1 Коринфлилер

15 Доганлар, инди болса сизе хош хабар хакда ятладярын. Сиз оны менден эшидип, кабул этдиңиз ве онда берк дурсуңыз. 2 Эгер сиз мениң вагыз эден хош хабарымда мундан бейләк-де берк дурсаңыз, халас боларсыңыз. Ёгсам, сизиң бидерек ере иман этдигиңиз болар.

3 Мен сизе кабул эден иң ваҗып затларымың бирини, ягны Месихиң Язгылара гөрә бизиң гүнәлеримиз үчин өлендигини өвретдим. 4 Ол җайланып, Язгылара гөрә үч гүн дийленде дирелди. 5 Ол Кифа*, соңра 12 ресула гөрүнди. 6 Ондан соңра бир вагтың өзүнде 500-ден говрак доганлара гөрүнди. Оларың көпүси хәзир хем бизиң арамыздадыр, кәбири болса өлүм укусына гитди. 7 Соңра Якуба, ондан соң болса әхли ресуллара гөрүнди. 8 Хеммелере гөрненден соң, бивагт доглан чага ялы болан маңа-да гөрүнди.

9 Мен ресулларың иң кичиси, хатда ресул адыны гөтермәге-де мынасып дәлдирин, себәби мен Худайың йыгнагыны ызарлапдым. 10 Эмма мен бу гуллугы Худайың мерхемети билен ерине етирип билйәрин. Ол мерхеметини маңа бидерек ере билдирмәнди, себәби мен хемме ресуллардан-да көп зәхмет чекдим. Йөне мен бу иши өз гүйҗүм билен дәл-де, Худайың маңа билдирен мерхемети аркалы берҗай эдйәрин. 11 Аслында, мен вагыз эдейин я-да башга ресуллар вагыз этсин, барымыз шол бир хабары айдярыс, сиз хем оңа иман этдиңиз.

12 Эгер биз Месихиң өлүмден дирелендиги хакда вагыз эдйән болсак, онда нәме үчин араңызда кәбири дирелиш ёкдур диййәр? 13 Дирелиш ёк болса, диймек, Месих хем дирелмәндир. 14 Эгер Месих дирелмедик болса, онда бизиң ол хакда эдйән вагзымыз бидерекдир, сизиң иманыңыз хем бидерек боляр. 15 Эгер өлүлер дирелмеҗек болса, онда Худай Месихи-де дирелтмеди. Биз хем Худай Месихи дирелтди диййән болсак, онда ялан шаятлар болярыс. 16 Эгер өлүлер дирелмеҗек болса, онда Месих хем дирелен дәлдир. 17 Эгер Месих дирелмедик болса, онда сизиң иманыңыз пейдасыздыр; гүнәлериңиз хем багышланан дәлдир. 18 Диймек, Месихиң шәгиртлери хөкмүнде өлүм укусына гиден адамлар хем ызына доланмазлар. 19 Эгер биз Месихе диңе шу яшайышда умыт эдйән болсак, онда биз хемме адамлардан-да хас гөзгыны ягдайдадырыс.

20 Эмма Месих өлүм укусына гиденлериң илкинҗи мивеси хөкмүнде өлүмден дирелди. 21 Себәби бир адам аркалы өлүм пейда болан болса, онда бир адам аркалы хем дирелиш болар. 22 Адам ата аркалы хеммелериң өлши ялы, Месих аркалы-да хеммелер яшайша говшар. 23 Йөне хер кес өз нобатында дирелер: илкинҗи миве хөкмүнде Месих, соңра Месих геленде*, оңа дегишли боланлар дирелер. 24 Иң соңунда болса ол әхли хөкүметлери, ыгтыярлыклары ве гүйчлери ёк эдип, Патышалыгы Ата Худайына табшырар. 25 Себәби Худай онуң душманларыны аягының астына салянча, ол патыша болуп хөкүм сүрмелидир. 26 Соңра соңкы душман өлүм хем ёк эдилер. 27 Себәби Худай «әхли зады онуң аякларының астына табын этди». Йөне «әхли зады оңа табын этди» дийлен сөзлер әхли зады оңа табын эден Худайың хем оңа табын боляндыгыны аңлатмаяр. 28 Эмма Худай әхли зады Оглуна табын этдиренден соң, Оглуң өзи-де әхли зады табын этдирен Худая табын болар. Шонда Худай хеммелериң башы болар.

