Матта

6 Догры ишлериңизи адамлара гөрүнмек үчин этмекден әгә болуң, ёгсам гөкдәки Атаңыздан сылаг алмарсыңыз. 2 Мәтәҗе садака* берениңизде, икийүзли адамларың синагогаларда ве көчелерде эдиши ялы, бу хакда җар этмәң*. Олар муны адамлардан алкыш алмак үчин эдйәрлер. Сизе догрусыны айдярын, олар адамлардан алкыш алсалар-да, Худайдан хич хили сылаг алмазлар. 3 Эмма мәтәҗе садака берениңизде, чеп элиңиз саг элиңизиң нәме эдйәндигини билмесин. 4 Шол себәпли совгадыңызы башгалара билдиртмән бериң. Шонда гизлинликде эдиленлери гөрйән Атаңыз сизи сылаглар*.

5 Худая дога эдениңизде, икийүзли адамлар ялы болмаң. Олар адамлара гөрүнмек үчин синагогаларда ве улы ёлларың чатрыгында* дуруп дога эдйәрлер. Сизе догрусыны айдярын, олар адамлардан алкыш алсалар-да, Худайдан хич хили сылаг алмазлар. 6 Эмма сиз отагыңыза гириң-де, гапыны япып, гөзе гөрүнмейән Атаңыза дога эдиң. Шонда гизлинликде эдилйәни гөрйән Атаңыз сизи сылаглар. 7 Дога эдениңизде, башга халклар ялы шол бир сөзлери гайталап дурмаң, себәби олар көп сөзлесек, Худай эшидер дийип пикир эдйәрлер. 8 Сиз олара меңземәң, чүнки Атаңыз сизе нәме герекдигини ондан дилемәнкәңиз билйәр.

9 Йөне сиз шейле дога эдиң:

„Эй гөкдәки Атамыз, гой, сениң адың мукаддес болсун. 10 Патышалыгың гелсин. Гөкде болшы ялы, ерде-де сениң ислегиң амала ашсын. 11 Бизе гүнделик ийҗек чөрегимизи хер гүн бер*. 12 Бизе гаршы гүнә эдйән адамларың гүнәсини* багышлайшымыз ялы, сен-де бизиң гүнәлеримизи* багышла. 13 Бизиң сынага дүшмегимизе ёл берме, гайтам, Залымың элинден халас эт“.

14 Сиз адамларың этмишини багышласаңыз, гөкдәки Атаңыз хем сизи багышлар. 15 Эмма адамларың этмишини багышламасаңыз, Атаңыз хем сизиң этмишиңизи багышламаз.

16 Агыз бекләниңизде, икийүзли адамлар ялы йүзүңизи салламагыңызы бес эдиң. Себәби шейле адамлар агыз беклейәндиклерини иле гөркезҗек болуп йүзүни саллаярлар*. Сизе догрусыны айдярын, олар адамлардан алкыш алсалар-да, Худайдан хич хили сылаг алмазлар. 17 Эмма сиз агыз бекләниңизде, йүзүңизи ювуп, башыңыза яг чалың. 18 Агыз беклейәндигиңизи адамлара гөркезмек үчин дәл-де, гөзе гөрүнмейән Атаңыз үчин эдиң. Шонда гизлин затлары гөрйән Атаңыз сизи сылаглар.

19 Ер йүзүнде хазына йыгнамагыңызы бес эдиң. Себәби бу ерде олары гүе, пос иййәндир ве огрулар гирип огурлаяндыр. 20 Муңа дерек гөкде хазына йыгнаң. Ол ерде хазынаңызы не гүе, не пос иййәндир, не-де огрулар гирип огурлаяндыр. 21 Хазынаңыз ниреде болса, йүрегиңиз хем шол ерде болар.

22 Бедениң чырасы гөздүр. Эгер гөзүң сада* болса, бүтин бедениң хем ягты болар. 23 Эмма гөзүң эрбет* болса, бүтин бедениң хем гараңкы болар. Эгер сендәки ягтылык шейле гараңкы болса, онда ол гараңкылык, гөр, нәхили түмлүкдир!

24 Хич ким ики хоҗайының гулы болуп билмез. Себәби ол бирини йигренип, бейлекисини сөер я-да бирине вепалы болуп, бейлекисини әсгермезлик эдер. Сиз хем Худайың, хем байлыгың гулы болуп билмерсиңиз.

25 Шонуң үчин мен сизе диййәрин: нәме иерис, нәме ичерис дийип, җаныңыз хакда я-да нәме геерис дийип, бедениңиз барада алада этмегиңизи бес эдиң. Эйсем, җан иймитден ве беден эгин-эшикден гымматлы дәлми нәме? 26 Асмандакы гушлара сын эдиң. Олар не экйәрлер, не орярлар, не-де аммарлара иймит йыгнаярлар. Муңа гарамаздан, гөкдәки Атаңыз олары иймитлендирйәр. Сиз олардан хас гымматлы дәлми нәме? 27 Сизиң хайсыңыз алада эдип, өмрүңизи азаҗык* болса-да узалдып билйәрсиңиз? 28 Эгин-эшик хакда-да нәме үчин алада эдйәрсиңиз? Мейдан гүллериниң* өсүшине сын эдиң. Олар не зәхмет чекйәрлер, не-де өзлери үчин эшик өрйәрлер. 29 Эмма мен сизе диййәрин, хатда шан-шөхрата эе болан Сүлейман патыша-да шейле овадан гейнен дәлдир. 30 Эгер шу гүн бар болуп, эртир оҗага ташланян мейдан өсүмликлерини Худай шейле гейиндирйән болса, онда ол сизи хас-да артык гейиндирмезми нәме, эй иманы азлар! 31 Шонуң үчин „Нәме иерис?“, „Нәме ичерис?“ я-да „Нәме геерис?“ дийип, хич хачан алада этмәң. 32 Бу затларың барына башга халклар ымтылярлар. Гөкдәки Атаңыз буларың хеммесиниң сизе герекдигини билйәндир.

33 Худайың Патышалыгыны ве Онуң догрулыгыны хемише биринҗи орунда гоюң, шонда галан әхли затлар хем үстүне гошулып берлер. 34 Шейлеликде, хич хачан эртирки гүнүң аладасыны этмәң, чүнки эртириң өз аладалары болар. Хер гүнүң өз дерди өзүне етикдир.