1 Коринфлилер

16 Инди болса мукаддеслер үчин йыгнанылян пул хакда айдайын: бу бабатда сиз Галатядакы йыгнаклара берен гөркезмәме эерип билерсиңиз. 2 Хепдәниң биринҗи гүни* хер ким ягдайына гөрә гөвнүнден чыкараныны айрып гойсун. Шонда мен баранымдан соң, пул йыгнамалы болмарсыңыз. 3 Эмма мен яныңыза баранымда, сизиң хөвес билен берен совгатларыңызы хатыңызда агзан ынамдар адамларыңыз аркалы Иерусалиме иберерин. 4 Эгер ерликли болса, мен хем олар билен биле гидерин.

5 Мен Македонияның үсти билен гечип баряркам, сизиң яныңыза барарын. Себәби мен Македонияның үсти билен гечип гитмекчи. 6 Белки-де, сизиң яныңызда галып, хатда гышы-да шол ерде гечирерин. Шонда сиз мени ярты ёла ченли гитмели ериме уградып билерсиңиз. 7 Себәби мен сизи йөне бир йүз угруна гөрмек ислемейәрин. Эгер Ехова* ёл берсе, яныңызда бираз вагт болмагы умыт эдйәрин. 8 Йөне мен Пентикост байрамчылыгына ченли Эфесде галмак ислейәрин. 9 Себәби Худай маңа Эфесде гуллук этмек үчин улы мүмкинчилик дөретди*. Йөне бу ерде душманлар хем көпдүр.

10 Эгер Тимотеос барса, хич зада биынҗалык болмаз ялы, онуң аладасыны эдиң. Себәби ол хем мениң ялы Ехованың* ишини берҗай эдйәндир. 11 Шонуң үчин, гой, хич ким оны әсгермезлик этмесин. Мениң яныма гелип билер ялы, оны саг-аман ёла салың. Себәби мен хем, доганлар хем оңа гарашяр.

12 Доганымыз Аполлос хакда айтсам, мен оңа доганлар билен биле яныңыза бармагы хайыш эдипдим. Йөне ол яныңыза хәзир барып билмейәр, мүмкинчилик дөрәнде болса барар.

13 Оя болуң, иманда берк дуруң, элмыдама батыргай* ве гүйчли болуң. 14 Әхли зады сөйги билен эдиң.

15 Сиз Стефанисиң өй-ичерисиниң Ахаяда илкинҗи шәгиртлер боландыкларыны ве өзлерини мукаддеслере гуллук этмәге багыш эдендиклерини билйәнсиңиз. Шонуң үчин, доганлар, мен сизе шуны үндейәрин: 16 араңыздакы шейле адамлара, бизиң билен хызматдашлык эдип, агыр зәхмет чекйәнлериң әхлисине мундан бейләк-де табын болуң. 17 Мен Стефанисиң, Фортунатың ве Ахаякусың янымдадыгына бегенйәрин. Себәби олар сизиң ёклугыңызы билдирмедилер. 18 Олар мениң хем-де сизиң гөвнүңизи гөтердилер. Шол себәпли шейле адамларың гадырыны билиң.

19 Азиядакы йыгнаклар сизе салам айдяр. Акила билен Приска* ве оларың өйүндәки йыгнагың агзалары хем сизе чын йүрекден доганлык саламыны ёллаярлар. 20 Шу ердәки доганларың бары сизе салам айдяр. Бири-бириңиз билен мәхирли* саламлашың.

21 Ине, мен Павлус, өз элим билен сизе салам язярын.

22 Эгер бири Халыпамызы сөймейән болса, гой, оңа нәлет болсун. Эй Халыпамыз, гел! 23 Гой, Халыпамыз Исаның мерхемети сизиң билен болсун. 24 Месих Исаның шәгиртлери болан сизиң әхлиңизи мен хем онуң сизи сөйши ялы сөййәрин.