29 Эгер өлүлер дирелмейән болса, онда өлмек үчин чүмдүриленлере нәме болар? Эйсем, олар нәме максат билен өлмек үчин чүмдүрилдилер? 30 Биз нәме үчин өзүмизи элмыдама ховп астына салярыс? 31 Доганлар, мен хер гүн өлүм билен йүзбе-йүз болярын. Бу маңа Халыпамыз Месих Исаның шәгиртлери болан сизе гуванмага мүмкинчилик берйәр. 32 Эгер мен башга адамлар ялы* Эфесде йыртыҗы хайванлар билен гөрешен болсам, мунуң маңа нәме пейдасы бар? Эгер өлүлер дирелмейән болса, онда, «гелиң, ийип-ичелиң, себәби эртир барыбир өлерис». 33 Алданмаң. Эрбетлер билен гатнашык этмек говы эндиклери бозяндыр*. 34 Догры затлары этмек үчин ояның, гүнәли ишлери этмәң, сизиң кәбириңиз Худайы танамаярсыңыз. Мен муны сизи утандырмак үчин айдярын.

35 Муңа гарамаздан, кимдир бири: «Өлүлер нәдип дирелер? Оларың бедени нәхили болар?» дийип сорар. 36 Эй дүшүнҗесиз адам! Сениң экен задың башда өлмесе, ол нәдип өссүн?* 37 Себәби сен өсүмлигиң* өзүни дәл-де, диңе онуң тохумыны экйәнсиң, арпаның тохумы я-да башга бир дәне болсун, тапавуды ёк. 38 Йөне Худай хер өсүмлиге ве тохума Өз ислейшине гөрә беден берйәр. 39 Беденлер бир-биринден тапавутланяндыр; ынсаның бедени бир айры, хайваныңкы бир айры; гушларыңкы бир айры; балыгыңкы хем бир айры. 40 Гөкдәкилериң бедени бир айры; ердәкилериңки бир айры. Йөне гөкдәкилериң бедениниң шөхраты ердәкилериңкиден тапавутланяндыр. 41 Гүнүң, Айың ве йылдызларың шөхраты бири-биринден тапавутланяндыр. Аслында, йылдызларың хем шөхраты өз араларында тапавутланяр.

42 Өлүлериң дирелиши хем шейле боляндыр. Олар чүйрән беденде экилип, чүйремез беденде дирелйәндир. 43 Масгараланян беденде экилип, шөхратлы беденде дирелйәндир. Эҗиз беденде экилип, гүйчли беденде дирелйәндир. 44 Ынсан беденинде экилип, рухы беденде дирелйәндир. Ынсан бедени бар болса, рухы беден хем бардыр. 45 Себәби: «Илкинҗи ынсан Адам ата дири җан болды» дийип язылгыдыр. Соңкы Адам болса яшайыш берйән рух болды. 46 Йөне илки рухы беден дәл-де, ынсан бедени боляндыр. Соңра ол рухы беден боляндыр. 47 Илкинҗи ынсан ерден ве топракдандыр; икинҗи ынсан болса гөкдендир. 48 Топракдан ясалан ынсан нәхили болса, ердәки адамлар хем шонуң ялыдыр; гөкден гелен нәхили болса, гөкдәкилер хем шонуң ялыдыр. 49 Биз топракдан ясалан ынсаның кешбине меңзейшимиз ялы, гөкден гелениң кешбине хем меңзәрис.

50 Доганлар, йөне мен сизе диййәрин, беденден ве гандан болан адам Худайың Патышалыгында месген тутуп билмез, чүйрейән беден хем чүйремезлиги мирас алып билмез. 51 Ине, мен сизе мукаддес сыры айдярын: бизиң хеммәмиз өлүм укусына гитмерис, йөне хеммәмизиң беденимиз өзгерер. 52 Бу соңкы сурнай чалынян вагты гөз ачып-юмасы салымда болар. Сурнай чалнанда, биз өлүмден дирелип, чүйремез бедени аларыс ве өзгерерис. 53 Чүйрейән беден чүйремейән бедене өврүлер, өлйән беден хем өлмейән бедене өврүлер. 54 Йөне чүйрейән беден чүйремейән бедене ве өлйән беден өлмейән бедене өврүленде, Язгылардакы: «Өлүм эбедилик ёк болар*» дийлен сөзлер берҗай болар. 55 «Өлүм, ханы сениң гүйҗүң? Өлүм, ханы сениң зәхериң?» 56 Өлүме элтйән зәхер гүнәдир, гүнә хем Канундан гүйч аляндыр. 57 Эмма мен Худая миннетдардырын, себәби ол Халыпамыз Иса Месих аркалы өлүмиң үстүнден еңиш берйәндир!

58 Шонуң үчин, эзиз доганларым, берк ве тутанъерли болуң, Халыпамызың ишинде элмыдама көп зәхмет чекиң. Себәби сиз Халыпамызың угрунда чекйән зәхметиңизиң бидерек дәлдигини билйәнсиңиз.