Лука
13 Шол вагт мәрекәниң арасында дуранларың кәбири Пилатусың ыбадатханада гурбан гетирип дуран җелилели адамлары өлдүрендигини Иса хабар бердилер. 2 Иса олара шейле җогап берди: «Сизиң пикириңизче, шол өлдүрилен җелилелилер бейлеки җелилели адамлардан хас гүнәкәрми? 3 Элбетде, ёк. Йөне тоба этмесеңиз, сизиң әхлиңиз хем шол адамлар ялы хеләк боларсыңыз. 4 Я-да сиз үстлерине Силоам бинасы йыкылып өлен 18 адамы Иерусалимде яшаян бейлеки адамлардан хас гүнәли хасаплаярмысыңыз? 5 Сизе диййәрин, бу бейле дәл. Йөне тоба этмесеңиз, сизиң әхлиңиз хем шол адамлар ялы хеләк боларсыңыз».
6 Соңра Иса олара шу мысалы гүррүң берди: «Бир адамың үзүмчилигинде отурдан инҗир агаҗы барды. Ол миве алмага геленде, ондан хич зат тапмаяр. 7 Шонда ол багбана: „Мен бу инҗир агаҗындан миве алмак үчин үч йыл бәри гелсем-де, хич зат тапмаярын. Оны чап-да, айыр! Миве бермейән агаҗы сакламак нәмә герек?“ диййәр. 8 Багбан оңа: „Хоҗайын, гел, муңа ене бир йыл дегмәли. Мен онуң дүйбүни юмшадарын-да, оңа дөкүн дөкерин. 9 Белки, ол миве берер. Эгер бермесе, шонда оны чапып айрай“ диййәр».
10 Иса Сабат гүни* синагогаларың биринде өвредип дурды. 11 Шол ерде җын себәпли 18 йыл бәри яравсыз болан бир аял барды. Онуң били бүкүлги болансоң, дикелип билмейәрди. 12 Иса оны гөренде: «Сен дердиңден ачылдың» дийди-де, 13 оңа элини дегирди, ол хем шол бада дикелип, Худайы шөхратландырып башлады. 14 Эмма синагога ёлбашчысы Исаның Сабат гүни аялы сагалдандыгына нәгиле болуп, мәрекә: «Иш этҗек болсаңыз алты гүн бар. Сагалмак үчин Сабат гүни дәл-де, шол гүнлер гелиң» дийди. 15 Эмма Халыпамыз оңа шейле җогап берди: «Эй икийүзлүлер, сиз Сабат гүни өкүзиңизи я-да эшегиңизи сува якмак үчин йүпүни чөзүп, малятакдан чыкармаярмысыңыз? 16 Онда Шейтаның 18 йыл бәри баглап саклан Ыбрайымың бу гызыны Сабат гүни азатлыга чыкармалы дәлми нәме?» 17 Иса муны айданда, онуң душманларының хеммеси утанды, мәреке болса онуң эден әхли аҗайып ишлерине бегенип башлады.
18 Иса сөзүни шейле довам этди: «Худайың Патышалыгыны нәмә меңзетсе болар, мен оны нәме билен деңешдирейин? 19 Ол бир адамың өз багында экен горчиса* дәнеси ялыдыр. Ол өсүп агач боляр, шахаларында болса гушлар хөвүртге ясаяр».
20 Ол ене-де шейле дийди: «Мен Худайың Патышалыгыны ене нәме билен деңешдирип билерин? 21 Ол бир аялың үч улы җам* уна гошан ве хамыры туршадан хамырмаясына меңзешдир».
22 Иса шәхерме-шәхер, обама-оба айланып, Иерусалиме барянча, ёл бойы өвредйәрди. 23 Шонда бир адам ондан: «Агам, халас болҗаклар азмы?» дийип сорады. Иса олара шейле дийди: 24 «Дар гапыдан гирмек үчин җан эдиң. Себәби көплери гирҗек болар, йөне башармазлар. 25 Өй эеси туруп, гапыны япанда, сиз дашында дуруп: „Агам, гапыны ачай“ дийип какарсыңыз. Эмма ол сизе: „Мен сизи танамаярын“ дийип җогап берер. 26 Шонда сиз: „Биз сениң билен бир сачакда отурып, ийип-ичдик. Сен бизиң шәхеримизиң улы көчелеринде өвредипдиң“ диерсиңиз. 27 Эмма ол сизе: „Мен сизи танамаярын. Янымдан айрылың, эй эрбет иш эдйәнлер!“ диер. 28 Сиз Ыбрайымың, Ысхагың, Якубың ве әхли пыгамберлериң Худайың Патышалыгындадыгыны, өзүңизиң болса дашына зыңландыгыңызы гөрүп, гөзяш дөкерсиңиз, алачсызлыкдан яңа дишиңизи гыҗарсыңыз. 29 Шейле-де гүндогардан, гүнбатардан, демиргазыкдан ве гүнортадан адамлар гелип, Худайың Патышалыгында сачак башында отурарлар. 30 Шонда соңкулар илкинҗи, илкинҗилер болса соңкы боларлар».
31 Эдил шол вагт бирнәче фарисей гелип, оңа: «Тур-да, бу ерден гит, себәби Хиродес сени өлдүрҗек боляр» дийдилер. 32 Шонда Иса олара: «Барың-да, шол тилкә шейле дийиң, „Мен шу гүн хем эртир җынлары ковуп чыкарарын ве сыркавлары сагалдарын, үчүнҗи гүн болса ишими тамамларын“. 33 Шонуң үчин мен шу гүн, эртир ве биригүн ишими довам этмели. Себәби пыгамбериң Иерусалимден башга ерде өлдүрилмеги мүмкин дәлдир. 34 Эй Иерусалим, пыгамберлери өлдүрйән ве Худайың иберен адамларыны дашлаян Иерусалим! Товугың өз җүйҗелерини ганатының ашагына йыгнайшы ялы, мен хем сениң чагаларыңы энчеме гезек йыгнаҗак болдум! Йөне сен муны ислемедиң. 35 Ине, Худай сениң өйүңи терк эдйәр. Сизе диййәрин, „Ехованың* адындан гелйәне шөхрат!“ диййәнчәңиз, мени асла гөрмерсиңиз».