1 Коринфлилер
12 Доганлар, инди болса мен сизиң Худайың рухы аркалы берилйән сылаглар хакда билмегиңизи ислейәрин. 2 Сиз месихчи болманкаңыз, гепләп билмейән бутларың тәсирине дүшүп, олара сежде эдйәрдиңиз. Олар сизи ислән угруна чекип, ызына эердйәрди. 3 Шонуң үчин сизиң шуңа дүшүнмегиңизи ислейәрин: Худайың рухы билен геплейән адам: «Иса нәлет болсун!» диймез я-да мукаддес рухы болмадык адам: «Иса Халыпам!» дийип билмез.
4 Хава, сылаглар дүрли-дүрли болса-да, рух бирдир. 5 Гуллугың дүрли гөрнүшлери болса-да, Халыпамыз бирдир. 6 Эдилйән ишлер дүрли-дүрли болса-да, олары ерине етирмәге укып берйән Худай бирдир. 7 Эмма мукаддес рух хер бир адама пейдалы максат үчин берлип, олар аркалы аян боляндыр. 8 Себәби мукаддес рух бирине пайхаслы геплемәге укып берсе, бейлекисине билим берйәр*. 9 Мукаддес рух бирине иман берсе, бейлекисине сыркавлары сагалтмак укыбыны берйәр. 10 Бири шол рух аркалы гудратлы ишлер этсе, бейлекиси пыгамберлик эдйәр. Бири ылхамлы сөзлериң Худайдан гелендигини я-да гелмәндигини сайгарса, бейлекиси дүрли диллерде геплейәр, ене бири олары терҗиме эдйәр. 11 Йөне буларың хеммеси шол бир рух аркалы ве Худайың ислейши ялы, хер кесе айратынлыкда берилйәндир.
12 Бедениң агзалары көпдүр. Йөне олар көп болса-да, хеммеси бир бедене дегишлидир. Ол беден — Месихдир. 13 Ехуды я грек болсун, гул я азат болсун, бизиң хеммәмиз бир рух аркалы бир бедене чүмдүрилдик ве әхлимиз шол бир рухы алдык.
14 Догрудан-да, бедениң бир дәл-де, көп агзалары боляндыр. 15 Эгер аяк: «Мен эл дәл, шонуң үчин бедениң агзасы дәлдирин» дийсе, бу онуң бедене дегишли дәлдигини аңлатмаяр. 16 Эгер гулак: «Мен гөз дәл, шонуң үчин бедениң агзасы дәлдирин» дийсе, бу онуң бедене дегишли дәлдигини аңлатмаяр. 17 Эгер тутуш беден гөз болан болса, онда бедениң эшидиш агзасы ниреде боларды? Эгер тутуш беден гулакдан ыбарат болан болса, онда ыс алыш агза ниреде боларды? 18 Йөне Худай бедениң хер бир агзасыны ислейши ялы, өз еринде гояндыр.
19 Эгер оларың хеммеси шол бир агза болан болса, онда ол нәдип беден болсун? 20 Эмма агзалар көп болса-да, беден бирдир. 21 Гөз эле: «Сен маңа герек дәл» дийип билмез я-да келле аяклара: «Сиз маңа герек дәл» дийип билмез. 22 Гайтам, бедениң говшак гөрүнйән агзалары хас гереклидир. 23 Биз беденимизиң гелшиксиз гөрүнйән агзаларына хас көп үнс берйәрис. Шонда овадан гөрүнмейән агзаларымыз хас гөркли боляндыр. 24 Себәби гелшикли агзаларымыз алада эдилмегине мәтәч дәлдир. Муңа гарамаздан, Худай бедени гурнанда, онуң гелшиксиз гөрүнйән агзаларына хас көп хормат гойды. 25 Ол муны беденде бөлүнишик болман, гайтам, онуң агзалары бири-бириниң аладасыны этмеклери үчин этди. 26 Эгер бедениң бир агзасы эҗир чексе, бейлеки агзалары хем онуң билен биле эҗир чекйәндир; эгер бир агза шөхратланса, бейлеки агзалар хем онуң билен биле шатланяндыр.
27 Сиз Месихиң бедени болуп, хер бириңиз айратынлыкда онуң агзасысыңыз. 28 Худай йыгнакда хер киме айратын орун берди: илки ресуллары, соңра пыгамберлери, ондан соң мугаллымлары, гудратлы ишлери эдйәнлери, сыркавлары сагалдянлары белледи; соңра башгалара көмек этмек гуллугыны, ёлбашчылык этмек ве дүрли дилде геплемек укыбыны берди. 29 Эйсем, хеммелер ресулмы? Хеммелер пыгамберми? Хеммелер мугаллыммы? Гудратлы ишлери хеммеси эдйәрми? 30 Сагалтмак укыбы хеммесинде бармы? Хеммелер дүрли дилде геплейәрми? Хеммеси терҗимечими? 31 Йөне сиз хас улы сылаг алмак үчин җан эдиң. Мен болса сизе иң аҗайып ёлы гөркезерин.