Галатялылар
4 Сизе диййәрин, мирасдүшер чага әхли задың хоҗайыны болса-да, онуң гулдан хич хили тапавуды ёкдур. 2 Ол какасының беллән вагтына ченли тербиечилериң ве хызматкәрлериң гөзегчилиги астында боляндыр. 3 Шонуң ялы-да биз хем чагакак, бу дүнйәниң йөрелгесине ве пикирине эерйән гуллардык. 4 Эмма белленен вагт тамамлананда, Худай Оглуны иберди. Ол аялдан доглуп, канун астында болды. 5 Худай бизи огуллыга алмак иследи, Огул хем канун астындакылары сатын алып, азат этди.
6 Сиз Худайың огуллары боландыгыңыз үчин, ол Оглуна берен мукаддес рухуны йүрегимизе салды. Бу рух аркалы биз Оңа: «Авва*, Ата!» дийип йүзленйәрис. 7 Диймек, сиз инди гул дәл-де, огулсыңыз; огул болсаңыз, Худай сизи мирасдүшер хем эдйәндир.
8 Эмма сиз Худайы танамаян вагтыңыз ялан таңрыларың гулларыдыңыз. 9 Инди сиз Худайы танадыңыз, хас догрусы, Худай сизи танады. Онда сиз нәдип дүнйәниң бош ишлерини этмек үчин ызыңыза доланып билйәрсиңиз? 10 Сиз гүнлери, айлары, белли бир вагтлары ве йыллары сыпдырман беллейәрсиңиз. 11 Мен сизиң үчин эден тагаллаларым бидерек болар өйдүп горкярын.
12 Доганлар, менем өң сизиң ялыдым, йөне үйтгедим. Шонуң үчин ялбарярын, мениң үйтгейшим ялы, сиз-де үйтгәң. Сиз маңа яманлык этмәндиңиз. 13 Сизе башда хош хабары ыглан этмегиме яравсызлыгымың себәп боландыгыны билйәнсиңиз. 14 Мениң яравсызлыгым сизе сынаг болса-да, сиз маңа нәгилелик я-да йигренч билдирмедиңиз. Гайтам, Худайың бир перишдесини я-да хамала Месих Исаны кабул эден ялы кабул этдиңиз. 15 Ханы, сизиң өңки шатлыгыңыз? Шол вагт сиз маңа гөзлериңизи оюп бермәге-де тайындыңыз. Мен муңа гүвә гечйәрин. 16 Инди хакыкаты айдяным үчин сизе душман болдуммы? 17 Олар сизи өз тарапына чекҗек болуп җан эдйәрлер, йөне оларың максады эрбетдир; олар сизи өз ызларына эертмек үчин менден дашлашдырмак ислейәрлер. 18 Эгер бири сизи говы максат билен өз тарапына чекҗек болса, ягшы иш эдйәндир. Йөне диңе мениң бар вагтым дәл, эйсем, элмыдама шейле этсин. 19 Балаларым, сиз Месихе меңзәп, онуң хәсиетлерине долы гейинйәнчәңиз, мен чага догурян аял ялы сизиң үчин ене-де гөрги гөрйәрин. 20 Мен хәзир яныңызда болуп, сизиң билен юмшак геплешмек ислейәрин. Мен сизе нәме боляндыгыны билмейәрин.
21 Эй канун астында яшамак ислейәнлер, сиз Канунда нәме дийилйәндигини билмейәрсиңизми? 22 Меселем, Язгыларда Ыбрайымың ики оглы барды дийилйәр: бири гырнакдан, бири азат аялдан. 23 Онуң гырнакдан болан оглы адаты чагалар ялы* догулды, азат аялдан болан оглы — Худайың вадасы боюнча дүнйә инди. 24 Бу затларың башга-да манысы бар. Ики аял ики әхти аңладып, оларың бири Синай дагында баглашылды; шол әхтиң астындакы чагаларың хеммеси гулдур. Бу әхт Хаҗардыр. 25 Хаҗар Арабыстанда ерлешйән Синай дагыны, шу гүнки Иерусалими аңладяр. Ол чагалары билен гулчулыкдадыр. 26 Эмма гөкдәки Иерусалим азат, ол бизиң эҗемиздир.
27 Язгыларда шейле дийилйәр: «Эй чага догурмаян аял, беген; бургының гөргүсини гөрмедик аял, шатлыкдан яңа гыгыр; себәби чага догурмаян аялың чагалары әрли аялыңкыдан хас көпдүр». 28 Доганлар, сиз хем Ысхак ялы вада эдилен чагаларсыңыз. 29 Эмма адаты* доглан чаганың рухдан доглан чаганы ызарлап башлайшы ялы, шу гүнлер хем шейледир. 30 Эйсем, Язгыларда нәме дийилйәр? «Гырнагы ве онуң оглуны ков, себәби гырнагың оглы дәл-де, азат аялың оглы мирасдүшер болар». 31 Хава, доганлар, биз гырнагың дәл-де, азат аялың огулларыдырыс.