Матта

23 Соңра Иса мәрекә ве шәгиртлерине йүзленип, шейле дийди: 2 «Канунчылар ве фарисейлер Мусаның орнунда отурдылар. 3 Оларың әхли айдянларыны эдиң, йөне эдйән ишлерини этмәң. Себәби олар айдян затларыны өзлери этмейәрлер. 4 Олар адамларың эгнине агыр йүклери атярлар, өзлери болса олары галдырмак үчин бармагыны-да гымылдатмак ислемейәрлер. 5 Олар әхли ишлерини гөз үчин эдйәрлер. Язгылардан алнан аятлары гутуҗыклара салып, олары эрбетликден горанмак үчин, маңлайына ве эллерине дакярлар, донларының сечеклерини* узалдярлар. 6 Олар тойларда иң абрайлы ерлерде ве синагогаларда өңдәки* хатарларда отурмагы халаярлар. 7 Олар базарларда адамларың хормат билен саламлашмакларыны ве өзлерине „Мугаллым*“ диймеклерини ислейәрлер. 8 Эмма сиз өзүңизе „Мугаллым“ дийдирмәң, себәби сизиң еке-тәк Мугаллымыңыз бар. Сизиң барыңыз болса догансыңыз. 9 Шейле-де ер йүзүнде хич киме „ата*“ диймәң, себәби сизиң еке-тәк Атаңыз бар, Ол гөкдедир. 10 Өзүңизе „ёлбашчы“ дийдирмәң, себәби сизиң еке-тәк Ёлбашчыңыз бар, ол Месихдир. 11 Араңызда иң улыңыз сизе хызматкәр болсун. 12 Өзүни бейгелдйән адам кичелдилер, өзүни кичелдйән болса бейгелдилер.

13 Вай гүнүңизе, эй канунчылар ве фарисейлер, икийүзлүлер! Сиз гөкдәки Патышалыгың гапысыны япып, не өзүңиз гирйәрсиңиз, не-де гирҗек адамлара ёл берйәрсиңиз. 14 *——

15 Вай гүнүңизе, эй канунчылар ве фарисейлер, икийүзлүлер! Сиз бир адамы ехуды динине уйдурмак* үчин, деңизлере ве дүзлере айланярсыңыз. Максадыңыза етениңизде болса, оны өзүңизден ики эссе Җәхеннем* одуна мынасып адам эдйәрсиңиз.

16 Вай гүнүңизе, көр ёлбашчылар. Сиз „Ким ыбадатханадан ант ичсе, ол җогапкәрчилик чекмез; йөне ким ыбадатхананың алтынындан ант ичсе, ол җогапкәрчилик чекер“ диййәрсиңиз. 17 Эй акмаклар ве көрлер! Эйсем, нәме ваҗып: алтынмы я-да алтыны мукаддес эдйән ыбадатхана? 18 Шейле-де сиз „Ким гурбанлык сыпасындан ант ичсе, ол җогапкәрчилик чекмез; йөне ким онуң үстүндәки хөдүрленен гурбандан ант ичсе, ол җогапкәрчилик чекер“ диййәрсиңиз. 19 Эй көрлер! Эйсем, буларың хайсысы ваҗып: хөдүрленен гурбанмы я-да оны мукаддес эдйән гурбанлык сыпасы? 20 Гурбанлык сыпасындан ант ичйән адам үстүндәки затлардан хем ант ичйәндир. 21 Ыбадатханадан ант ичйән адам онуң ичинде Яшаяндан хем ант ичйәндир. 22 Гөкден ант ичйән адам Худайың тагтындан ве онуң үстүнде Отурандан хем ант ичйәндир.

23 Вай гүнүңизе, эй канунчылар ве фарисейлер, икийүзлүлер! Сиз нарпызың, шибитиң ве тминиң ондан бир бөлегини берйәрсиңиз, йөне Кануның хас ваҗып табшырыкларына, ягны адалатлылыга, рехимдарлыга, вепалылыга совук-сала гараярсыңыз. Аслында, ондан бир бөлеги бермек ваҗып, йөне башга затлардан хем йүз өвүрмели дәлдиңиз. 24 Көр ёлбашчылар, сиз чыбыны сүзүп айырярсыңыз, дүйәни болса ювудярсыңыз!

25 Вай гүнүңизе, эй канунчылар ве фарисейлер, икийүзлүлер! Сиз гап-чанакларың дашыны арассалаярсыңыз, эмма оларың ичи ачгөзлүкден ве эрбет хөвеслерден* долудыр. 26 Эй көр фарисей, илки гап-чанагың ичини арассала, шонда онуң дашы-да арасса болар.

27 Вай гүнүңизе, эй канунчылар ве фарисейлер, икийүзлүлер! Сиз дашы агардылан мазарлара меңзейәрсиңиз. Олар дашындан овадан болуп гөрүнсе-де, ичи өлүлериң сүңклеринден ве хер дүрли хапалыкдан долудыр. 28 Шонуң ялы сиз хем дашыңыздан адамлара догручыл болуп гөрүнйәрсиңиз, эмма йүрегиңиз икийүзлүликден ве канунсызлыкдан долудыр.

29 Вай гүнүңизе, эй канунчылар ве фарисейлер, икийүзлүлер! Сиз пыгамберлере мазарлар гурярсыңыз, догручыл адамларың мазарларыны безейәрсиңиз. 30 Сиз: „Ата-бабаларымызың гүнлеринде яшан болсадык, онда пыгамберлериң ганының дөкүлмегине шәрик болмаздык“ диййәрсиңиз. 31 Шейле диймек билен, сиз пыгамберлери өлдүрен адамларың огулларыдыгыңызы боюн алярсыңыз. 32 Онда ата-бабаларыңызың башлан ишини довам эдибериң.

33 Эй йыланлар, алахөвренлер несли, сиз Җәхеннемиң* хөкүминден гачып гутулармысыңыз? 34 Мен сизе пыгамберлери, акылдарлары ве тербиечилери ёллаярын. Сиз оларың кәбирини өлдүрерсиңиз, пүрсе чүйләрсиңиз, кәбирини болса синагогаларда енҗерсиңиз*, олары шәхерден-шәхере ызарларсыңыз. 35 Сиз Хабылдан башлап тә ыбадатхананың мукаддес ери билен гурбанлык сыпасының арасында өлдүрилен Баракияның оглы Зекерия ченли әхли догручыл адамларың дөкүлен ганына гүнәкәрсиңиз. 36 Сизе догрусыны айдярын, бу несил шол затларың әхлиси үчин җогап берер.

37 Эй Иерусалим, пыгамберлери өлдүрйән ве Худайың иберен адамларыны дашлаян Иерусалим! Товугың өз җүйҗелерини ганатының ашагына йыгнайшы ялы, мен хем сениң чагаларыңы энчеме гезек йыгнаҗак болдум! Йөне сен муны ислемедиң. 38 Ине, Худай сениң өйүңи* терк эдйәр*. 39 Сизе диййәрин, инди сиз „Ехованың* адындан гелйәне шөхрат!“ диййәнчәңиз, мени асла гөрмерсиңиз».