Лука

14 Бир гезек Иса Сабат гүни* фарисейлериң ёлбашчыларының бириниң өйүне нахара чагырылды. Отуранлар оны үнсли сынлаярдылар. 2 Шол ерде Исаның янында эллери ве аяклары чиш* бир адам барды. 3 Шонда Иса Кануны өкде билйәнлерден ве фарисейлерден: «Канун боюнча Сабат гүни сыркав адамы сагалтса болярмы я-да ёк?» дийип сорады. 4 Олар сесини чыкармадылар. Шонда Иса кеселли адама элини дегрип сагалтды-да, оны угратды. 5 Соңра Иса отуранлара: «Сизиң хайсы бириңизиң оглуңыз я-да өкүзиңиз Сабат гүни гуя гачса, оны шол бада чыкармарсыңыз?» дийди. 6 Олар муңа хич зат җогап берип билмедилер.

7 Иса мыхманчылыга гелен адамларың хас говы ерлери сайлаяндыкларыны гөрүп, олара бир мысалы гүррүң берди. Иса шейле дийди: 8 «Бири сизи тоя чагырса, иң хорматланян ере гечип отурмаң. Белки-де, сизден хас хорматланян бири хем чагырыландыр. 9 Шонда сизи мыхманчылыга чагыран адам: „Сен отуран ериңи муңа бер“ диер. Сен хем утанҗа галып, хас пес ере гечмели боларсың. 10 Эмма мыхманчылыга чагырыланыңызда, пес ере гечип отурың. Шонда өй эеси сени янына чагырып: „Достум, төре гечсене“ диер. Сен-де хеммелериң гөзүниң алнында хормата эе боларсың. 11 Себәби өзүни бейгелдйән адам кичелдилер, өзүни кичелдйән болса бейгелдилер».

12 Соңра Иса өй эесине шейле дийди: «Адамлары гүнортанлык я-да агшамлык нахарына чагыраныңда, оңа достларыңы, доган-гарындашларыңы я-да бай гоңшуларыңы чагырма. Себәби олар хем өз гезегинде сени мыхманчылыга чагырып, эдениңи гайтарып билерлер. 13 Эмма сен той-мейлис гурнаныңда, оңа гарыплары, майыплары, агсаклары ве көрлери чагыр. 14 Шонда сен өзүңи багтлы дуярсың, себәби олар саңа гайтарып билмезлер. Йөне догры адамлар диреленде, Худай саңа гайтарып берер».

15 Бу сөзлери эшиден мыхманларың бири: «Худайың Патышалыгында чөрек ийҗек адам багтлыдыр» дийди.

16 Иса оңа шейле дийди: «Бир адам улудан той тутуп, оңа көп адамлары чагырды. 17 Нахар тайын боланда, ол гулуны мыхманчылыга чагырыланларың янына иберип: „Хемме зат тайын, гелибериң“ диймеги табшырды. 18 Эмма чагырыланларың бары өтүнч сорап башладылар. Биринҗиси: „Мен экин мейданыны сатын алдым, хәзир гидип шоны гөрмели; мени багышлаң“ дийди. 19 Башга бири: „Мен бәш җүбүт өкүз сатын алдым, хәзир гидип шолары барламалы; мени багышлаң“ дийди. 20 Үчүнҗиси болса: „Мен яңыҗа өйлендим, шол себәпли барып билҗек дәл“ дийди. 21 Шонда гул гелип, бу затлары хоҗайынына хабар берди. Хоҗайыны болса гахарланып, гулуна: „Чалт гит-де, шәхериң улы ве кичи көчелерине айланып, гарыплары, майыплары, көрлери хем агсаклары гетир“ дийди. 22 Гул доланып гелди-де, „Хоҗайын, мен айдышың ялы этдим, йөне хенизем бош ерлер бар“ дийди. 23 Шонда хоҗайын гулуна: „Бар-да, ёллара ве ёдалара айланып, өйүң ичи долар ялы, адамлары зор билен гетир. 24 Сизе диййәрин, мыхманчылыга чагырыланларың хич бири тайярлан нахарымдан датмаз“ дийди».

25 Иса ызына дүшүп гелйән улы мәрекә тарап өврүлди-де, шейле дийди: 26 «Яныма гелйән хер кес какасыны, эҗесини, аялыны, чагаларыны, доганларыны, уяларыны, хатда өз җаныны менден артык сөйсе*, мениң шәгирдим болуп билмез. 27 Ким җебир пүрсүни* алып, ызыма дүшмесе, мениң шәгирдим болуп билмез. 28 Сизиң хайсы бириңиз бина гурмакчы боланыңызда, оны тамамламага гүйҗүңизиң етҗекдигини я-да етмеҗекдигини билмек үчин, илки отурып, чыкдаҗылары хасапламаз? 29 Ёгсам, ол бинаның дүйбүни тутса-да, оны тамамлап билмез. Муңа сын эдйәнлериң хеммеси онуң үстүнден гүлүп: 30 „Бу адам гурлушыга башлап, оны тамамлап билмеди“ дийшерлер. 31 Я-да хайсы патыша башга бир патыша гаршы сөвешҗек боланда — 10 мүң эсгерли гошуным билен 20 мүң эсгерли гошуна гаршы чыкып билермикәм — дийип, илки отурып маслахатлашмаз? 32 Эгер ол башармарын өйтсе, онда гаршыдашы хениз узакдака, оңа векиллерини ёллап, парахатлыгы диләр. 33 Шонуң ялы сиз хем бар эмләгиңизден гечмесеңиз, мениң шәгирдим болуп билмерсиңиз.

34 Аслында, дуз говудыр. Йөне ол гүйҗүни йитирсе, оны нәдип тагамлы эдип болар? 35 Оны не топрак үчин, не-де дөкүн үчин уланып болар. Адамлар оны зыңарлар. Гой, гулагы бар адам эшитсин».