2 Коринфлилер
3 Биз өзүмизиң кимдигимизи гайтадан айтмалымы? Я-да башга адамларың эдиши ялы, сизден, я өзүмизден кимдигимизи тассыклаян хат герекми? 2 Хемме адамларың билмеги ве окамагы үчин, сизиң өзүңиз бизиң йүреклеримизде язылан хатсыңыз. 3 Сизиң Месихден гелен хатдыгыңыз гөрнүп дур ахырын. Шол хат биз, ягны Худайың гуллукчылары аркалы сыя билен дәл-де, дири Худайың рухы билен, дашың йүзүне дәл-де, гөчме маныдакы йүреклерде языландыр.
4 Биз Худайың өңүнде Месих аркалы мунуң шейледигине ынанярыс. 5 Биз муны өз гүйҗүмиз билен эдйәрис дийҗек болмаярыс, бу иши ерине етирмәге бизе көмек эдйән Худайдыр. 6 Себәби ол бизе укып берйәндир. Ол бизи эл билен язылан Канун аркалы дәл-де, мукаддес рухы аркалы тәзе әхтиң гуллукчылары этди; чүнки эл билен язылан Канун өлүме хөкүм эдйәндир, Худайың рухы болса яшайыш берйәндир.
7 Өлүме хөкүм эдйән ве дашың йүзүне язылан Канун улы шөхрат билен гелипди. Шонда Ысрайыл огуллары Мусаның йүзүндәки нур сачып дуран шөхрата середип билмәндилер. Эгер соңра ёк болуп гиден Канун шейле шөхрат билен берлен болса, 8 онда рухуң эдйән иши хас көп шөхрат гетирмезми? 9 Эгер адамлары өлүме элтйән Канун шөхратлы болан болса, онда догрулыгы ыглан эдйән гуллук хас-да шөхратлыдыр. 10 Тәзе әхтиң шөхраты билен деңешдирениңде, Кануның гетирен шөхраты хич зат болуп галяр. 11 Эгер ёк болуп гиден Канун шейле шөхратлы болан болса, онда тәзе әхт хас көп шөхрата эедир!
12 Биз шейле умыдымызың бардыгына гөрә батыргайлык* билен геплейәрис. 13 Шейле-де биз Муса ялы этмейәрис. Ысрайыл огуллары ахырсоңы ёк болуп гитҗек шөхрата середип билмәндиклери үчин, ол йүзүни мата билен өртүпди. 14 Себәби оларың аң-дүшүнҗелери япылыпды. Бу затлар шу гүнлере ченли хем довам эдйәр, себәби көне әхт окаланда, шол мата айрылман галяр. Ол диңе Месих аркалы айрыляндыр. 15 Догрудан-да, шу гүнлерем Мусаның язанларыны оканларында, оларың йүреклери мата билен өртүлгидир. 16 Йөне кимдир бири Ехова* доланса, ол мата айрыляндыр. 17 Ехова* рухдур, өзүнде Ехованың* рухы болан адам хем азатдыр. 18 Биз йүзүмизи мата билен өртмән, гайтам, Ехованың* шөхратыны айна кимин гөркезйәрис. Шейтмек билен, Онуң кешбине гөрә өзгерйәрис ве шөхратыны хас-да айдың гөркезип, бизи өзгердйән Ехованың* эдил өзи ялы болярыс.