2 Селаниклилер
3 Шейлеликде, доганлар, бизиң үчин хемише дога эдиң. Шонда Ехованың* сөзи чалт яйрар, башга адамлар хем оны сизиң ялы хормат билен кабул эдип билерлер. 2 Худай бизи залым ве эрбет адамлардан халас эдер ялы хем дога эдиң. Себәби хемме адам Худая иман этмейәр. 3 Эмма Халыпамыз вепалыдыр. Ол сизи беркидер ве Залымдан горар. 4 Галыберсе-де, Халыпамызың шәгиртлери хөкмүнде берйән гөркезмелеримизе эерйәндигиңизе, мундан бейләк-де эерҗекдигиңизе ынанярыс. 5 Гой, Халыпамыз сизиң йүреклериңизи догры угра гөнүкдирип, Худайы сөймәге көмек этсин ве мундан бейләк-де Месихиң ызына эермәге чыдамлылык берсин.
6 Доганлар, инди болса Халыпамыз Иса Месихиң адындан сизе шуны табшырярыс: тертип-дүзгүне ве сизиң* бизден алан гөркезмелериңизе эермейән ислендик догандан гача дуруң. 7 Бизиң гөрелдәмизе нәдип эермелидигини өзүңиз хем билйәнсиңиз. Себәби биз өзүмизи сизиң араңызда битертип алып бармандык. 8 Хич кимден чөреги мугт бермеги хем хайыш этмедик. Гайтам, хич хайсыңыза аграм салмаҗак болуп, гиҗе-гүндиз маңлай деримизи дөкүп зәхмет чекдик. 9 Сизден зат алмага ыгтыярымыз болса-да, ондан пейдаланмадык. Гайтам, бу бабатда сизе гөрелде гөркезмек иследик. 10 Хава, биз яныңыздакак: «Ким зәхмет чекмек ислемесе, онда чөрек хем иймесин» дийип табшырык берипдик. 11 Себәби кәбирлериң тертип-дүзгүне эермейәндиклерини эшитдик. Олар асла ишлемейәрлер, гайтам, башгаларың ишине гошулярлар. 12 Биз шейле адамлара геп-гүррүңсиз ишләп, өз газанан чөрегини иймеги Халыпамыз Иса Месихиң адындан табшырып, йүрекден үндәпдик.
13 Доганлар, сиз хем өз гезегиңизде ягшылык этмекден ядамаң. 14 Эгер бири шу хатымызда айдан сөзлеримизе гулак асмаса, онда шейле адамы беллиге алың. Ол утанар ялы, онуң билен гатнашмагы бес эдиң. 15 Йөне оны душман хасапламаң, гайтам, оңа доган хөкмүнде гарап, маслахат бермегиңизи довам эдиң.
16 Гой, парахатлыгың эеси болан Халыпамыз сизе әхли ягдайда элмыдама парахатлык берсин. Гой, Халыпамыз сизиң әхлиңиз билен болсун.
17 Ине, мен Павлус, өз элим билен сизе салам язярын. Шейдип, мен хер хатымы тассыклаярын.
18 Халыпамыз Иса Месихиң мерхемети сизиң хеммәңиз билен болсун.