1 Тимотеос

4 Эмма Худайың ылхамы билен язылан сөзе гөрә соңкы гүнлерде кәбирлери имандан дәнип, залым рухларың ялан сөзлерине ве таглыматларына гулак асарлар. 2 Олар икийүзли адамларың ялан сөзлерине алданып, ынсаплары тагма басылан ялы хич зады дуймаз. 3 Олар машгала гурмагы ве Худайың берен нәз-ныгматларындан иймеги гадаган эдерлер. Бу тагамлар болса иман эдйән ве хакыкаты билйән адамлара миннетдарлык билен иймек үчин берилди. 4 Себәби Худайың әхли ярадан затлары ягшыдыр. Эгер олары миннетдарлык билен ийсең, онда хич затдан йүз өвүрмек герек дәл. 5 Олар Худайың сөзи ве дога аркалы мукаддес эдилйәндир.

6 Сен бу маслахаты доганлара айдып, Месих Исаның говы хызматчысы боларсың, чүнки сен иман сөзлери билен иймитленип, аҗайып таглымата долы эерйәрсиң. 7 Эмма мукаддес затлары хапалап, олары пейдасыз эдйән адамларың* ялан хекаяларыны диңлеме. Гайтам, Худая вепалы болмагы максат эдинип, оңа етер ялы, өзүңи түргенлешдир. 8 Беден машкының пейдасы аздыр, эмма Худая вепалы болмак хер затда пейдалыдыр. Чүнки хәзирки хем гелеҗекки яшайшымыз шоңа баглыдыр. 9 Бу сөзлер ыгтыбарлыдыр ве берҗай этмәге мынасыпдыр. 10 Шейлеликде, биз җан эдип, агыр зәхмет чекйәрис, себәби әхли адамларың, эсасан-да, вепалы адамларың Халасгәри болан дири Худая умыт баглаярыс.

11 Бу затлары табшырмагы ве өвретмеги довам эт. 12 Хич ким сени яшдыгың үчин әсгермезлик этмесин. Гайтам, геплейшиңде, өзүңи алып баршыңда, сөйгүде, иманда ве айыпсызлыкда вепалы адамлара гөрелде гөркез. 13 Мен барянчам, йыгнакда окамагыңы, өвүт-үндев бермегиңи* ве өвретмегиңи довам эт. 14 Пыгамберлик боюнча яшулулар маслахатының сениң үстүңе эллерини гоянда, алан укыбыңа совук-сала гарама. 15 Бу затлар барада ойлан; оңа бар үнсүңи бер, шонда хеммелер сениң рухы тайдан өсен месихчи боландыгыңы гөрерлер. 16 Яшайшыңа ве өвредишиңе хемише үнсли бол. Себәби муны этмек билен, сен хем өзүңи, хем өзүңе гулак асянлары халас эдерсиң.