1 Коринфлилер
10 Доганлар, сизиң шуны билмегиңизи ислейәрин: ата-бабаларымызың әхлиси булудың астында гезйәрдилер. Әхлиси деңзиң ичинден гечип, 2 Мусаның шәгиртлери хөкмүнде булут ве деңиз аркалы сува чүмдүрилдилер. 3 Олар шол бир рухы иймитден ийдилер 4 ве Худайың берен сувуны ичдилер. Олар өң ызларына дүшүп гелйән рухы гаяның сувуны ичдилер. Ол гая Месихи аңладяр*. 5 Муңа гарамаздан, оларың көпүси Худайың гөвнүнден турмандыгы үчин чөлде хеләк болдулар.
6 Ата-бабаларымыз ялы эрбет затлары ислемезлигимиз үчин булар бизе сапак болды. 7 Оларың кәбири ялы бутпараз болмаң; себәби шейле язылгыдыр: «Адамлар ийип-ичмәге отурдылар, соңра туруп, вагтыны хош гечирдилер». 8 Оларың кәбири ялы ахлаксызлык* хем этмәлиң, себәби ахлаксызлык эдип, бир гүнде 23 мүң адам хеләк болды. 9 Оларың кәбири ялы Ехованы* сынамалың, себәби оны сынан адамлары йыланлар чакып өлдүрди. 10 Оларың кәбири ялы нәгиле хем болмаң, себәби шейле эденлер перишде аркалы ёк эдилдилер. 11 Оларың башына инен затлардан сапак эдинмегимиз үчин, булар бизе, ягны шу заманың* ахырына гарашянлара дуйдурыш хөкмүнде языландыр.
12 Шонуң үчин берк дурандырын дийип пикир эдйән адам йыкылмагындан сересап болсун. 13 Сиз адамларың башына дүшйән сынаглардан башга сынага учраян дәлсиңиз. Эмма Худай берен сөзүне вепалыдыр. Ол сизиң гүйҗүңизден артык сыналмагыңыза ёл бермез, гайтам, сынага учраныңызда, дөз гелип билмегиңиз үчин чыкалга-да ачар.
14 Шол себәпли, эзиз доганларым, бутпаразлыкдан гачың. 15 Сиз дүшүнҗели адамларсыңыз; шонуң үчин айдянларымың догрудыгы я нәдогрудыгы хакда ойланып гөрүң. 16 Эйсем, Худая миннетдарлык кәсеси билен дога эденимизде, Месихиң ганындан пейда аляндыгымызы гөркезмейәрисми? Чөреги бөленимизде, Месихиң беденинден пейда аляндыгымызы гөркезмейәрисми? 17 Себәби чөрек бирдир, биз хем көп болсак-да, бир бедендирис ве хеммәмиз бир чөрекден иййәндирис.
18 Ысрайыл халкына середиң: гурбан эдилен затлардан иййәнлер гурбанлык сыпасындакы затдан ийдиги болмаярмы нәме? 19 Аслында, мен нәме дийҗек болярын? Бута гурбан эдилен эт ваҗыпмы я-да бутуң өзи? 20 Ёк, мен муны дийҗек болмаярын. Эмма башга халклар гурбан гетиренлеринде, оны Худая дәл-де, җынлара гетирйәрлер; мен болса сизиң җынлар билен гатнашмагыңызы ислемейәрин. 21 Сиз хем Ехованың* кәсесинден, хем җынларың кәсесинден ичип билмерсиңиз; хем «Ехованың* сачагындан», хем җынларың сачагындан ийип билмерсиңиз. 22 Я-да «биз Ехованың* габанҗаңлыгыны оярмакчы болярысмы»? Эйсем, биз ондан гүйчлүми?
23 Хемме зат ругсат эдилйәндир, йөне хемме зат пейдалы дәлдир. Хемме зат ругсат эдилйәндир, йөне хемме зат рухы тайдан беркидйән дәлдир. 24 Гой, хер кес өз пейдасыны дәл-де, башгаларың пейдасыны гөзлесин.
25 Эт базарында сатылян әхли зады ынсабыңыз эзъет бермез ялы сораман ийибериң. 26 Себәби «ер ве ондакы әхли зат Ехованыңкыдыр*». 27 Эгер иман этмейән адам сизи нахара чагырса, сиз хем гитмек ислесеңиз, ынсабыңыз эзъет бермез ялы, өңүңизде нәме гоюлса, сораман ийибериң. 28 Эмма бири сизе: «Бу бутлара хөдүр эдилен» дийсе, онда муны айдан адам ве онуң ынсабы үчин ол эти иймәң. 29 Мен сизиң ынсабыңызы дәл-де, ол адамың ынсабыны гөз өңүнде тутярын. Ислендик зады этмәге эркинлигим болса-да, башга адамың ынсабының мени язгармагыны ислемейәрин. 30 Хатда Худая миннетдарлык айдып ийсем-де, башгалар мени язгарса, догры болармы?
31 Шол себәпли ийсеңиз-де, ичсеңиз-де, башга хер нәме этсеңиз-де, хемме зады Худайы шөхратландырмак үчин эдиң. 32 Ехудыларың, греклериң ве Худайың йыгнагының бүдремегине себәп болмаң. 33 Мен хем өз пейдамы гөзлемән, әхли затда хемме адамларың гөвнүнден турмага чалышярын. Мен муны көплериң халас болмагы үчин эдйәрин.