар бизиң билен бирликде боларлар, шонда дүнйә хем мени сениң иберендигиңе иман эдип билер. 22 Оларың хем бизиң ялы бирликде болмагы үчин, олара сениң маңа берен шөхратыңы бердим. 23 Оларың долы бирликде болмагы үчин, мен олар билен, сен хем мениң билен бирликдесиң. Шонда дүнйә мени сениң иберендигиңе ве мени сөйшүң ялы, олары-да сөййәндигиңе гөз етирер. 24 Атам, мен ниреде болсам, маңа берен адамларың хем янымда болмагыны хайыш эдйәрин. Шонда олар сениң маңа берен шөхратыңы гөрүп билерлер, себәби сен мени дүнйә ярадылманка сөйдүң. 25 Эй догручыл Атам, аслында, дүнйә сени танамады, йөне мен сени танаярын, олар хем мени сениң иберендигиңи билйәрлер. 26 Мен олара адыңы танатдым, ене-де танадарын. Шонда маңа болан сөйгиң оларда-да болар, мен хем олар билен бирликде боларын».