Матта

5 Иса мәрекәни гөрүп, дага чыкды; ол отурандан соңра, шәгиртлери янына гелди. 2 Шонда Иса олара өвредип башлады:

3 «Худай барада билим алмагың ваҗыпдыгына дүшүнйән* адамлар багтлыдыр, чүнки гөкдәки Патышалык оларыңкыдыр.

4 Хасрат чекйән адамлар багтлыдыр, себәби олара теселли берлер.

5 Песгөвүнли* адамлар багтлыдыр, себәби олар ер йүзүни мирас аларлар.

6 Догрулыга аҗыгып-сувсанлар* багтлыдыр, себәби олар доюп-ганарлар*.

7 Рехимли адамлар багтлыдыр, себәби олара рехим эдилер.

8 Йүреги пәк адамлар багтлыдыр, себәби олар Худайы гөрерлер.

9 Парахатлык дөредйән адамлар багтлыдыр, себәби олара Худайың перзентлери* диерлер.

10 Догрулык үчин ызарланян адамлар багтлыдыр, себәби гөкдәки Патышалык оларыңкыдыр.

11 Маңа иман эдйәндигиңиз үчин, сизе сөгенлеринде, ызарланларында ве хер хили ялан хем-де эрбет затлары айданларында багтлысыңыз. 12 Шатланың, бегениң, себәби гөкде алҗак сылагыңыз улудыр. Сизден өң яшан пыгамберлери-де ызарлапдылар.

13 Сиз ериң дузусыңыз. Эгер дуз гүйҗүни йитирсе, оны нәдип ене-де дузлы эдип болар? Ол хич зада ярамаз, оны диңе адамларың аякларының астына зыңаймак галар.

14 Сиз дүнйәниң ышыгысыңыз. Дагың үстүнде ерлешйән шәхери гизләп болмаз. 15 Адамлар чыраны яканда, себедиң* ашагында гоймаярлар. Гайтам, өйдәкилериң әхлисине шөхле сачар ялы, оны чыраданың үстүнде гойярлар. 16 Сизиң хем ышыгыңыз адамларың өңүнде шейле нур сачсын велин, ягшы ишлериңизи гөрүп, гөкдәки Атаңызы шөхратландырсынлар.

17 Мени Мусаның кануныны я-да пыгамберлериң язан сөзлерини бозмага гелендир өйтмәң. Мен бозмак үчин дәл-де, олары берҗай этмек үчин гелдим. 18 Сизе догрусыны айдярын, асман ве ер гечип гитсе-де, Кануның әхли сөзлери берҗай болянча, онуң екеҗе харпының чызыгы-да йитмез. 19 Шол себәпли кимдир бири табшырыкларың екеҗесини бозса, шейле этмеги башгалара-да өвретсе, гөкдәки Патышалыга гирмәге мынасып дәлдир. Эмма олары берҗай эдип, муны башгалара-да өвредйән адам гөкдәки Патышалыга гирмәге мынасып болар. 20 Йөне шуны билип гоюң: эгер сизиң догрулыгыңыз канунчыларыңкыдан ве фарисейлериңкиден артык болмаса, онда гөкдәки Патышалыга асла гирип билмерсиңиз.

21 Сиз гадымы дөвүрде шейле дийленини эшиденсиңиз: „Адам өлдүрме. Ким адам өлдүрсе, казыетиң өңүнде җогап берер“. 22 Эмма мен сизе диййәрин, доганына гахарланян адам казыетде җогап берер. Бири доганына гөвне дегиҗи сөз айтса, Ёкары казыетиң өңүнде җогап берер. Бири доганына: „Сен акмак!“ дийсе, Җәхеннем* одуна сезевар болар.

23 Эгер сен гурбаныңы гурбанлык сыпасына* алып баряркаң, доганыңың өйке-кинесиниң бардыгы ядыңа дүшсе, 24 онда гурбаныңы гурбанлык сыпасының өңүнде гой-да, илки гидип, доганың билен яраш. Соңра гел-де, гурбаныңы хөдүр эт.

