3 Яхя
1 Мен яшулы*, чын йүрекден сөййән достум Гая хат язярын.
2 Эзиз доганым, мен сениң мундан бейләк-де әхли затда үстүнлик газанып, җаның саг болмагы үчин дога эдйәрин. 3 Себәби доганлар сениң хакыкат ёлунда берк дуруп, шоңа гөрә яшаяндыгыңы гүррүң бердилер. Мен муны эшидип өрән бегендим. 4 Чагаларымың хакыкат боюнча яшаяндыгыны эшиденимде, шатлыгымың* чәги болмады.
5 Эзиз достум, танамаян доганлара-да көмек эдишиңден Худая вепалыдыгың гөрүнйәр. 6 Шол доганлар сениң билдирен сөйгиң барада йыгнага гүррүң бердилер. Олары Худая мынасып тәрде ёла салмагыңы хайыш эдйәрин. 7 Бу доганлар Худайың адының хатырасына вагыз эдип, адамлардан* хич зада гарашмаярлар. 8 Шол себәпли биз шейле доганлара мыхмансөерлик билдирмәге борчлудырыс. Шонда биз биле ишлешип, хакыкаты голдарыс.
9 Мен йыгнага хат языпдым, йөне агалык этмеги говы гөрйән Диотреф бизе хормат гоймаяр, айдянларымыза-да гулак асмаяр. 10 Шейле-де ол биз хакда ярамаз сөзлери яйрадяр. Ол мунуң билен хем чәкленмән, доганлара-да хормат гоймаяр ве олары мыхман алмаяр. Хатда мыхман алмак ислейәнлере-де пәсгел берип, олары йыгнакдан чыкарҗак боляр. Мен баранымда, онуң эдйән эрбет ишлерини ядына саларын.
11 Эзиз доганым, эрбетлиге дәл-де, ягшылыга эер. Себәби ягшылык эдйәнлер Худайдандыр, яманлык эдйәнлер Худайы танан дәлдир*. 12 Доганларың әхлиси Димитрис хакда өвгүли сөзлери айдярлар. Муңа хакыкат хем гүвә гечйәр. Биз хем онуң говы эдим-гылымына шаятлык эдйәрис. Сен бизиң шаятлыгымызың хакыкатдыгыны билйәнсиң.
13 Мен саңа көп затлары айтмак ислейәрин, йөне муны хат үсти билен язасым гелмейәр. 14 Себәби мен тизден яныңа барып, сениң билен гүррүңдеш болмагы умыт эдйәрин.
Саглыкда гөршели!
Доганлар саңа салам айдяр. Сен хем мениң адымдан әхли доганлара салам айт.