2 Селаниклилер

1 Мен Павлус, Силванус* ве Тимотеос билен Ата Худайымыз хем-де Халыпамыз Иса Месих билен бирликде болан Селаникдәки йыгнага хат язярын.

2 Ата Худайымыздан ве Халыпамыз Иса Месихден сизе мерхемет хем парахатлык болсун.

3 Доганлар, биз сизиң үчин Худая элмыдама миннетдарлык айтмага өзүмизи борчлы хасаплаярыс. Бу ерликлидир, себәби иманыңыз гитдигиче беркәп, бир-бириңизе болан сөйгиңиз артяр. 4 Шейлеликде, биз Худайың йыгнакларының арасында сиз хакда буйсанч билен геплейәрис. Себәби сиз чыдамлылык гөркезип, ызарламалара иман билен дөз гелйәрсиңиз ве кынчылыкларда хорлук чексеңиз-де, олара чыдаярсыңыз. 5 Мунуң өзи Худайың догручыл хөкүм эдйәндигини субут эдйәр. Сиз хорлук чекип, Худайың Патышалыгына гирмәге мынасып боларсыңыз.

6 Догрудан-да, сизе хорлук чекдирйәнлере Худайың хорлук чекдирип гайтаргы бермеги ерликлидир. 7 Эмма хорлук чекйәнлер, ягны сиз Халыпамыз Иса гүйчли перишделери билен гөкде пейда боланда, бизиң билен билеликде халас боларсыңыз. 8 Шонда ол* Худайы танамаянлары ве Халыпамыз Иса барадакы хош хабара гулак асмаянлары одуң ялны билен җезалап арыны алар. 9 Хава, Халыпамыз олары хөкүм эдер. Олар эбедилик җезасыны чекерлер, олара хич ким Халыпамызың бейик гүйҗүнден халас болмага көмек эдип билмез. 10 Халыпамыз өз мукаддеслери билен биле шөхратланмак үчин геленде, бу затлар ерине етер ве иман эденлериң әхлиси шол гүн оңа хайран галып середерлер. Себәби сиз бизиң эден шаятлыгымыза иман этдиңиз.

11 Ине, шол себәпли-де биз элмыдама сизиң үчин дога эдип, Худайың сизи өз чагырышына мынасып гөрмегини дилейәрис. Гой, ол өз гүйҗи аркалы этҗек әхли ягшы* ишлерини долы берҗай эдип, сизиң иман билен эдйән ишлериңизе үстүнлик берсин. 12 Шонда сиз аркалы Халыпамыз Исаның ады шөхратланар, сиз хем онуң билен бирликде шөхратланарсыңыз. Булар Худайымызың ве Халыпамыз Иса Месихиң мерхемети аркалы болар.