Матта

24 Иса ыбадатханадан чыкып барярка, шәгиртлери оңа ыбадатхананың биналарыны гөркездилер. 2 Шонда Иса олара: «Бу затлары гөрйәрмисиңиз? Сизе догрусыны айдярын, бу ерде даш үстүнде даш галмаз, әхлиси юмрулар» дийди.

3 Ол Зейтун дагында отырка, шәгиртлери екеликде янына барып: «Бизе айт, бу затлар хачан болар, сениң гелендигиңи* ве шу дүнйәниң* соңуны гөркезйән аламат нәхили болар?» дийип сорадылар.

4 Иса шейле җогап берди: «Сересап болуң, сизи алдаймасынлар. 5 Себәби көплер мениң адымдан гелип, „Мен Месих“ диерлер ве көп адамлары алдарлар. 6 Сиз дүрли ерлерде болян уруш сеслерини ве уруш барадакы хабарлары эшидерсиңиз. Сересап болуң, ховсала дүшәймәң. Себәби бу затлар болмалыдыр, йөне энтек дүнйәниң соңы дәлдир.

7 Миллет миллете, патышалык хем патышалыга гаршы чыкар, дүрли-дүрли ерлерде ачлык ве ертитремелер болар. 8 Бу затларың әхлиси бетбагтчылыгың башлангыҗыдыр*.

9 Адамлар сизи ызарларлар, өлдүрерлер ве мениң шәгирдим боландыгыңыз үчин, хеммелер сизи йигренер. 10 Шонда көплер имандан дәнерлер, бир-бирине дөнүклик эдерлер ве бирек-биреги йигренерлер. 11 Энчеме ялан пыгамберлер дөрәп, көп адамлары алдарлар. 12 Канунсызлыгың артяндыгы себәпли, көплериң сөйгүси совар. 13 Эмма соңуна ченли чыдан халас болар. 14 Патышалык барадакы хош хабар бүтин ер йүзүнде әхли миллетлере вагыз эдилер*, соңра дүнйәниң ахыры гелер.

15 Сиз Даныел пыгамбериң айдан вейранчылык гетирйән йигренҗи задының мукаддес ерде дурандыгыны гөрениңизде (муңа дүшүнмек үчин окыҗа дүшгүрлик герек), 16 Яхудадакылар даглара гачсын. 17 Шонда җайың үчегиндәки* адам задыны алмак үчин өйүне гирмесин. 18 Экин мейданындакы адам донуны алмак үчин ызына доланмасын. 19 Шол гүнлер гөврели ве чага эмдирйән аяллара нәхили кын болар! 20 Гачмалы гүнүңиз гыш я-да Сабат гүни* болмаз ялы, дога эдиң. 21 Себәби шонда шейле бир агыр мушакгат болар велин, ол дүнйәниң башлангыҗындан тә шу гүнлере ченли не боландыр, не-де болар. 22 Эгер шол гүнлер гысгалдылмадык болса, хич ким халас болмазды. Йөне сайлананлар үчин, ол гүнлер гысгалдылар.

23 Шонда бири сизе „Ине Месих шу ерде“ я-да „Ол ерде!“ дийсе ынанмаң. 24 Себәби ялан Месихлер ве ялан пыгамберлер дөрәр. Олар хатда сайлананлары хем алдамак үчин улы аламатлар ве гудратлар гөркезерлер. 25 Мениң сизе өңүнден дуйдурандыгымы унутмаң. 26 Шонуң үчин кимдир бири „Ине ол чөлде“ дийсе, ол ере гитмәң, „Ине ол ички отагларда“ дийсе ынанмаң. 27 Себәби гүндогарда чакан йылдырымың ягтылыгы гүнбатарда гөрнүши ялы, Ынсан оглуның гелши* хем шейле болар. 28 Маслык* ниреде болса, бүргүтлер хем шол ере үйшер.

29 Шол агыр мушакгатың ызыяны Гүн гаралар, Ай ягтылык бермез, гөкден йылдызлар гачар ве гөк гудратлары титрәр. 30 Соңра гөкде Ынсан оглуның аламаты гөрнер ве ер йүзүндәки әхли халклар* хасрат чекип, гурсагына урарлар. Олар Ынсан оглуның гөкдәки булутларда гудрат ве улы шөхрат билен гелйәнини гөрерлер. 31 Ол перишделерини гүйчли сурнай сеси билен иберер. Олар ериң дөрт тарапындан*, асманың бир уҗундан бейлеки уҗуна ченли сайлананлары йыгнарлар.

32 Инҗир агаҗындан сапак эдиниң: онуң шахалары пынтыклап, япрак чыкарып башланда, томсуң голайландыгыны билйәрсиңиз. 33 Шонуң ялы-да буларың барыны гөрениңизде, Ынсан оглуның голайдыгыны, гапының агзындадыгыны билиң. 34 Сизе догрусыны айдярын, шу несил дүнйәден өтмәнкә, бу затларың әхлиси болар. 35 Гөк ве ер гечип гидер, йөне мениң сөзлерим галар.

36 Шол гүни ве сагады хич ким, гөкдәки перишделер-де, Огул-да билйән дәлдир, муны диңе Ата билйәндир. 37 Нухуң гүнлери нәхили болан болса, Ынсан оглуның гелши-де* шейле болар. 38 Тупандан өң адамлар Нухуң гәмә гирен гүнүне ченли ийип-ичип, өйленип, дурмуша чыкярдылар. 39 Тупан туруп, адамларың әхлисини сырып әкидйәнчә, олар хич зада үнс бермедилер. Ынсан оглуның гелши-де* шейле болар. 40 Шонда меллекде ики адам болар; оларың бири алнар, бейлекиси гойлар. 41 Дегирменде галла үвейән ики аял болар; оларың бири алнар, бейлекиси гойлар. 42 Шонуң үчин оя болуң, себәби сиз Халыпаңызың хайсы гүн гелҗекдигини билмейәрсиңиз.

43 Эмма бир зады билиң: эгер өй эеси огрының хайсы сагатда* гелҗекдигини билсе, оя боларды ве өйүни таламага ёл бермезди. 44 Шонуң үчин сиз хем тайын болуң, себәби Ынсан оглы сизиң гарашмаян сагадыңызда гелер.

45 Өйдәки хызматкәрлерине вагтлы-вагтында нахар пайларыны бермек үчин, хоҗайының беллән вепалы ве пайхаслы хызматкәри ким? 46 Хоҗайыны гайдып геленде, хызматкәриниң айдылан затлары эдип йөрендигини гөрсе, ол хызматкәр нәхили багтлы! 47 Сизе догрусыны айдярын, хоҗайын оны бүтин эмләгиниң үстүнден белләр.

48 Эгер залым гул өз ичинден „Хоҗайыным гиҗә галяр“ дийип, 49 ёлдашларыны урмага, серхошлар билен ийип-ичмәге башласа, 50 хоҗайыны онуң гарашмаян гүни ве осламаян сагады гелер. 51 Шонда ол гулуна агыр җеза берер ве икийүзлүлериң арасына ташлар. Ол ерде гөзяш дөкүп, алачсызлыкдан яңа дишини гыҗар».