Яхя
19 Шонда Пилатус эсгерлере Исаны гамчыламагы* буюрды. 2 Эсгерлер онуң келлесине тикенекден өрүлен тәҗи, эгнине болса гырмызы реңкли матаны гейдирдилер. 3 Олар Исаның янына барып: «Салам, ехудыларың Патышасы!» дийшип, йүзүне шарпык чалярдылар. 4 Пилатус ене-де мәрекәниң янына чыкып: «Мен оны гүнәкәрләр ялы, хич зат тапмадым, ине, шонуң үчин хем оны яныңыза чыкардым» дийди. 5 Шонда башына тикенекден тәч гейдирилен ве эгнине гырмызы реңкли дон атылан Исаны гетирдилер. Пилатус: «Ине ол адам!» дийди. 6 Эмма улы руханылар ве гөзегчилер Исаны гөрүп: «Оны пүрсе чүйле! Оны пүрсе чүйле!» дийип гыгырышдылар. Пилатус болса: «Алың-да, оңа өзүңиз җеза бериң, себәби мен оны гүнәкәрләр ялы хич зат тапмадым» дийди. 7 Ехудылар: «Бизиң канунымыза гөрә оны өлүме табшырмалы, себәби ол өзүне Худайың оглы диййәр» дийип җогап бердилер.
8 Пилатус оларың айдан сөзлерини эшидип, өңкүден-де бетер горкды. 9 Ол көшге гирди-де, Исадан: «Сен ниреден боларсың?» дийип сорады. Йөне Иса хич зат җогап бермеди. 10 Шонда Пилатус: «Сен мениң билен геплешмеҗек болярмың? Сени бошатмага-да, җезаландырмага-да* ыгтыярымың бардыгыны билмейәрмиң?» дийди. 11 Иса оңа: «Саңа Худайдан берилмедик болса, мениң үстүмден ыгтыярың болмазды. Шонуң үчин хем мени сениң элиңе табшыран адамың гүнәси хас улудыр» дийип җогап берди.
12 Шонда Пилатус ене-де Исаны бошатмагың угруны гөзләп башлады, эмма ехудылар: «Эгер сен оны бошатсаң, Сезарың* досты дәлсиң. Өзүне патыша диййән хер кес Сезарың гаршысына чыкяндыр» дийип гыгырышдылар. 13 Пилатус бу сөзлери эшиденде, Исаны дашарык чыкарды-да, «Даш секи» дийилйән ерде хөкүм күрсүсине гечип отурды. Ол ере еврейче Габбата дийилйәр. 14 Шол вагт Пасха байрамына* тайярлык гөрүлйән гүнди; сагат алты* төверегиди. Пилатус ехудылара: «Ине сизиң патышаңыз!» дийди. 15 Эмма мәреке: «Оны өлдүр! Оны өлдүр! Оны пүрсе чүйле!» дийип гыгырярды. Пилатус болса: «Патышаңызы җезаландырайынмы?» дийди. Улы руханылар: «Бизиң Сезардан башга патышамыз ёк» дийип җогап бердилер. 16 Шонда Пилатус Исаны пүрсе чүйлемеги табшырды.
Есгерлер хем оны алып гитдилер. 17 Олар җебир пүрсүни* Исаның өзүне гөтердип, оны еврейче Галгота, ягны «Келлечанак» дийилйән ере алып бардылар. 18 Ол ерде эсгерлер Исаның янында башга-да ики адамы пүрсе чүйледилер: бирини саг тарапында, бейлекисини чеп тарапында, Иса болса оларың ортасындады. 19 Шейле-де Пилатус бир тагтаның йүзүне: «Ехудыларың Патышасы — назаретли Иса» диен сөзлери яздырып, оны пүрсүң ёкарсына беркитди. 20 Ехудыларың көпүси язгыны окады, себәби Исаның пүрсе чүйленен ери Иерусалимиң голайындады. Ол еврейче, латынча ве грекче язылыпды. 21 Эмма ехудыларың улы руханылары Пилатуса: «„Ехудыларың Патышасы“ дийип язма-да, онуң айдышы ялы, „Мен ехудыларың Патышасы“ дийип яз» дийдилер. 22 Пилатус болса: «Язҗак задымы эййәм яздым» дийип җогап берди.
