Галатялылар
5 Себәби Месих бизи эркин этмек үчин шейле азатлыга чыкарды. Шонуң үчин азатлыгыңызы берк саклаң ве тәзеден гулчулыгың боюнтырыгына гирмәң.
2 Мен Павлус, сизе диййәрин, эгер сүннетленсеңиз, онда Месихиң эден ишиниң сизе пейдасы болмаз. 3 Сизе ене-де шаятлык эдйәрин: сүннетли адам Кануның әхли табшырыкларыны берҗай этмәге борчлудыр. 4 Эгер сиз канун аркалы догры хасапланмага җан эдйән болсаңыз, онда Месихден айра дүшүп, онуң мерхеметинден махрум болансыңыз. 5 Биз Худайың назарында мукаддес рух ве иман аркалы догры хасапланмага умыт эдйәрис. 6 Себәби Месих Иса билен бирликде яшаянлар үчин не сүннетли, не-де сүннетсиз болмак ваҗыпдыр. Эмма иман ве сөйги билен эдилен ишлер әхмиетлидир.
7 Сиз хакыкат ёлунда говы ылгаярдыңыз. Сизе хакыката гулак асмага ким пәсгел берди? 8 Сизи чагыран Худай хакыката гулак асмазлыга итермеди. 9 Биразаҗык хамырмая бүтин хамыры туршадяр. 10 Халыпамызың шәгиртлериниң мениң билен бир пикирде болҗакдыгына ынанярын. Йөне сизе кынчылык дөредйән адам ким болаянда-да, ол хөкүме мынасыпдыр. 11 Доганлар, эгер-де мен сүннетленмек барада хенизем вагыз эдйән болсам, онда нәме үчин ызарланярын? Эгер шейле эдйән болсам, Исаның җебир пүрси* адамларың иман этмегине пәсгел бермезди*. 12 Сизи азашдырмак ислейән адамлар нәме үчин өзлерини агта этмейәрлер?*
13 Доганлар, сиз азат болмак үчин чагырылдыңыз, йөне азатлыгыңызы гүнәли хөвеслериңизи канагатландырмак үчин уланмаң. Гайтам, бирек-биреге сөйги билен гуллук эдиң. 14 Себәби тутуш Канун: «Якыныңы өзүңи сөйшүң ялы сөй» дийлен бир табшырыкда җемленйәндир. 15 Эгер сиз бири-бириңизиң гөвнүне дегип, язгарян болсаңыз, онда бир-бириңизи ёк этмекден сересап болуң.
16 Мен сизе диййәрин, мукаддес рухуң гөркезмеси боюнча яшаң, шонда тен хөвеслерине асла эермерсиңиз. 17 Себәби тен хөвеси руха гаршы, рух болса тен хөвесине гаршы гидйәндир. Булар бир-бирине гаршылык гөркезйәр, шол себәпли сиз ислейән затларыңызы эдип билмейәрсиңиз. 18 Хава, эгер сиз мукаддес рухуң гөркезмесине эерсеңиз, кануның голы астында болмарсыңыз.
19 Тен ишлери айдыңдыр: олар ахлаксызлык*, азгынлык, хаясыз ишлер*, 20 бутпаразлык, җадыгөйлик*, душманчылык, дава-җенҗел, габанҗаңлык, гахар-газап, җедел, бөлүнишик, ынсан таглыматларына эермеклик, 21 гөриплик, серхошлык, кейпи-сапалы отурышыклар ве шуңа меңзеш затлардыр. Шейле затлар билен мешгулланян адамлар Худайың Патышалыгыны мирас алмаҗакдыгыны сизе өң дуйдурышым ялы, ене-де дуйдурярын.
22 Эмма рухуң мивеси шулардыр: сөйги, шатлык, парахатлык, сабырлылык, мәхирлилик, ягшылык*, иман, 23 юмшаклык, өзүңе эрк этмеклик. Булара гаршы хич хили канун ёкдур. 24 Шейле-де Месих Иса дегишли адамлар гүнәли беденини гүйчли ве эрбет хөвеслери билен биле пүрсе чүйледилер.
25 Эгер биз руха гөрә яшаян болсак, онда онуң гөркезмесине эермегимизи довам эделиң. 26 Гелиң, диңе өзүни билйән адамлар ялы болмалың, бири-биримизде бәсдешлиги оярып, бири-биримизе гөриплик этмәлиң.