Лука

22 Пасха дийилйән Петир* байрамы голайлапды. 2 Улы руханылар ве канунчылар Исаны өлдүрмек үчин аматлы пурсат гөзлейәрдилер, себәби олар адамлардан горкярдылар. 3 Шонда Шейтан 12 ресулың бири болан Иуда Искариотың йүрегине тәсир этди. 4 Ол улы руханыларың ве ыбадатхананың гөзегчисиниң янына барып, Исаны оларың элине нәдип табшырҗакдыгы хакда геплешди. 5 Олар хем бегенип, оңа күмүш пул берҗекдигини айтдылар. 6 Иуда муңа разылашды ве адамлар ёкка Исаны сатмак үчин аматлы пурсат гөзләп башлады.

7 Петир байрамының биринҗи гүни* гелип етди. Адатча, шол гүн Пасхалык гурбаны берилйәрди. 8 Шонда Иса Петрус билен Яхяны иберип, олара: «Барың-да, бизиң үчин Пасхалык нахарыны тайярлаң» дийди. 9 Олар: «Сен оны ниреде тайярламагымызы ислейәрсиң?» дийип сорадылар. 10 Иса шейле дийди: «Шәхере гирениңизде, күйзеде сув алып барян бир адама душарсыңыз. Онуң ызына дүшүп, баран өйүне гириң. 11 Соңра өйүң эесине: „Мугаллым сенден: „Шәгиртлерим билен Пасхалык нахарыны иер ялы, мыхман отагы ниреде?“ дийип сораяр“ дийиң. 12 Ол сизе ичинде хемме зады бар болан ёкаркы улы отагы гөркезер. Шол ерде тайярлаң». 13 Олар гитдилер, әхли зат Исаның айдышы ялы-да болды. Олар хем Пасха байрамына тайярлык гөрдүлер.

14 Нахар вагты геленде, Иса ресуллары билен сачак башында отурды. 15 Шонда Иса олара: «Мен гөрги гөрмезимден өң, шу Пасханы сизиң билен иймеги җуда иследим. 16 Себәби сизе диййәрин, Пасха хакда айдылан әхли затлар Худайың Патышалыгында берҗай болянча, мен оны гайдып иймерин» дийди. 17 Соңра Иса бир кәсәни алып, Худая миннетдарлык билдирди-де: «Муны алың ве бири-бириңизе гечирип, ондан әхлиңиз ичиң. 18 Чүнки сизе диййәрин, Худайың Патышалыгы гелйәнчә, мен асла шерап ичмерин» дийди.

19 Шейле-де ол чөреги алып, Худая миннетдарлык билдирди. Оны бөлүшдирип, ресулларына берди-де: «Бу мениң сизиң үчин берйән беденимдир. Муны мени ятламак үчин берҗай эдиң» дийди. 20 Нахар ийип боланларындан соң, Иса бир кәсәни алып, шейле дийди: «Бу кәсе сизиң угруңызда дөкүлҗек ганым билен беркидилен тәзе әхти аңладяндыр.

21 Ине, маңа дөнүклик этҗек адам мениң билен биле сачак башында отыр. 22 Догрудан-да, пыгамберлик эдилиши ялы, Ынсан оглы хакда айдыланлар берҗай болуп баряр; йөне оңа дөнүклик эдйәниң дат гүнүне!» 23 Шонда олар муны этҗек кимкә дийип, бири-биринден сорап башладылар.

24 Шейле-де оларың арасында кимиң улудыгы хакда улы дава турды. 25 Шонда Иса олара: «Миллетлериң патышалары олара агалык эдйәр, ыгтыярлы адамлар хем өзлерине хайыр-согап эдиҗи* диййәр. 26 Йөне сизиң араңызда бейле болмалы дәл. Араңызда ким улы болса, гой, ол кичи болсун, ким ёлбашчы болса, өзүни хызматкәр ялы алып барсын. 27 Эйсем, сачак башында отуран улумы я-да оңа хызмат эдйән? Сачак башында отуран дәлми нәме? Эмма мен сизиң араңызда хызматкәр ялыдырын.

28 Йөне сиз сынагларымда мениң билен биле чыдамлы болдуңыз. 29 Шонуң үчин Атамың мениң билен патышалык әхтини баглашышы ялы, мен хем сизиң билен әхт баглашярын. 30 Шейлеликде, сиз Патышалыгымда мениң билен биле ийип-ичерсиңиз ве тагтларда отурып, Ысрайылың 12 тайпасының үстүнден казылык эдерсиңиз.

31 Симун, Симун, Шейтан сизиң әхлиңизи бугдай кимин элекден гечирмеги талап этди. 32 Эмма иманың говшамаз ялы, мен Худая ялбарып дога этдим; шонуң үчин доланып гелениңде, доганларың иманыны беркитгин». 33 Шонда ол: «Халыпам, мен сениң билен түрмә гитмәге-де, өлмәге-де тайындырын» дийди. 34 Эмма Иса: «Петрус, саңа диййәрин, шу гүн хораз гыгырманка, сен мени танамаяндыгыңы үч гезек айдарсың» дийди.