23 Эсгерлер Исаны пүрсе чүйләнлеринден соң, онуң эшиклерини алып, өз араларында дөрде бөлдүлер-де, херси бирини алды. Йөне ички эшигини аланларында, онуң тикинсиз, тутушлыгына докаландыгыны гөрүп, 24 бири-бирине: «Гелиң, муны йыртмалың-да, биҗе атып, киме дүшҗегини билелиң» дийдилер. Бу затлар Язгылардакы: «Олар мениң донумы өзара пайлашдылар, эшигим үчин биҗе атдылар» диен сөзлериң берҗай болмагы үчин болды. Эсгерлер хут шейле-де этдилер.
25 Исаның пүрсе чүйленен еринде онуң эҗеси, эҗесиниң уясы, Клопасың аялы Меръем ве магдалалы Меръем дагы дурдулар. 26 Иса эҗесини ве онуң янында дуран сөйгүли шәгирдини гөренде: «Эҗе, ине сениң оглуң!» дийди. 27 Соңра шәгирдине: «Ине сениң эҗең!» дийди. Шондан соң Исаның шәгирди оны өз өйүне алды.
28 Бираз вагт геченсоң, Иса Атасының табшыран әхли затларының ерине етйәндигини билип: «Сувсадым» дийди. Ол муны Язгылардакы сөзлериң берҗай болмагы үчин айтды. 29 Шол ерде ичи туршы шерапдан долы тоюндан ясалан кичирәк гап барды. Дуранларың бири пагтаны* алды-да, оны туршы шераплы габа батырып, бир таяга* беркитди, соңра Иса узатды. 30 Иса туршы шерапдан датды-да: «Маңа табшыран затларың әхлисини берҗай этдим!» дийди, соңра башыны эгип, җан* берди.
31 Шол гүн Сабат гүнүне* (ол бейик Сабат гүни хасапланярды) тайярлык гөрүлйәрди. Пүрсе чүйленен адамлары Сабат гүнүне ченли сакламаз ялы, ехудылар Пилатусдан оларың инҗиклерини дөвүп, пүрсден айырмагы сорадылар. 32 Шонда эсгерлер гелип, Исаның ики тарапында пүрсе чүйленен адамларың инҗиклерини дөвдүлер. 33 Эмма олар Исаның янына геленлеринде, эййәм өлендигини гөрүп, инҗигини дөвмедилер. 34 Шонда эсгерлериң бири найзаны алды-да, онуң бөврүне санчды. Шол бада ган билен сув акды. 35 Булары гөзи билен гөрен адам хабар берди ве онуң шаятлыгы хакыкатдыр. Сиз бу затлара иман эдип билер ялы, ол айдянларының хакыкатдыгына гүвә гечйәндир. 36 Шейдип, Язгылардакы: «Онуң екеҗе сүңки-де дөвүлмез» диен сөзлер берҗай болды. 37 Язгыларың башга бир еринде болса: «Олар найза билен санҗылан адама середип дурарлар» дийилйәр.
38 Бу затлардан соң ариматиялы Юсуп Пилатусдан Исаның җеседини бермеги хайыш этди. Ол Исаның шәгирдиди, йөне ехуды ёлбашчыларындан горкуп, муны хич киме айтмаярды. Пилатус оңа ругсат беренсоң, ол гелди-де, Исаның җеседини алып гитди. 39 Исаның янына өң гиҗе баран Никодим хем аграмы такмынан 30 кг* болан бир зада долангы мирра* билен алое алып гелди. 40 Олар Исаның җеседини алдылар-да, ехудыларың дәбине гөрә оны җайламак үчин, якымлы ыслы отлар билен зыгыр мата доладылар. 41 Исаның пүрсе чүйленен ериниң голайында бир багың ичинде хениз хич ким җайланмадык тәзе габыр барды. 42 Ехудыларың байрамчылыга тайярланян гүни ве габыр хем голайда боланы үчин, олар Исаны шол ерде җайладылар.