25 Давагәриң билен йүзе чыкан меселәңи казыете етмәнкәң чөз. Ёгсам, ол сениң өзүңи казыетиң өңүнде гүнәкәр эдәймесин. Шонда казы сени гаравула табшырар, гаравул хем сени түрмә басар. 26 Мен догрусыны айдярын, сен иң соңкы теңңәңи* берйәнчәң, ол ерден чыкмарсың.

27 Сиз: „Зына этме“ дийленини эшиденсиңиз. 28 Эмма мен сизе диййәрин, бир аяла азгын хөвес билен середйән адам йүрегинде онуң билен эййәм зына эдендир. 29 Эгер сениң саг гөзүң гүнә этмегиңе* себәп болса, оны оюп чыкар-да ташла. Бүтин бедениң Җәхеннеме* зыңландан, бир гөзүңи йитирениң говудыр. 30 Эгер сениң саг элиң гүнә этмегиңе* себәп болса, оны кес-де ташла. Бүтин бедениң Җәхеннеме* зыңландан, бир элиңи йитирениң говудыр.

31 Сиз: „Аялы билен айрылышан адам онуң талак хатыны* бермелидир“ дийленини хем эшиденсиңиз. 32 Эмма мен сизе шейле диййәрин, зынадан* башга себәп билен аялындан айрылышян адам онуң зына этмегине себәп боляндыр. Айрылышан аяла өйленен хем зына эдйәндир.

33 Сиз гадымы дөвүрде шейле дийленини хем эшиденсиңиз: „Бош ере ант ичме. Эгер ант ичен болсаң, оны Ехованың* өңүнде берҗай эт“. 34 Эмма мен сизе шейле диййәрин: асла ант ичмәң, гөкден хем ант ичмәң, себәби ол Худайың тагтыдыр. 35 Ер йүзүнден хем ант ичмәң, себәби бу онуң аякларының басганчагыдыр. Иерусалимденем ант ичмәң, себәби ол Бейик Патышаның шәхеридир. 36 Өз башыңыздан хем ант ичмәң, себәби сиз сачыңызың екеҗе тарыны ак я-да гара эдип билмерсиңиз. 37 Гой, сизиң „Хава“ диен сөзүңиз „Хава“, „Ёк“ диениңиз „Ёк“ болсун. Булардан артыгы Шейтандандыр*.

38 Сиз: „Гөз ерине гөз, диш ерине диш“ дийленини эшиденсиңиз. 39 Эмма мен сизе диййәрин: яманлык эдйәне гаршылык гөркезмәң. Бири саг яңагыңа урса, оңа бейлеки яңагыңы хем өвүр. 40 Эгер бири казыетиң үсти билен көйнегиңи алҗак болса, оңа донуңы-да бер. 41 Эгер ыгтыярлы адам сени ишлетҗек болуп, бир мензил* ёл гечмеги талап этсе, онуң билен ики мензил ёл геч. 42 Сорана көмек эт. Бири сенден карзына* пул дилесе, оңа бермекден йүз өвүрме.

43 Сиз: „Якыныңы* сөй ве душманыңы йигрен“ дийленини эшиденсиңиз. 44 Эмма мен сизе шейле диййәрин: душманларыңызы сөйүң ве сизи ызарлаянлар үчин дога эдиң. 45 Шонда сиз гөкдәки Атаңызың перзентлери боларсыңыз. Себәби ол Гүнүни хем эрбетлериң, хем ягшыларың үстүнден догуряр; ягмырыны хем догруларың, хем эгрилериң үстүнден ягдыряр. 46 Эгер сиз диңе өзүңизи сөййәнлери сөйсеңиз, башгалардан нәме тапавудыңыз* болар? Салгытчылар хем шейле этмейәрми нәме? 47 Эгер сиз диңе өз доганларыңыз билен саламлашян болсаңыз, онда нәме артыкмач иш эдйәрсиңиз? Өзге миллетлер хем шейле этмейәрми нәме? 48 Шейлеликде, гөкдәки Атаңызың кәмил болшы ялы, сиз-де кәмил болуң.