35 Шейле-де Иса олардан: «Мен сизи пулсуз, иймитсиз ве аякгапсыз иберенимде, кем задыңыз болупмыды?» дийип сорады. Олар: «Ёк!» дийип җогап бердилер. 36 Шонда Иса олара шейле дийди: «Инди болса кимиң пулы бар болса, гой, алсын, шонуң ялы-да иймитли торба-да алсын, кимиң гылыҗы ёк болса, эшигини сатып, оны сатын алсын. 37 Себәби сизе диййәрин, Язгыларда: „Ол җенаятчыларың бири сайылды“ дийип, мен хакда айдылан сөзлер берҗай болмалыдыр. Хава, мен хакда айдыланларың бары берҗай болуп баряр». 38 Шонда олар: «Халыпам, ине бу ерде ики гылыч бар» дийдилер. Ол хем: «Шол етерликдир» дийди.

39 Соңра Иса хемишекиси ялы шәгиртлери билен Зейтун дагына гитди. 40 Шол ере баранларында, Иса олара: «Сынага дүшмез ялы, дога эдиң» дийди. 41 Өзи болса олардан бирнәче әдим өңе гидип, дыза чөкди-де, дога эдип, 42 шейле дийди: «Атам, эгер ислесең, бу кәсәни менден айыр. Йөне, гой, мениң ислегим дәл-де, сениң ислегиң болсун». 43 Шонда гөкден бир перишде гелип, оны беркитди. 44 Ол гүйчли гам-гусса батып, ыхласлы дога этмегини довам этди; онуң дери ган дамҗаларына өврүлип, ере дамярды. 45 Ол дога эдип болансоң, шәгиртлериниң янына геленде, оларың уклап ятандыгыны гөрди, себәби олар гам-гуссадан яңа халыс болупдылар. 46 Иса олара: «Нәме үчин уклап ятырсыңыз? Туруң, сынага дүшмез ялы, дога эдиң» дийди.

47 Иса хениз гепләп дурка, ине, 12 ресулың бири Иуда мәреке билен гелди-де, оны огшамак үчин янына барды. 48 Эмма Иса: «Иуда, сен Ынсан оглуны огшап, оңа дөнүклик эдйәрмиң?» дийди. 49 Онуң янындакылар болян затлары гөренлеринде: «Халыпам, олары гылычдан гечирелими?» дийдилер. 50 Оларың бири гылыҗыны алды-да, баш руханының гулуның саг гулагыны кесди. 51 Эмма Иса: «Бес эдиң» дийди-де, гулуң гулагына элини дегрип, оны сагалтды. 52 Соңра өзүни тутмак үчин гелен улы руханылара, ыбадатхананың гөзегчисине ве яшулулара: «Бир гаракчының гаршысына чыкан ялы, гылычдыр таяк билен гелдиңизми? 53 Хер гүн сизиң билен ыбадатханада боланымда, мени туссаг этмәндиңиз. Йөне хәзир сизиң сагадыңыздыр ве ягтылыгы гизлейәнлериң хөкүм сүрйән вагтыдыр» дийди.

54 Соңра олар Исаны туссаг этдилер-де, алып гитдилер ве баш руханының өйүне элтдилер; Петрус болса эсли аралыкдан оларың ызына дүшүп гитди. 55 Адамлар ховлуда от якып отыркалар, Петрус хем янларына барып отурды. 56 Шонда бир хызматкәр гыз онуң одуң башында йылынып отурандыгыны гөрүп, оңа сиңе серетди-де: «Бу адам хем онуң янындады» дийди. 57 Эмма ол боюн алман: «Мен оны танамаярын» дийди. 58 Бираз вагтдан башга бири оны гөрүп: «Сенем шоларың бири» дийди. Эмма Петрус: «Ёк, мен дәл» дийди. 59 Бир сагат төвереги вагт геченсоң, ене бири гелди-де: «Шу адам, хакыкатдан-да, онуң янындады, өзем җелилели!» дийип, ынандырып башлады. 60 Петрус болса: «Сениң нәме диййәниңи билмейәрин» дийди. Ол гепләп дурка, эдил шол бада хораз гыгырды. 61 Шонда Иса өврүлип, Петруса серетди. Петрусың болса Халыпамызың: «Шу гүн хораз гыгырманка, сен менден үч гезек йүз өврерсиң» диен сөзлери ядына дүшди. 62 Ол дашарык чыкды-да, мөңңүрип аглады.

63 Исаны гаравуллаян адамлар онуң үстүнден гүлүп, уруп башладылар. 64 Онуң йүзүни япып: «Пыгамбер, ханы айт, сени ким урды?» диййәрдилер. 65 Шейле-де олар оңа гаршы көп кемсидиҗи сөзлери айтдылар.

66 Даң атанда, халкың яшулулары, улы руханылар ве канунчылар Меҗлисе* йыгнандылар. Исаны хем шол ере гетирдип, шейле дийдилер: 67 «Эгер сен Месих болсаң, бизе айт». Эмма Иса: «Мен сизе айтсам-да, сиз асла ынанмарсыңыз. 68 Эгер сизден сорасам-да, җогап бермерсиңиз. 69 Йөне мундан бейләк Ынсан оглы Гудратыгүйчли Худайың саг тарапында отурар» дийди. 70 Шонда оларың әхлиси: «Диймек, сен Худайың Оглы-да?» дийдилер. Ол хем: «Муны сизиң өзүңиз айдярсыңыз» дийди. 71 Олар: «Бизе башга делил нәмә герек? Биз муны онуң өз агзындан эшитдик ахырын» дийишдилер.